Ese MININTER ya Sheikh Moussa Fazil ntiyaba iri mu marembera?

8

U Rwanda rufite Minisiteri 21 ndetse n’ikigo cy’igihugu gishinzwe Iterambere (RDB) gifatwa nka Minisiteri ukwacyo, aho Umuyobozi wa RDB aba ari umwe mu bagize bagize Guverinoma.

Minisiteri y’umutekano ni imwe muri izo Ministeri ikaba ari ni imwe muri Minisiteri zitigeze zihindagurika yaba mu nyito no mu nshingano cyangwa ngo ihuzwe n’izindi kuva na nyuma ya 1994, nkuko byagiye biba ku zindi Minisiteri, gusa kuri ubu hakaba hibazwa niba iyi ministeri itaba iri mu marembera bitewe n’ishingano zisa nk’izigiye kuyishiraho.

Iyi Minisiteri kuri ubu iyobowe na Sheikh Musa Fazil Harerimana ahanini yarebereraga inzego nkuru ebyiri harimo Polisi y’igihugu n’Urwego rw’igihugu rushinzwe imfungwa n’abagororwa, aho inshingano zayo z’ibanze ari ukugenzura no kwita ku mutekano w’abaturage ndetse no kujya inama mu by’umutekano.

Inama y’abaminisitiri yateranye tariki ya 10 Kanama 2016, yemeje ko Urwego rushinzwe imfungwa n’abagororwa (RCS) ruzajya rureberewa na Minisiteri y’Ubutabera aho kuba Minisiteri y’umutekano nk’uko byari bisanzwe.

Minisitiri w’Ubutabera Johnston Busingye mu kiganiro n’abanyamakauru yavuze ko inzego zose zimuriwe muri Minisiteri y’ubutabera, zifite aho zihuriye n’ubutabera.

Muri zo nzego kandi zimuriwe muri Minisiteri y’ubutabera kandi harimo ishami rya Polisi ryari rishinzwe ubugenzacyaha (CID) ryahise rinahindurirwa izina, rikagirwa n’ikigo ubwacyo kigenga gishinzwe iperereza (Rwanda Investigation Bureau). Nkuko byasobanuwe ariko kuba RCS izajya irebererwa na Minisiteri y’Ubutabera, ntacyo bizayihinduraho mu mikorere no mu miterere.

Minisiteri y’Umutekano isigaranye iki?

Mu gihe iri vugurura rizaba rimaze gushyirwa mu bikorwa, RCS n’ubugenzacyaha bikimurirwa muri Minisiteri y’Ubutabera, Minisiteri y’Umutekano izaba isigaranye kureberera Polisi y’Igihugu gusa.

Urebye ku rubuga rwa Minisiteri y’Umutekano muri nshingano n’intego z’iyi Minisiteri, ntihagaragara ishingano zihariye, gusa usangamo ishami rishinzwe Isesengura ry’Umutekano w’imbere mu gihugu n’ubufatanye (Internal Security Analysis & Cooperation Unit), aho zimwe mu nshingano zayo ari ugusesengura amakuru zihabwa na Minisiteri y’ubutegetsi bw’igihugu na Polisi y’Igihugu, urwego rw’amagereza no kwakira amaraporo atandukanye y’inzego zareberwaga n’iyi Minisiteri .

Aha ni ho ushobora kwibaza niba koko hari ishingano iyi Minisiteri izaba isigaranye cyangwa izagumaho.

Mu Polisi y’u Rwanda, nubwo irebererwa na Minisiteri y’umutekano, ariko mu mikorere yayo irigenga nk’urwego rushinzwe umutekano rwashyizweho n’Itegeko ngenga rikubiyemo imikorere, amahame n’ibindi birugenga ryashyizweho mu mwaka wa 2000 ubwo yashingwaga, rivugururwa muri 2010.

