New article No21746

IMIKINO

Perezida wa Barcelona yasobanuye kuri Gahunda yo kugarura Neymar Junior muri iyi kipe

Yanditswe

kuwa

na

Makuruki
Perezida wa Barcelona yasobanuye kuri Gahunda yo kugarura Neymar Junior muri iyi kipe

Perezida Josep Maria Bartomeu w’ikipe ya Barcelona avuga ko bitakunda ko iyi kipe yongera kugura Neymar akava muri Paris Saint-Germain bitewe n’uko ubukungu buhagaze muri iki gihe.

Yavuze ko no kugura rutahizamu Lautaro Martinez muri Inter Milan nabyo byagizweho ingaruka.

Bartomeu yabwiye ikinyamakuru Sport cyo muri Espanye ko hagati y’ukwezi kwa gatatu n’ukwa gatandatu uyu mwaka, amafaranga Barça yateganyaga kwinjiza yagabanutseho miliyoni 200 z’ama-euro.

Yagize ati, "Amakipe yose akomeye y’i Burayi yagizweho ingaruka. Ibi ntibizamara umwaka umwe, ahubwo [bizamara] itatu cyangwa ine".

Neymar, Umunya-Brazil w’imyaka 28 y’amavuko, yageze muri PSG mu kwezi kwa munani mu 2017 aguzwe miliyoni 222 z’ama-euro - ya mbere menshi ku isi yari aguzwe umukinnyi w’umupira w’amaguru.

Bartomeu yagize ati, "Kugura Neymar? Muri iki gihe, ntibyakunda. Na PSG ntabwo ishaka kumugurisha. Barça yavuganye na Inter ku bijyanye na Lautaro, ariko ibiganiro byarahagaze. Uko ibintu bimeze ubu ntabwo byemerera gushora imari itubutse".

Bartomeu yakomeje asobanura ko Barcelona yahombye miliyoni 200 z’ama-euro hagati y’ukwezi kwa gatatu n’ukwa gatandatu uyu mwaka.

Yongeyeho ati, "Mu mwaka wa 2020-21 twari twiteze kwinjiza miliyari 1,1 z’ama-euro, ariko tuzinjiza 30% by’ayo. Niba uko iki cyorezo [cya coronavirus] kimeze bitagenze neza, nta bareba umupira ku kibuga bazabaho, nta basura inzu y’amateka y’ikipe, nta maduka acuruza iby’ikipe azafungura kandi hazakomeza kubaho igihombo cy’amafaranga".

Ikipe ya Barcelona ivuga ko ubuyobozi bw’iyi kipe butagomba kujenjeka mu ishoramari ry’ingenzi n’irishobora kuba ritegereje.

Ikipe ya Barcelona ntiyagize umwaka mwiza w’imikino, aho yasoje iri ku mwanya wa kabiri, irushwa amanota atanu n’ikipe ya Real Madrid yatwaye igikombe.

Perezida wa Barcelona avuga ko nta bushobozi ikipe ifite bwo kugarura Neymar Junior muri iyi kipe

IBITEKEREZO

Tanga igitekerezo


Kwamamaza New article No21943
Kwamamaza New article No21181
Kwamamaza