Yabeshye ababyeyi ko agiye gushaka umushinga, yigira mu bagabo (igice cya gatatu)

5

Mu gice cy’iyi nkuru "INKOVU Z’URUKUNDO" cyarangiye Eugenie atumva neza ubutumwa Tycoon yari yamwoherereje amumenyesha ko iby’urukundo rwabo byarangiye, ese byaje kugenda gute?

Sunny amaze kumugira izi nama nibwo Eugenie yahise amubwira ati “Sha njyewe ejo sinzaza ku ishuri nzaza muri kindi cyummweru kuko papa yambwiye ko nta mafaranga afite ngo yari azi ko umushinga nari nagiye gushaka nawubonye bituma adashyiraho ingufu zo kuyashaka, ubwo rero naboneka nzaza.”

Eugenie amaze kuvugana na Sunny yasigaye yivugisha ati “Ese ubundi Tycoon arantesha umutwe nka nde? Nagende nzasigarana na Peter wanjye we ufite amafaranga ureke uriya mutindi urutwa n’imbeba yo mu rusengero nako nibe nayo irya ibirago! Nashaka agende.”

Mu gitondo cya kare Tycoon yafashe telephone ya se ngo ahamagare Furaha amubaze uko mama we amerewe bityo amenye niba ajya no ku ishuri ariko kubw’amahirwe make telefone ntiyacamo maze afata umwanzuro wo kwigendera wenyine.

Mu ma saa saba nibwo tycoon yasesekaye mu kigo. Abanyeshuri yahasanze baratunguwe kuko yari asanzwe aza bwije.Bony umwe mu basore bagendanaga ku ishuri, yasanze yahageze kare nuko atangira kumusereza agira ati “Tycoon ko uje ku manywa iwanyu babasohoye mu nzu?

Bony yavugaga gutya atebya ariko atungurwa no kubona Tycoon atishimye namba, ndetse akabona atanamwitayeho Na gake niko kumwegera amubaza icyo yabaye,
- Muvandi bite ko mbona utameze nk’ubusanzwe?

- Byihorero Bony, Eugenie yaransajije pe ku munsi w’abakundanye yambeshye ku nsura ndamutegereza ndamubura.

- Hhhhh! Icyo nicyo cyagutesheje umutwe?

- Ndeka sha! Uranyumva nabi, nuko utazi uko ejo byangendekeye rero! Nahuye n’umumotari , turaganira ambwira ko akundana na Eugenie, ariko ibyo nta kibazo nababajwe cyane nuko yambwiye ko Eugenie yagiye kumusura ku munsi wabakundanye akanamuraza bagakora urukundo inshuro zishoboka mugihe njye ataranansoma ku itama, byongeye akaba yaragiye yo umunsi twari twasezeraniyeho guhura, urumva ako gahinda wowe wakihanganira Bony? Sha Peter yarabimbwiye mpita ngwa muri koma kuburyo naje guhembuka nyuma y’igihe kinini.

-  Yoo! ihangane disi! gusa ntuhangayike abakobwa ni benshi reka umuswa kandi umwibagirwe burundu, abakobwa bagukeneye hano ni benshi. Sha njye nari mfitanye gahunda na Kabaju yo kuzinduka tugahurira ahangaha abanyeshuri bataraza kuko yambwiraga ngo arankumbuye cyane niyo mpamvu nariraye twageze aha saa tatu!

- Ndabyumva ubu mwaryoheje?

- Eeh! bimwe bikaze umwana yampobeye neza numva ndapfuye kuburyo twashidutse tubikoze tutabiteganyije...

- Eeh! ubwo se nta soni, mwabikoreye he?

-  Jya wigira umwana! twagiye inyuma y’amashuri kandi byari byoroshye kuko nta banyeshuri benshi bari bakagera ...sinibutse n’agakingirizo ariko ubanza nabo baba badukumbuye nkurikije ukuntu yanyihaye wese ?

- Umva sha! baba badukumbuye ariko se kunteye ubwoba Bony, ubwo uramutse wamuteye inda niba mwakoreye aho. Ibaze kwitwa umugabo wiga mu mwaka wa Gatanu?

- Eee! ariko uziko bishoboka, nyibutsa kubara ukwezi k’umugore nabonye wowe ubizi menye niba namuteye inda mushakire ibinini bibuza gusama hakiri kare kuko yambwiye ko uyu ari umunsi wa munani uhereye igihe yaboneye imihango.

