Afurika irizihiza umunsi w’itangazamakuru, iry’u Rwanda ritaka ubukene bunuma

Mu gihe u Rwanda rwifatanya n’umugabane wa Afurika kwizihiza umunsi nyafurika w’itangazamakuru, ni umwanya mwiza wo kongera gutekereza aho itangazamakuru ry’u Rwanda rihagaze mu Nguni zose zirigize haba mu iterambere rusange, ireme n’ubushobozi bw’ibitangazamakuru n’abanyamakuru, n’ibindi.

U Rwanda nyuma yo kuva mu icuraburindi rya Jenoside rwagiye rutera intambwe igaragara mu iterambere ku buryo uwo ari we wese haba ururimo cyangwa abanyamahanga badasiba kuvuga ko rufite umuvuduko udatsikira mu iterambere.

Muri rusange, itangazamakuru ry’u Rwanda rimaze kugira imbaraga mu guhindura sosiyete nkuko na bamwe mu bayobozi bakuru b’igihugu bagenda babigarukaho, kuri ubu biroroshye cyane kuba mu rwego runaka habaho impinduka ziturutse ku kuba abanyamakuru batunzeyo urutoki cyangwa ku kuba babaye umuyoboro mwiza w’ibitekerezo by’impinduka biturutse mu buyobozi ku rwego runaka.

Mu gihe u Rwanda na Afurika byizihiza umunsi w’itangazamakuru ku nsanganyamatsiko yo kugira itangazamakuru ryifuzwa kuri uyu mugabane, ni umwanya mwiza wo kwibaza ku cyakorwa mu gukemura ibibazo by’ingutu byugarije itangazamakuru ry’u Rwanda, bikaribuza gutera imbere ku ntambwe yifuzwa.

Ubukene buravuza ubuhuha

Kimwe mu bibazo bikomeye byugarije itangazamakuru ry’u Rwanda ni ubukene bukabije butuma haba ba nyir’ibitangazamakuru (cyane cyane ibyigenga) ndetse n’abanyamakuru babikoramo badasiba kuvuga ko gukora itangazamakuru ushaka impinduka z’imibereho yawe ari ibitangaza.

Ibi bigaragarira ku kuba umuntu ashobora gukora itangazamakuru imyaka isaga icumi ariko wareba ibyo yagezeho ugasanga bitagaragara uretse uburambe bw’igihe kirekire.

Ubukene bw’ibitangazamakuru kandi bugaragarira mu mishahara y’abanyamakuru kuri ubu badasiba kuvuga ko bahembwa intica ntikize ndetse tutibagiwe n’abakorera kubona amafaranga y’ingendo cyangwa na yo ntibanayabone.

Ikimenyetso simusiga cy’ubukene bwugarije itangazamakuru mu Rwanda ni ukuba bene gushinga ibitangazamakuru badasiba kwirukana abakozi, kubahemba make kandi batinze rimwe na rimwe bikanabaviramo kubambura, tutibagiwe gusubira inyuma no gufunga kwa bimwe mu bitangazamakuru byari bimaze gufatisha umurongo w’imikorere.

Muri uyu mwaka wa 2016, hari ibitangazamakuru byafunze imiryango birimo nka radiyo KFM yafunze ikurikira televiziyo ebyiri (Exalto TV na Yego TV) na zo zari zimaze gufunga imiryango, uku gufunga nta washidikanya ko gufite aho guhurira no kuba ababishinze barabuze icyo baje bashaka “ifaranga”.

Ubu bukene buturuka akenshi ku kuba ibi bitangazamkuru nta soko rifatika biba bifite bikuramo amafaranga yo kubibeshaho n’ababikoramo. Ubu mu Rwanda itangazamakuru ribeshwaho no kwamamariza abashoramari cyangwa kumenyekanisha gahunda runaka z’urwego uru n’uru, isoko umuntu atabura kuvuga ko ari rito cyane ugereranyije n’ibyo itangazamakuru rikeneye.

