Menya amateka y’umunsi mpuzamahanga w’Amahoro

1

Inuma ifite ishami mu kanwa ni ikimenyetso cy’ubutumwa bw’amahoro

Mu Rwanda kimwe no mu bindi bihugu byo ku isi yose tariki 21 Nzeli 2016 hizihizwa umunsi mpuzamahanga w’Amahoro.Insanganyamatsiko y’uyu munsi muri uyu mwaka izibanda cyane ku gukangurira urubyiruko kugira uruhare mu mu mahoro n’iterambere rirambye.

Impamvu nyamukuru yo kuwizihiza ni ukugira ngo hazirikanwe imbaraga z’abantu bose baba barakoze cyane kugira ngo barangize amakimbirane bagamije kuzamura umuco w’amahoro.

Umunsi mpuzamahanga w’amahoro kandi ni umunsi wo kurangiza ibibazo biboneka hagati y’abantu ubwabo cyangwa se ibibazo bigaragara muri Politiki.

Ese ni iki gikorwa ku munsi w’amahoro?

Urubuga Timeanddate.com ruvuga ko ku munsi mpuzamahanga w’amahoro abantu batuye isi yose bagira uruhare mu bikorwa bitandukanye ndetse hagategurwa ibirori byibanda ku nsanganyamatsiko y’uwo munsi. Ibi birori bishobora kuba ibikozwe mu buryo bwigenga cyangwa se inama zitandukanye ziteraniramo abantu benshi baganira ku mahoro.

Inkomoko y’umunsi w’amahoro

Imyanzuro y’inama y’umuryango w’Abibumbye (UN) yashyizeho umunsi mpuzamahanga w’Amahoro mu 1981 bihuzwa no gufungura ku mugaragaro inama rusange y’uyu muryango. Uyu munsi wizihijwe bwa mbere mu 1982 kuva ubwo watangiye kujya uba tariki 3 Nzeli buri mwaka kugeza mu 2002, ubwo hemezwaga ku mugaragaro itariki ndakuka yo kwizihiza uyu munsi mpuzamahanga w’amahoro ari 21 Nzeli buri mwaka.

Ubwo uyu munsi wemezwaga ku mugaragaro UN yawushyize mu nshingano zayo ndetse itangira gushishikariza abaturage gukorera hamwe bagamije kugera ku ntego yo gusakaza amahoro ku isi.

Kuva ugiyeho wahinduye byinshi ndetse uzana impinduka mu iterambere rigamije amahoro, umaze guteranya ibihumbi n’ibihumbi by’abaturage ndetse iminsi mikuru myinshi iwizihiza, yagiye itegurwa.

Kuki inuma ifatwa nk’ikimenyetso cy’umunsi w’Amahoro?

Inyoni yo mu bwoko bw’inuma ifite ishami mu kanwa kayo ni ikimenyetso gikoreshwa cyane kuri uyu munsi. Mu myemerere y’Abayuda(Judaism), Abakirisitu n’abayisilamu inuma yera ni ikimenyetso rusange cy’amahoro. Inuma ishobora nanone kugaragaza icyizere, amahoro cyangwa amahoro atangwa n’umuntu ku w’undi.

Inuma igurukana ishami mu kanwa ni uburyo bwo kwibutsa abaturage akamaro kayo mu gutwara ubutumwa bwiza bityo bikabera isomo abaturage batuye isi mu kugira uruhare mu gukwirakwiza amahoro.

Insanganyamatsiko y’uyu munsi w’amahoro muri uyu mwaka ni ukubaka umusingi w’amahoro: uruhare rw’urubyiryuko mu guharanira amahoro n’iterambere birambye.

Yisangize Inshuti.

Ibitekerezo 1

Tanga Igitekerezo