Kwamamaza

OPINIONS

Ibintu 10 bidasanzwe byagaragaye mu byumba by’Imitwe y’Inteko Ishinga Amategeko byatumye izandikwa mu mateka.

Yanditswe

kuya

na

Editor1

na

Ferdinand Maniraguha
Ibintu 10 bidasanzwe byagaragaye mu byumba by’Imitwe y’Inteko Ishinga Amategeko byatumye izandikwa mu mateka.

Ubwo hasuzumwaga Ishingiro ry’Ubusabe bw’abanyarwanda bakabakaba hafi Miliyoni 4 basabye ko ingingo y’101 y’Itegeko nshinga yahinduka, hagaragaye byinshi bidasanzwe mu Ngoro y’Inteko Ishinga amategeko, aho ndetse n’abadepite ubwabo bavuze ko uyu munsi ari amateka akomeye kuva Inteko Ishinga amategeko yabaho mu Rwanda.

Nkuko kandi byagarutsweho na Perezida w’Umutwe w’abadepite Mukabalisa Donatilla ndetse na Visi Perezida Mukama Abbas, bavuze ko uyu munsi ari amateka yiyanditse kuri bo, aho kuri iyi tariki ya 14 Nyakanga 2015, abadepite 80 bose uko bakabaye, bitabiriye Imirimo y’Inteko rusange ntawasibye cyangwa uri mu butumwa hanze y’Inteko. Ngo ibi ni ibintu bidasanzwe.

Dore bimwe mu byagaragaye kuri uyu munsi.

1. Uruvunganzoka rw’abaturage baturutse imihanda yose

Guhera mu ma saa moya n’igice za mu gitondo, ama bisi arazana abantu ku Kimihurura, imirongo miremire y’abaturage ku marembo y’Inteko Ishinga amategeko, baturutse mu Turere hafi ya twose tw’igihugu. Biganjemo abakecuru, abana, urubyiruko, abanyamadini, abayobozi batandukanye baje gukurikirana imirimo y’Inteko rusange, aho abantu barenga ibihumbi 2000 bari mu byumba by’Inteko no hanze yabyo.

Honorable Mukabalisa yavuze ko mu mateka y’Inteko ari ubwa mbere bagize Ubwinshi bw’abaturage bungana gutya bitabiriye inama y’Inteko rusange

Ubusanzwe Itegeko riteganya ko inama z’Inteko rusange zibera mu ruhame, aho buri wese ashobora kuba yaza akabikurikirana mu Ituze, ariko usanga ubundi bititabirwaga bitandukanye n’uyu munsi, kuko no kugira ngo ubone aho wakandagiza ikirenge usohoka cyangwa winjira bitari byoroshye.

2. Irengayobora mu mutwe w’abadepite mu gihe muri Sena byari bitandukanye

Nubwo inama y’Inteko rusange y’abadepite ikorerwa mu ruhame, abaturage cyangwa undi wese avuga ko ari uko ahawe ijambo, ariko uyu munsi byari bitandukanye.

Mu mutwe w’abadepite mu gihe cy’inama y’Inteko, abaturage bagaragazaga amarangamutima bagakoma mu mashyi, bakanyuzamo twa morali, ariko ntibagire icyo babwirwa cyangwa bihanizwe nkuko bisanzwe n’uwari uyoboye inama. Bitandukanye no mu zindi nama, abitabiriye babikurikirana ituze, ndetse n’uwaba ahungabanyije ituze akaba yakwihanizwa cyangwa akaba yasohorwa hanze na Perezida w’Inama, ni yo yaba ari umudepite ukurikije ibiteganywa n’Itegeko ngenga rigena imikorere y’Umutwe w’abadepite.

Ibi ariko si ko byari byifashe mu cyumba cya Sena, byari bitandukanye, mu gihe abaturage bari batangiye kugaragaza amarangamutima no gukoma mu mashyi, Perezida wa Sena Bernard Makuza, yahise abihanangiriza ababwira ko utari umusenateri agomba gutuza, ko buri wese wicaye inyuma y’abasenateri aba agomba kuba akeye kandi agaceceka agakurikirana inama ituze, bityo kugeza hafashwe imyanzuro nta rusaku cyangwa amashyi byongeye kumvikana mu cyumba cy’abasenateri, wagira ngo nta n’umuturage wari urimo.

