Perezida watutse Papa Francis na Obama ngo yihannye gutukana nyuma y’ubutumwa yita ko ari ubw’Imana

Perezida wa Philippine, Rodrigo Duterte

Prezida wa Philippine Rodrigo Duterte, yatangaje ko yahagaritse gutukana nyuma yo kuvuga ko yahawe ubutumwa buvuye ku Mana bubimubuza.

Perezida Duterte avuga ko ubu ubutumwa buvuye ku Mana yabuhawe mu iyerekwa igihe yari mu ndege mu rugendo rwerekeza mu Buyapani.

Perezida Duterte aherutse kwita Prezida Obama “umwana w’indaya” ndetse yongeraho ko Perezida Obama ashobora “kujya mu muriro utazima”.

Si Perezida Obama yatutse gusa kuko aherutse kwita umushumba wa kiliziya Gatorika Papa Francis “Umwana w’indaya” mu gihe iki gihugu kibariwamo abayoboke benshi b’idini ya Gatorika.

Yanatutse kandi Minisitiri w’ububanyi n’amahanga wa Leta zunze ubumwe za Amerika John Kerry amwita “umusazi” nyuma y’iminsi mike na bwo atuka Ambasaderi wa Amerika muri Philippine avuga ko aryamana n’abo bahuje igitsina ndetse amwita “Umwana w’indaya”

Amakuru dukesha BBC aravuga ko Perezida Duterte yavuze ko yari mu ndege, abantu bose basinziriye, nyuma aza kumva ijwi rimubwira ko niba adahagaritse gutukana indege ikora impanuka. Akimara kumva iryo jwi, Duterte yavuze ko ari iry’Imana kandi ko yayemereye ko atazongera gutukana.

Perezida Duterte yize ibijyanye n’amategeko, yaje kuba umushinjacyaha wa Repubulika mbere y’uko aba Meya wungirije uw’umujyi wa Davao igihe habaga ihirikwa ry’ubutegetsi bwa Ferdinand Marcos mu 1986.

Yaje kuba Meya w’uyu mujyi mu 1988, ndetse aba umwe mu ba meya bayoboye igihe kinini.

Mu gihe yari akiri Meya yamenyekanye cyane mu guhagarika bimwe mu bibazo byari byugarije abaturage b’igihugu cya Philppine birimo ubwicanyi n’imitwe y’abarwanyi batavugaga rumwe na Leta bituma umujyi wa Davao uba umwe mu mijyi yarimo umutekano.

Muri Gicurasi tariki ya 9, 2016 ni bwo Perezida Rodrigo Duterte yatorewe kuyobora igihugu cya Philippine.

Ni umugabo ukunze kuvugwaho udushya twinshi dore ko mu minsi yashize yatangaje ko intambara arimo yo kurwanya abacuruza ibiyobyabwenge ayigereranya n’intambara ya 2 y’isi yose.

Yavuze kandi ko ashobora kwica abacuruza ibiyobyabwenge bangana n’abayahudi Hitler yishe. Hitler yishe abayahudi miliyoni eshatu, mu gihugu cya Philippine habrurwa abacuruza ibiyobyabwenge bangana na miliyoni 3 akaba yaravuze ko azanezerwa naramuka abishe.

Yisangize Inshuti.

Ibitekerezo

Tanga Igitekerezo