Yabeshye ababyeyi ko agiye gushaka umushinga, yigira mu bagabo (igice cya 7)

11

Mu gice giheruka Sunny yari atunguye Eugenie amufata amusomera urupapuro yandikiwe n’umukunzi we Tycoon, ese byaje kurangira gute?

....N’isoni nyishi zivanze n’ikimwaro yahise asingira Eugenie baratukana cyane bararwana biratinda ariko abandi bakobwa bari bari kumesera hafi aho bahise baza barabakiza bitaragera kure.

Gusa nta muntu n’umwe wigeze amenya icyo bapfaga ndetse nta n’umuyobozi w’ikigo wamenye amakuru y’ibyabaye ndetse abanyeshuri babakijije bibazaga ukuntu abakobwa bari incuti basubiranyemo bikabayobera. Guhera uwo munsi Sunny na Eugenie ntibongeye gucana uwaka bapfuye Tycoon.

Sunny wari uzi cyane kwita ku mukunzi we Tycoon, bahise batangira ubuzima bw’urukundo bweruye kuko Eugenie yari yamaze gutahura ukuri kose kuri hagati ya Sunny na Tycoon.

Guhera ubwo bajyaga kurya bakajyana,muri kantine bakaba bari kumwe, mu ishuri bakirirwa basomagurana ndetse akenshi iyo baguraga za biswi umwe yarahekenyaga agacira mu kanwa ka mugenzi we, baba bari kurya bombo ntibigore banyunguta ahubwo umwe akanyunguta agacira mu kanwa ka mugenzi we kuburyo abababonaga babafataga nk’abasazi mu rukundo.

Urukundo rwabo rwaje gukomera kuburyo nta kindi kiganiro wasangaga mu banyeshuri uretse urukundo rwa Sunny na Tycoon rwari rwarabaye ak’abarore ariko iyo wabazaga umwe muribo iby’urukundo rwabo yaguhakaniraga yivuye inyuma ko aziranye n’undi bidasanzwe.

Nyuma y’ibyumweru bitatu urukundo rwabo rwari rumaze gukomera cyane mu kigo, ariko baje kugwa mu kantu ubwo FURAHA yagarukaga ku ishuri mu cyumweru cya kane uhereye umunsi abandi batangiriyeho, kuko buri wese yibazaga ukuntu bagiye gukundana na Furaha abibona bikabayobera.

Furaha we akigera ku ishuri nta kindi abanyeshuri bamusanganije uretse kumubwira ko Tycoon yamutwariye umugore, ariko bitewe n’ukuntu Furaha yari incuti cyane na Tycoon yanze kubyemera n’ubwo mu rundi ruhande yabonaga Tycoon yarahindutse cyane atakimwitayeho ndetse atagishaka ko baganira byishi.

Hashize iminsi mike Furaha wacishaga make cyane yahamagaye Tycoon bicarana munsi y’ishuri aramubaza ati “Muvandi, ko inkuru yabaye kimomo ngo urimo gutereta Sunny bimeze bite? Uziko ugira ibanga burya?ubwo iyo umpa amakuru koko? Ko ubizi ko nakubwije ukuri ko njye nawe twatandukanye kuki wowe wampishe koko? Kandi ntumpakanire ngo barabeshya kuko biragaragara ko wowe nawe mumeranye ukuntu!”

Tycoon ati:“ Furaha urabizi twabanye igihe kinini kuva no mu cyiciro rusange nta wigeze abeshya undi cyangwa ngo amuhemukire, bityo rero sinakubeshya niyo mpamvu nshaka kukubwiza ukuri. Urabona ubwo wari umaze gutandukana na Sunny, yaraje ansaba ku muba hafi ngo ataziheba kuko yashakaga umuntu uzajya umugira inama ngo ndetse uzanamufasha no guhitamo indi nshuti nk’umuvandimwe we, ni muri ubwo buryo rero batubonana bakavuga ngo turakundana ariko rwose gira umutima utuje sinaguca inyuma pe! Ahubwo abo ni abashaka kuduteranya njyewe nawe, ahubwo buriya igihe ndi kumwe na Sunny ntukamvugishe ngo biramuhungabanya”.

Furaha wari intama y’Imana yahise yemeye amagambo ya Tycoon nk’ukuri maze abwira mugenzi we ati “sha noneho ndabyumva ni kwa guteranya kwa rubanda kandi ni akazi kabo ntibanteranya n’umuntu twamenyanye kera”.

Tycoon ati: “nibavuge bazaruha ntibazi ko iyo abavandimwe bavumbitse akarenge uvumburamo akawe! Ubwo bakubwiye ubusutwa baziko baduteranya ntibazi ko byabagora.”

Nyuma y’icyo kiganiro Tycoon yabeshyemo inshuti ye we,umutima wakomeje kumurya niko kwigira inama yo kubiganirizaho mugenzi we Bony dore ko ariyo nshuti yari asigaranye bumvikana cyane ndetse bahuje n’ingeso zose, ariko hashira iminsi yarabuze aho yahera.

