Yakubiswe n’indoro, ishinya n’inyinya by’umukobwa abura amifato (igice cya Mbere)

28

Burya koko wamenya ubwoko bw’ururabo ukirukubita ijisho ariko ntushobora kumenya ibara cyangwa impumuro yarwo igihe rutarapfundura ururabo ngo rugaragare. Ibi nibyo byabaye kuri KAYITARE kuva ubwo yinjiraga muri kaminuza.

Nk’abandi bose Kayitare yasoje amashuri yisumbuye ariko ntibyamukundira gutsindira ku manota meza ngo akomeze kwiga muri kaminuza ya Leta. Nibwo yaje gufata inzira ajya gushaka umwanya muri kaminuza ya EAST AFRICA UNIVERSITY(EAU) iyi akaba ari imwe muri kaminuza zigenga iherereye mu ntara y’iburasirazuba mu karere ka Nyagatare.

Uyu musore yakiriwe neza nk’abandi banyeshuri bose, ariko igihe yari mu nzira isohoka mu kigo, yari ahuze mu mutwe cyane yibaza byinshi dore ko atari azi ibijyanye n’icyo kigo yari agezemo bwa mbere, yibazaga kandi ukuntu atandukanye n’inshuti ze akaba asabwa kurema izindi ahongaho akibaza aho azahera bikamuyobera.

Mbese mu mutwe we hari huzuyemo ibibazo byishi ku buryo yagendaga areba hasi ameze nk’utabona mbese ayobowe n’umutima gusa.

Muri iyo Nyanja y’ibitekerezo byishi KAYITARE ntacyo yari kwitaho na mba ku buryo n’uwari kumukoza urutoki mu jisho atari kurubona! ariko muriyo nzira ye imbere haje guturuka umukobwa atigeza aca iryera cyokora Kayitare si we wenyine utararebaga kuko uwo mukobwa na we yari yarangariye kuri WhatsApp mbese agenda mu nzira atareba igiturutse imbere.

Muri telephone y’uyu mukobwa aho bandikira ubutumwa bwa WhatsApp hari handitsemo ngo:”JMV wihangane wayohereje nkiryamye kandi mbyutse nsa n’uwakerewe ubwo nimva mu ishuri ndaguhamagara umbwire aho nkusanga kandi wakoze cyane”

Ako kanya Kayitare yagiye kumva yumva agonganye n’umuntu, umwe agwa nk’iriya n’undi biba uko. Gusa bose bahise baseka maze kayitare ahaguruka yihuta ajya kubyutsa umukobwa wari waguye hirya gatoya muri borodire, maze uwo mukobwa ahereza akaboko Kayitare ngo amwegure, yari umukobwa ushyitse munini rwose uwavuga ko yari umwari wanyoye inka ntiyaba abeshye.

Ubwo Kayitare yafashe akaboko yegura uwo mukobwa maze amaze kumwegura n’udusoni twishi uwo mukobwa ati “Urakoze kandi umbabarire nari narangaye nshiduka twagonganye”.

Kayitare na we ubwo uko uwo mukobwa yavugaga yari yatwawe kuko yarebaga uburyo uwo mwari afite inyinya nziza n’agashinya keza k’umukara maze Kayitare ati “nta kibazo rwose ahubwo njyewe umbabarire kuko nakabaye nakubonye mbere ntitugongane.”

Ubwo uko bavuganaga uwo mukobwa yari yataye isakoshi ye hasi maze Kayitare akebutse hirya arayibona akijya kunama ngo ayizane abona irangamuntu n’udusokozo biraguye kuko iyo sakoshi yari yaguye ifunguye, maze afata igisokozo agisubizamo afata n’irangamuntu ngo ayisubizemo ariko abanza kurebaho asanga uwo mukobwa yitwa KAYITESI Valerie, maze Kayitare ati “eeh mbese witwa Kayitesi? Undi nawe ati “yego nyine nitwa Kayitesi Vava” hari aho wari unzi se ko bigutangaje? Kayitare ati “oya da, ahubwo wenda kwitiranwa nanjye kuko nitwa Kayitare”

Ubwo bavuganaga ibyo Kayitesi ari arimo gufunga isakoshi ye neza arangije abwira Kayitare ati “sha murakoze reka njyende ngiye kureba ushinzwe abanyeshuri mfite ibibazo by’amanota. Ese ubundi usanzwe wiga hano ko mbona ari ubwa mbere ahari nkubonye?

Kayitare na we ati: “oya naje kwiyandikisha mu mwaka wa mbere hano.”

Kayitesi ati:”mbega ukuntu ari byiza kugira umusore nkawe mwiza muri poromosiyo yo muwa mbere! Sha ubundi njyewe ubu ngiye kujya mu wa kabiri ariko usanga abasore biga hano biyemera nta n’icyo biyemerana none reba umusore mwiza nkawe wambaye inkweto nziza mbese uhagaze neza mu bandi ukuntu aba yicishije bugufi?

Ayo magambo yatunguye uyu musore cyane yumva biramushimishije kumenyana n’umukobwa umwishimiye gutyo maze aramubwira ati “none se Kayite wampaye nimero yawe niba bitakugoye ko wenda ejo bundi ninza gutangira uzamfasha kumenyera ikigo?

Undi nawe ati “Humura rwose sinayikwima zana telephone”.Kayitesi ubwo amaze guha nimero Kayitare yahise amwegera amusoma ku itama ati “sawa bayi ubwo urampamagara mbone iyawe.”

Sixbert Murenzi

Yisangize Inshuti.

Ibitekerezo 28

  1. 1 | 2 | 3

Tanga Igitekerezo