Indi mpamvu ni uko Leta ifata ingengo y’imari yagakwiye kugenerwa itangazamakuru ryingenga ikayisubiza mu mufuka binyuze mu bitangazamakuru byayo (Televiziyo na Radiyo by’igihugu.) no kuba amasoko menshi yo kwamamaza aturutse muri Leta akenshi ajyanwa mu bitangazamakuru by’igihugu.

Ikindi ni uko n’ubushobozi bw’abashora imari mu itangazamakuru na bo baba nta gishoro bafite gifatika kibafasha gukora mu gihe bagishabika amasoko abinjiriza ari na byo bituma bamwe babishinga bigatangirana ingufu ariko bigakora bisubira inyuma.

Ireme ry’ibitangwa n’itangazamakuru n’ubushobozi buririmo byose biracumbagira

Abanyarwanda bavuga ko “ujya kugaya impundu z’urushishi abanza akareba imisaya yarwo”. Kuba ubushobozi faranga buturuka mu itangazamakuru ari hafi ntabwo bifite aho bihurira n’ireme rigerwa ku mashyi ry’ibiganiro n’amakuru bitangirwa mu bitangazamakuru.

Ubu Afurika irashakisha uburyo yahangana n’ibitangazamakuru mpuzamahanga mu kuvuga inkuru zerekeye Afurika mu rwego rwo kugaragaza isura nyayo ya Afurika. Nyamara ibi birasa n’ibidashoboka ugereranyije n’ubushobozi bw’ibitangazamakuru bya Afurika.

Urugero, ni gake cyane wabona abanyamakuru bo mu Rwanda bajya gukusanya amakuru mu bihugu bituranyi, ahubwo buri gihe bategereza ko ibitangazamakuru mpuzamahanga bifite ubushobozi bikora hanyuma abo mu Rwanda bakavuga ibyo abandi banditse.

Ubumenyi n’ubunyamwuga bw’abarikora na bwo burakemangwa.

Ubusanzwe umuntu aba umunyamwuga nyawe mu mwuga runaka bitewe n’ubuhanga bwihariye afite mu gukora ibijyanye n’uwo mwuga, nyamara kuri ubu, umwuga w’itangazamakuru na wo usaba kuba umuntu afite ubumenyi buhamye mu mahame arigenga ubwaryo ndetse akaba anafite ubumenyi buhagije mu byo anyuza muri iryo tangazamakuru.

Urugero, ntibyashoboka ko uba umunyamakuru mwiza w’ubukungu ntaho wigeze wiga cyangwa ngo uhugurirwe ibijyanye n’ubukungu mu buzima bwawe, nyamara kuri ubu umuntu yisanga agomba gukora ibyo yumva n’ibyo atumva kuko hari ubwo aba ari we uhari gusa kuko ari we icyo gitangazamakuru kizabonera ya ntica ntikize.

Kuri ubu, itangazamakuru ryaragizwe umwuga udasaba ubuhanga runaka ahubwo usaba gusa ubushake no kwiyumvamo impano bityo umuntu akajya kurikora kuko abikunze gusa ariko nyamara urwo rukundo rudashobora kubyara ibiganiro cyangwa inkuru zifite ireme ryifuzwa.

Kugeza ubu mu Rwanda harabarurwa Radiyo ziragera kuri 35 zirimo umunani za Leta, Televiziyo zimaze kuba icyenda zikora harimo imwe ya Leta, ibinyamakuru byandika ku mpapuro bibarirwa muri 45, mu gihe ibikorera kuri internet ku buryo bwemewe n’amategeko birenga 80.

Nubwo uyu mubare usa n’ushimishije, ntibihagije kuko hanakenewe iterambere mu bashora imari mu itangazamakuru no mubarikora nk’umwuga wabo wa buri munsi.

Isesengura ry’uwanditse igitekerezo

Yisangize Inshuti.

Ibitekerezo

Tanga Igitekerezo