Mu gitondo kimwe Tycoon na Bony babyutse batinze bagiye koga Babura indobo biba ngombwa ko barindira abandi bakarangiza koga kuburyo byaje gutuma bo boga nyuma y’abandi bityo isaha zo kujya mu ishuri zigera batarambara bituma abayobozi babafungiranira mu macumbi bararagamo.

N’ubwo Bony yari ababajwe no gusiba gusubiramo amasomo ya mugitondo, Tycoon we yari abonye akanya keza ko kumuganiriza ikimuri ku mutima akanamugisha n’inama amubwije ukuri kose nta na kimwe amukinze.

Ni uko Tycoon aratangira ati “Sha Bony ubu uko undeba mfite ibibazo byenda kumena umutima! Bony ahita amuvugiramo ati: “bya Eugenie se kandi? Kugera ubu utaramwibagirwa koko?”.

Undi ati “oya si ibyo kuko we sinzi niba akinabaho, ahubwo nkimara gutandukana na we, Sunny yaraje ambwira ko ankunda cyane, ngo ndetse yifuza kureka Furaha tukikundanira, yongeraho ko n’ubwo nabyanga we azahora ankunda! Sha nta ntakubeshye uwo umunsi yansezeranije ko ndamutse mukunze nta na kimwe nazamuburana ndetse ahita ampa n’ikimenyetso gikomeye cyane cyo kuryamana nanjye, sha ubwo nahise ndaruka burya ubona nza kuryama natinze akenshi nibyo tuba turimo, mbese sinkikumbura imibonano kuko meze nk’umugabo ufite umugore kandi ibyo byose abikora ngo anyereke urukundo naburiye kwa Eugenie.

Ntakubeshye rero, nanjye nisanze narumwemereye,ariko icyo si ikibazo ahubwo ikibazo ni uko abantu bose batangiye guhwihwisa ko jyewe na we turi inshuti maze bituma ejobundi aho Furaha agarukiye ku ishuri ampamagara aranyicaza arabimbaza byose ashingiye ku makuru yumvaga ni uko mubeshya ko iyo ndi kumwe na Sunny mba mugira inama ngo mufashe kwakira ko batakiri inshuti, ariko ntakubeshye Sunny arankunda kandi najye numva nsigaye mukunda nk’uwasaze n’ubwo nta n’ukwezi kurashira tubitangiye ariko muri njyewe namwiyeguriye wese kandi byanga bikunda Furaha azabimenya, none ngira inama nkore iki?

Ubwo Tycoon yavugaga ibi Bony yari amutumbiriye atavuga maze Tycoon amaze kuvuga Bony yiyumviraho gato niko guterura aravuga ati “Rero nshuti nta na kimwe wakora ngo uzimye umuriro wamaze kwaka uretse guhungira kure yawo, ni muri urwo rwego nta na kimwe wakora ngo unezeze rubanda, kandI baravuga ngo mbere yo gutabara undi banza witabare,none niba koko ukunda uriya mukobwa kandi nawe akaba agukunda, wicika intege mukunde ikiba kibe,niyo Furaha yamenya ukuri nta kibazo kuko n’ubundi baratandukanye nta n’icyizere ko basubirana, njyewe rero ndumva adateze kukuziza ko ukundana n’uwo batandukanye?ese ubundi azaba yabibwiwe n’iki kereka wowe ubimubwiye? Kandi wibuke neza ko yatubwiye ko ari uwo kuryoshya gusa atanamukunda?

Bony akimara kuvuga atyo Tycoon yahise yiruhutsa kuko yarabonye byibura umurema agatima akanamushyigikira mubyo we yitaga amakosa yo guhemukira mugenzi we Furaha Manzi.

Amasomo ya mugitondo yaje kurangira abanyeshuri bajya kurya, nuko Irabaruta wiganaga n’abo bahungu aza yiruka abaririza Tycoon kubw’amahirwe amusanga ku gitanda, ni uko amuhereza agapapuro kasaga n’iroza handikishijeho ikaramu nziza isohora umuti uhagije y’umukara, kakaba kari kanditse mu mukono mwiza cyane akikabona amenya ko ari Sunny wamwandikiye maze agasomana na mugenzi we Bony dore ko ntacyo yari akimuhisha kuko yari yamubwije ukuri kose. Kari kanditseho ngo:

Yambii mutima wanjye!

Ubu umutima wanjye ugoswe n’inkongi y’umuriro ugurumana, ubwenge bwanjye bwo bwibagiwe buri kimwe kiri ku isi hose uretse isura yawe kuko ariyo ingarukamo na nijoro ndyamye!

Sha naraye ndose twicaranye hahandi dukunda kwicara ku ntebe y’inyuma urimo kunsoma sha! ngo nuko numva nishimye cyanee, ariko nababajwe nuko naje mu ishuri numva nkukumbuye byo gupfa nageramo nkahita nkubura.