3. Ibiganiro mpaka (debat) biri mu murongo umwe

Ubusanzwe bimenyerewe ko impaka mu bashinga amategeko ziba zishyushye, harimo kugaragaza impungenge cyangwa guhangana mu buryo bw’ibitekerezo byubaka.

Gusa kuri uyu wa kabiri si ko byari bimeze, ntiwabyita impaka ahubwo zari imvugo zitanyuranya, zishimangira gusa kandi ziri mu murongo umwe w’Ivugururwa ry’Itegeko nshinga mu ngingo y’101.

Mu badepite bagize inteko bose 80 kuri 80 bari bitabiriye ndetse n’abasenateri 24 kuri 26 bagize sena, nta gitekerezo gitandukanye cyangwa se hakaba n’uwagaragaza impungenge z’amategeko, bose bahagurukakaga bashimangira ko babyemeye kandi ko basangiye igitekerezo n’abaturage, bamwe bakagerekaho n’amavamutima ku giti cyabo y’impamvu babona Perezida Kagame atagira inzitizi imubuza kongera kwiyamamaza.

By’umwihariko icyakwitwa impaka cyabereye mu mutwe w’abadepite cyamaze amasaha atatu n’igice, wibazaga niba ari ngombwa ko buri wese afata umwanya mu gihe byose byari ugushimangira, ahubwo uwari gusaba ijambo ari uwari kuba avuga ibitandukanye n’ibyabandi, bityo bikaba byanyuzwa mu matora ngo bisobanuke neza.

4. Abadepite bagaragaje impano z’ubusizi

Ubusanzwe mu nama y’Inteko rusange, umudepite cyangwa umusenateri ahabwa umwanya wo gutanga ibitekerezo, gusaba ibisobanuro byose biganisha mu murongo wo kuza gutora umwanzuro usobanutse, agahabwa iminota 4 yarangira atarangije gutanga igikerezo icyuma kikamwaka ijambo.

Ubwo abadepite batangiraga guhabwa ijambo, benshi bagagaje ubutumwa bavuga ko bwiyongera ku mabarurwa, abandi bakavuga iby’ubutumwa bwa sms na WhatsApp bari kwakira ako kanya, ndetse umwe agerekaho n’akarusho k’umuvugo cyangwa se igisigo.

Uwafashe ijambo bwa mbere ni Depite Mukakarangwa wahise avuga ashyigikiye ubu busabe bw’abaturage, ndetse ahita ashyiraho umuvugo usingiza Perezida Kagame ku buryo iminota 4 yari agenewe yashize atawurangije kuwuvuga.

5. Imyanzuro yatowe mu byumba byose ku bwiganze, bamwe bataha bazi ko ingingo yavuguruwe

Abadepite 79 kuri 80 bagize umutwe w’abadepite batoye YEGO ku myanzuro yo kwemeza ishingiro ry’ubusabe by’abaturage, habonekamo impfabusa imwe, mu gihe muri Sena mu basenateri 24 bitabiriye kuri 26 bagize uyu mutwe, nabo bose batoye yego habonekamo impfabusa imwe ku mwanzuro umwe.

Nyamara benshi mu baturage batashye bazi ko iyi ngingo y’101 yavuguruwe, bitewe no kutamenya inzira z’amategeko binyuzwamo kugira ngo umwanzuro ufatwe. Ibi byagaragaye mu biganiro abaturage batandukanye bagiye bagaragaza nyuma y’inama, bavuga ko bishimiye ko Ingingo y101 ivanyweho.

Ni umudamu wo mu Murenge wa Mageragere agira ati “….ubu ndishimiye cyane nshimishijwe no kuba ingingo y’101 ivanyweho, ubu ndumva ndi meze nkuri muri bicu”.