Byashoboka ko inshigano zo kureberera Polisi y’igihugu zishobora kuba zizasubizwa muri Minisiteri y’Ubutegetsi bw’igihugu nkuko byahoze dore ko hari naho inshingano zihurira cyangwa se ikaba yareberwa na Minisiteri y’Ubutabera cyangwa se igakora nk’Urwego rw’igenga rukuriwe n’Ibiro bya Minisitiri w’Intebe nkuko Urwego rw’Iperereza rukora.

Ikindi gishoboka nkuko biri mu mu babasha bwa Perezida wa Repuburika, ni uguhuza inshingano z’iyi minisiteri zikaba zahuzwa n’izindi cyangwa zikongerwa, aho kugira ngo ibe Minisiteri ukwayo ifite ishingano zo kurebera urwego rumwe narwo rwigenga mu mikorere yarwo.

Minisiteri y’Umutekano kandi yakabaye ikorana n’inzego zishinzwe umutekano mu baturage nka DASSO , nyamara izo nshingano nazo ziri muri Ministeri y’ubutegetsi bw’igihugu ikurikiranira bya hafi imikorere y’ inzego z’ibanze.

Ahandi Minisiteri z’umutekano biba byifashe gute?

Ntabwo ibihugu byose bigira Minisiteri zimwe, ari nayo mpamvu atari mu bihugu byose wasanga Minisiteri y’Umutekano, nubwo haba hari urwego cyangwa izindi Minisiteri ibijyanye n’umutekano bibarizwamo.

Mu Bufaransa ni kimwe mu bihugu bigira Minisiteri y’Umutekano. Muri iki gihugu iyi Minisiteri ifite inshingano zo kubungabunga umutekano mu gihugu, guhiga abakekwaho ibyaha no gukumira Ibiza karemano. Ibarizwamo kandi Polisi y’igihugu na jandarumori y’igihugu (Gendarmerie ).

Muri Nigeria naho haba Minisiteri y’umutekano, ni yo ishinzwe iby’abinjira n’abasohoka, ikurikirana ibijyanye n’ubwenegihugu, ishinzwe umutekano w’abantu n’ibintu binyuze mu nzego zishinzwe umutekano nka Polisi n’abashinzwe umutekano mu giturage, ibijyanye n’imfungwa n’abagororwa n’ibindi.

Minisiteri y’umutekano muri Uganda ho ishinzwe ibijyanye no kugenzura iby’intwaro nini n’intoya, ni yo ibarizwamo Kimisiyo ishinzwe ibijyanye n’imbabazi zihabwa abanyabyaha, ibijyanye n’imirimo nsimburagifungo n’ibindi.

Iyi nkuru ishingiye ku isesengura ry’ubwanditsi.

Yisangize Inshuti.

Ibitekerezo 8

  1. Sinajyaga nsoma cyane iki gitangazamakuru ariko ubu ndabemeye!!
    Ministeri mwavuzeho mu kwezi kumwe ihise ivaho?! Uyu wavuze za butuyu na bwana nawe ubanza afitemo ukuri

  2. Kuban any a minister in into miners yuki usanga inyinshizihuxa inshingano bityo ibyobikaba arugusesagira umutungowabanyatwanda

  3. Ariko se ibi si ukugenda kuri nyakunahwa sheih phazil mushaka kumwubikira ikibehe yariragaho cyanga mumureke azajye ayobora closing za cadet

  4. Muri indebakure basore banjye fazil bazamugire umuyobozi w urwegovrwamagereza niba akazi kagiye kubura

  5. Uyu muntu wanditse iyo nkuru azi gusesengura ndamwemeye.Minisiteri kubaho ireberera ikigo kimwe(police) ntacyo cyigenga kwaba ari ugusesagura. Ahubwo yakurwaho,police igakora nkuko RDB ikora cyangwa igashakirwa iyindi minisitere yashyirwamo, cg se na none ikagumaho arko ikongererwa ibigo biyishamikiyeho.

  6. Si yo yonyine. Hagiye kubaho umweyo cg gucanga amakarita vuba aha. Za butuyu zimaze kuba nyinshi hejuru!

Tanga Igitekerezo