Sha nahise mbura amahoro n’ubu sinigeze niga icyakora nigiriye inama yo kukwandira aka kabaruwa.

Gusa umenye ko hashize iminota icumi nta kubonye waza kunsanga kwa muganga, ni akazi kawe rero niba ushaka amahoro ngwino undebe kuko ndagukunda kandi ndagukumbuye.sha sawa rero banguka nongere nishime nkureba maze unzimirize uyu mutima ugurumana ukumbaza! Sawa kandi ndagukunda cyaneee!

Uwawe iteka ryose!

Ikirabo Sunny Tycoon!

Bony na Tycoon bakimara gusoma ibi basekeye icyarimwe maze Bony aravuga ati “fatiraho rero umwana yarahengamye!si ibanga sindabona umukobwa ufite urukundo rungana rutya!”ni uko Tycoon asohoka yiruka yerekeza mu ishuri bigagamo yagenderaga mu kirere kuburyo n’iyo asitara Atari kubimenya kuko amaso y’umutima we yari kuri Sunny yakundaga by’agahebuzo.

Kubw’amahirwe siwe warose ageze mu ishuri maze asanga Sunny arimo gukoropa we n’abandi bagenzi be maze n’ibinezaneza byishi Sunny ahita aza aramuhobera amusoma ku itama nk’ibisanzwe ariko kuko Sunny yangaga ko abo bakoranaga isuku bamubona nabi yahise abwira Tycoon ati “Ihangane nkore isuku mutima wanjye, buriya turaza kuganira nijoro muri ya masaha yo gusubiramo amasomo naho ubu byagaragara nabi.”

Ku mugoroba ubwo abandi banyeshuri barimo gusubira mu masomo, Tycoon wari n’umwe mu bagize komite y’abanyeshuri mu birebana n’itangazamakuru mu kigo yahise ajyana Sunny mu cyumba bateguriragamo amakuru dore ko ari nawe wabikaga urufunguzo rwaho, icyo cyumba bateguriragamo amakuru cyari giherereye ahagana mu gikari ku ruhande abayobozi b’ikigo batitagaho cyane ariko nanone aha niho abanyeshuri bakundaga gutoroka banyuze kuko hari igipangu kigufi babashaga gusimbuka bitabagoye bakagwa hanze, ni uko Sunny na Tycoon binjira muri cya cyumba ndetse bacana n’amatara kuko bari bazi ko nta muyobozi w’ikigo ujya upfa kugera muri ako gace.

Bakimara gufunga ntibaruhije bitinzatinza ahubwo utwambaro tw’imbere twa Sunny, Tycoon yahise atujugunya nk’iriya maze batangira gukora urukundo we na mushuti we.

Barangije ibyo bari barimo Tycoon yakoze mumufuka akuramo bombo maze batangira kuyinyungutira mbese umwe akanyungutira ahereza undi gutyo gutyo. Ubwo bari muri ibyo amasaha yo kujya kurya ifunguro rya nijoro yari yageze kare ntibabimenya na ba Bony bategereje Tycoon kuko bariraga hamwe baramubura aho bagiriyeyo basanga bakerewe bafunze kare niko kwigira inama ikiri Bony,Irabaruta, Furaha ngo bajye gushaka icyo kurya hanze y’ikigo.

Ni uko aho bagarukiye bajya gusimbuka ikigo hahandi ba Tycoon bari bibereye, ubwo habanje kwinjira Bony ngo acungire abandi, hakuriraho Irabaruta, nyuma haza Furaha Manzi wanasanze ba Bony bagiye. Ariko akimara gusimbuka yumvishe abantu bajujura muri ya nzu Tycoon yari arimo maze agira amatsiko yo guhengereza ngo arebe ibirimo imbere ahita abona ni Tycoon uri gusomana na Sunny byacitse.

Yahise yigira mu ishuri n’agahinda keshi nk’umuntu bateye icyuma yibaza ukuntu Tycoon ariwe wakora ibyo n’ukuntu yamwizeraga akanibuka uburyo yabimubajije akamubeshya, ibyo byose ni byo yatekereje ku gera isaha ya kabiri yo gusubiramo amasomo yose irangiye .

Tycoon n’umukunziwe bo bari batwawe kuburyo umuzamu w’ikigo yaje agasanga bakorakorana, basomagurana mbese bibereye mu isi yabo gusa, akibabona yahise ajya guhuruza perefe ngo aze arebe ibyoTycoon arimo............

Sxbert Murenzi

Yisangize Inshuti.

Ibitekerezo 11

  1. Tycoon ni kongwe kbs. Bizarangira ateye ka Sunny inda tu. Perefet we arabirukana nkurikije uko twe school byagendaga. Sawa mukomeze muduhe kbs..... Amatsiko ni menshi!!! ¡¡¡

  2. 1 | 2

Tanga Igitekerezo