- (Abanza kwiyumvira)...ndumva nta kibazo kuko intanga ngore twize ko isohoka ku munsi wa cumi na kane uhereye igihe waboneye imihango bityo bakavuga ko guhera ku munsi wa cumi kugeza ku munsi wa cumi na gatandatu umugore wese ufite ukwezi kudahindagurika atagomba gukora imibonano mpuza bitsina idakingiye kuko yahita asama.

- Imana ishimwe wari unteye ubwoba pe!Ese amakuru ya Furaha mwana ko maze iminsi muhamagara nkumva inimero ye itariho? Simuturanye?

-  Sha uziko nari nibagiwe! Twahugiye mu bakobwa nibagirwa kukubwira ko Furaha amaze iminsi arwaje mama we kandi ararembye cyane ahubwo tujyane hanze dushake telefone tumuhamagare tumenye amakuru ye niba azaza vuba cyangwa azatinda kuko nanjye ntiduheruka kuvugana.

- Sha hariya nazanye agafone reka tumuhamagare twumve amakuru ye ,gusa disi yihangane!

Bakimuhamagara, Furaha yitabye fone ariko ntiyavuga hashize umwanya muto arakupa, Tycoon na Bony bayoberwa ibibaye bakeka ko ari ikibazo cy’umurongo w’itumanaho maze bongera guhamagara bwa kabiri noneho bitabwa na mushiki wa Furaha witwa Akariza Chantal, bakimubaza amakuru yahise ababwira ati “Sha twagize ibyago mu gitondo cy’uyu munsi mama wacu yitabye Imana ubu umurambo uri kwa muganga tuzashyingura ejo.”

Tycoon na Bony bahise bagwa mu kantu, babura ayo bacira n’ayo bamira kuburyo hashize iminota nk’itanu ntawe uvugishije undi, nuko nyuma Tycoon ati”sha nta kundi wa mugani wa wa musizi inzira ya muntu ni uruziga twese dufite yo ikibanza bityo umuvandimwe Furaha yihangane.”

Bony nawe yahise avuga ati “Reka tujye gutembera ku kibuga tube tubyiyibagijeho gato buriya ejo nzabibwira abanyeshuri bose hanyuma dusabe uruhushya abazemera tuzajyana kumutabara nta kundi ni inshuti yacu.”

Bakigera ku kibuga baricaye baraganira barimo batangarira igipangu gishyashya ikigo cyari cyujuje inyuma y’amashuri abanyeshuri bo muwa Gatunu bigagamo dore ko ayo mashuri yari anaturanye n’ikibuga cy’umupira w’intoki (basket) ndetse n’icy’umupira w’amaguru.

Bakiganira bagiye kubona babona Sunny arahingutse afite amakaye mu ntoki yari ajyanye mu ishuri. Uyu mukobwa akibakubita amaso yaje asimbukira hejuru ahita ahobera Tycoon kuburyo hagati yabo n’uwari gucishamo urushinge rutari kubona inzira! Maze aramusoma biratinda kuburyo wabonaga nta gitekerezo cyo kumurekura afite.

Tycoon na Bony bo byari byabayobeye kuko uyu mukobwa yari azanye udushya batamumenyereyeho, nuko nyuma yo guhobera Tycoon, Sunny ahobera na Bony ariko bidashamaje maze ahita akurura akaboko ka Tycoon ngo bajyane mu ishuri amuherekeze ajyane amakaye, maze Bony wakundaga gutebya cyane ahita avuga ati “Sha nzabarega si ndi akabati k’amagambo ubwo mubonye nyir’urugo adahari none mugiye kurugenza uko mwishakiye! Tycoon wari umenyeranye na Bony cyane aramusubiza ati sha Bony reka mugeze mu ishuri ndahita nza ndagusanga aho cyangwa uze tujyane niba ugize ishyari!

Soma:Yabeshye ababyeyi ko agiye gushaka umushinga, yigira mu bagabo (igice cya Kabiri)

Yabeshye ababyeyi ko agiye gushaka umushinga, yigira mu bagabo (Igice cya Mbere)

Sixbert Murenzi

Yisangize Inshuti.

Ibitekerezo 5

Tanga Igitekerezo