6. Imitwe yombi yateraniye rimwe yiga ikintu kimwe mu byumba bitandukanye

Mu myaka 12 Inteko ishinga amategeko y’u Rwanda aho igiriye imitwe ibiri uw’abadepite n’uwa sena, ni ubwa mbere bateranye amasaha amwe, basuzuma ingingo imwe, mu byumba bitandukanye byabo, kandi imyanzuro igafatwa mu buryo butandukanye ku ngingo imwe.

Ubu bubasha bahabwa n’ingingo y193 y’Itegeko nshinga ni ubwa mbere bukoreshejwe mu mateka y’Inteko Nshinga amategeko y’ u Rwanda, aho byanagoye buri wese wari kuba wakwifuza gukurikira impaka za buri mutwe kuko byabereye amasaha amwe.

7. Filimi mbarankuru yateguwe

Ubwo Visi Perezidante w’Umutwe w’abadepite Uwimanimpaye Jeanne d’Arc yari amaze kugeza raporo y’Ubusabe bw’abaturage bagejeje ku Nteko, yasabye abari mu cyumba cy’Inteko gukurikirana filime mbarankuru (documentary film) igaragaza iby’ibyifuzo by’abaturage.

Iyi filimi documentaire yari igizwe n’amakuru yagiye anyura mu bihe bitandukanye kuri televiziyo zo mu Rwanda, atagize icyo ahindurwaho na gito.

8. Ubwitabire bw’Itangazamakuru burenze

Uretse kuba ibiganiro byaberaga mu byumba by’imitwe yombi kandi mu gihe kimwe, byatambukaga kuri Radio na televiziyo by’igihugu, mu ngoro y’Inteko ishinga amategeko, hari abanyamakuru benshi baba abo mu Rwanda n’abo mu mahanga bitadukanye n’izindi nama z’inteko rusange.

Uretse ibitangazamakuru by’Igihugu, inkuru nyinshi zanyuzwaga ku bitangazamakuru byigenga ako kanya yaba amaradiyo, ibyandika ndetse hagakoreshwa n’imbuga nkoranyambanga.

Hari hashyizwe Kamera (cameras) mu byumba by’Inteko zombi, ndetse no hanze y’Inteko ku buryo n’abari mu byumba bakurikiranaga ibibera hanze uburyo abantu bakomezaga kwinjira no gucaracara mu mbuga y’Ingoro y’Inteko.

Imvugo zitsindagiye zikakaye za bamwe mu badepite bari bitezwe.

Nubwo buri mudepite yahawe umwanya wo kuvuga, hari bamwe mu badepite bari bitezwe na benshi ku byo baza kuvuga kuri iyi ngingo ijyanye n’Ivugururwa ry’Itegeko nshinga, bitewe n’uburyo ubusanzwe bazwiho kutarya umunwa cyangwa n’uburyo bagiye bagaragara bagira icyo bavuga kuri iyi ngingo mbere y’izi mpaka.

Nubwo tutabinyuramo byose, ariko hari ingero zimwe twabahitiyemo.

Honorable Nkusi Juvenal usanzwe akuriye Komisiyo ya PAC, avuga atsindagira yagize ati “….Nyakubahwa Perezida, Miliyoni eshatu zavuze simbona ikindi twakwiye gukora! kuko ubwabyo Nyakubahwa Perezida ni intambwe ikomeye kuri uyu munsi…

Honorable Gatabazi we yagize ati ; Nyakubahwa Speaker murakoze kumpa ijambo, nagenze amahanga menshi ariko ibi ni ibyambere, ni byo bita ubudasa, kuba abanyarwanda batakiri ba bandi, abanyarwanda ubu ngubu turasobanutse, nagira ngo mbabwire ko ibyo abanyarwanda bifuje bangana batya nanjye mbyifuza…

Depite Rusiha Gaston mu mvugo itsindagiye, nyuma yo kugaragaza impamvu ashingiraho ashyigikira ivugururwa ry’Itegeko nshinga, nawe yongeho ati “ "we are now in the process of shaping our future, our decisions determine destiny" tugenekereje mu Kinyarwanda ati ..ubu turi gutegura ejo hacu heza, ibyemezo byavcu bigaragaza icyo twagenewe

N’abandi benshi bagiye bagaragaza imvugo zikomeye zerekana ko ubu busabe bw’abaturage bataburenza ingohe.

