Kigali: Umusore yasitaye aragwa ahita yitaba Imana

5

Abaturage bari benshi aho Nyakwigendera yaguye (uwicaye ufite icupa arimo kuririra mugenzi we basangiraga inzoga witabye Imana)

Mu gitondo cyo kuri uyu wa Gatanu tariki 19 Kanama 2016, umusore uzwi ku izina rya Nyaruzungu bakunze kwita Kizungu wari umukarani muri gare ya Nyabugogo yasitaye aragwa ahita yitaba Imana

Ibi byabaye ahagana saa mbiri n’igice za mugitondo cyo kuri uyu gatanu mu mudugudu w’Intiganda akagari ka Tetero mu murenge wa Muhima mu karere ka Nyarugenge mu mujyi wa Kigali.

Abaturage batuye hafi y’aho uyu musore yaguye ntibavuga rumwe ku cyaba cyateye urupfu rwe kuko hari abavuga ko ashobora kuba yishwe n’inzara iturutse ku kunywa inzoga ntabone ibyo kurya abandi bakavuga ko ashobora kuba yishwe no kuba yikubise hasi kuko ngo yari asanzwe arwara indwara y’igicuri.

Umwe mu bavuga ko Kizungu ashobora kuba yishwe n’inzara yagize ati: "Twabonye aza adandabirana aranyerera aragwa tubona arapfuye....byaba bishoboka ko wenda byaba ari n’inzara kuko anywa inzoga akenshi akaryama atanariye na byo byakurizamo urupfu"

Ku rundi ruhande hari abavuga ko uyu musore yari arwaye indwara y’igicuri bagakeka ko ari yo yaba imuhitanye.

Umwe muri bo yagize ati: "Ntabwo ari inzara imwishe rwose, ahubwo yajyaga arwara igicuri, yazaga tukamuha amafaranga yo kurya akajya kunywa amata, ejo nimugoroba ni bwo twavugaga ko tugiye gushaka umukuru w’umudugudu tukamushakira ikiciro cy’ubudehe tukamugurira mituweri tukamujyana kwa muganga, agiye asanga umukuru w’umudugudu ntahari, ariko ntabwo ari inzara imwishe kuko no mu gitondo bari bamuguriye amandazi"

Undi na we yagize ati: "Yari arwaye igicuri, ejo bundi yaraguye amara amasaha menshi arimo kugaragurika cyane ntabwo ari inzara imwishe"

Aba baturage bavuga ko uyu musore wari uri mu kigero cy’imyaka 35 ngo yari amaze igihe kirekire mu mujyi wa Kigali Kuko ngo yajyaga ababwira ko yavuye ahahoze hitwa Gikongoro afite imyaka umunani ndetse bakavuga ko kuva mu mwaka wa 2000 bamubona mu Muhima.

Kuri ubu umurambo wa nyakwigendera wajyanywe na polisi mu bitaro mu rwego rwo gusuzuma icyishe uyu musore.

Si ubwa mbere hagaragaye urupfu nk’uru rw’amarabira mu karere ka Nyarugenge kuko mu minsi ishize na bwo umukobwa wo mu murenge wa Nyakabanda na we yitabye Imana igitaraganya ubwo yari amaze kwitaba terefone.

Yisangize Inshuti.

Ibitekerezo 5

Tanga Igitekerezo