10. Nyuma y’imirimo y’inama abadepite bacinye akadiho, abasenateri bitahira nk’ibisanzwe

Ibyabereye mu byumba by’imitwe yombi, byerekanye itandukaniro ko Umutwe w’abadepite ari uw’Intumwa za rubanda, kuko abaturage bahawemo rugari, bakabyina bizihirwa hamwe n’abadepite babo.

Abaturage batindiwe no kumva ijambo risoza inama rya Perezida w’Umutwe w’abadepite, maze si ukwegera abadepite bacinya akadiho karava.

Umwuka wo mu cyumba cy’abadepite wari utandukanye cyane n’uwo mu mutwe wa Sena, kuko umutuzo wari uri mu cyumba cy’abasenateri ni nk’uwo mu cyumba cy’Urukiko. Imirimo y’Inteko rusange irangiye, abasenateri n’abaturage batashye nk’ibisanzwe, dore ko inama yabo yanarangiye mbere y’iy’Umutwe w’abadepite.

Tubibutse ko uyu munsi wari umaze iminsi witezwe n’abantu benshi yaba abanyarwanda n’abanyamahanga kugira ngo bumve umwanzuro Inteko izafata ku busabe bagiye bagezwaho n’abaturage basabaga ko Itegeko nshinga ryavugururwa mu ngingo y’101.

Imirongo yari iri imbere y’amarembo y’Inteko Ishinga amategeko

Hari n’abatashye batarebye mu cyumba cy’Inteko kubera kubura imyanya

Mu cyumba cy’abadepite


Abaturage mu cyumba cy’Umutwe wa Sena


Buri munyamakuru arwana no gutahana inkuru ifashe neza

Uyu mutegarugori yazanye n’umwana we w’uruhinja

Perezida w’umutwe w’abadepite wayoboye Inama y’Inteko rusange itari yoroshye

Muri Sena, Hon Bernard Makuza na Hon Jeanne d’Arc Gakuba bayobora Umutwe wa Sena ni nabo bari bayoboye Inama y’Inteko rusange

Abadepite bari bitwaje udutabo tw’itegeko nshinga babiganiraho

Abanyamakuru bari benshi pe, aha ni muri Sena gusa

Abanyamadini

INKURU & AMAFOTO: byateguwe n’Ikipe ya Makuruki.rw yari mu Nteko Ishinga amategeko

IBITEKEREZO

  • AIME Yanditse:

    I REALLY WANT KAGAME!

  • lala Yanditse:

    birashimishije cyane,

  • HOMBA Yanditse:

    SHA MUZI KUYATARA KBS.

  • ku Yanditse:

    Ko nta Musenyeri wa Catholic mbona muri aba banyamadini????????????????

  • Kamuhands Yanditse:

    ee man namwe murayazikura. ubundi ni iki nkundira amakuruki.com inkuru yanyu kabisa usanga itanduknanye bigaragara kocmwahatubereye koko. erega ibindi tuba twabyumvise

  • Kamuhands Yanditse:

    ee man namwe murayazikura. ubundi ni iki nkundira amakuruki.com inkuru yanyu kabisa usanga itanduknanye bigaragara kocmwahatubereye koko. erega ibindi tuba twabyumvise

Tanga igitekerezo


Kwamamaza Car Free Day/ 18/02/2018
INKURU ZAMAMAZA 10-08-2018

ITANGAZO RYA CYAMUNARA

Kwamamaza
Perezida KAGAME avuga ku manyanga mu Iyubakwa rya Hotel ya FERWAFA n’ikibazo cy’abana bo ku mihanda
KAGAME avuga kuri za Mission z’abayobozi zidasobanutse
IBYO ABANYAMAKURU BAVUGA KU IYEGURA RYA Fred MUVUNYI ku buyobozi bwa RMC
Uwari V/Perezida w’Urukiko rw’Urukiko rurinda Itegeko Nshinga/ Burundi
RUNIGA avuga uko bazinjira Congo
Ubutumwa bw’Umuturage kuri Perezida KAGAME
Kwamamaza