Yabeshye ababyeyi ko agiye gushaka umushinga, yigira mu bagabo (Umwandiko muremure)

7

Inkuru yitwa ’INKOVU Z’URUKUNDO’. Igizwe n’ibice bitandukanye n’abakinyi batandukanye, iyi nkuru kimwe n’izindi zizajya zisohoka mu byiciro (series) kugeza zirangiye.

IGICE CYA:1

Baca umugani ngo uwarose nabi burinda bucya, ariko burya uwaraye nabi we ntajya agoheka na mba! Tariki 14/02/2011 umwari Icyirabo Sunny yaraye akanuye ageza saa munani z’ijoro ataragoheka. Si uko uko Atari yaryamye, ahubwo we yari yageze mu buriri isaa mbiri z’ijoro dore ko ari nayo saha iwabo bari bakunze kuryamiraho.

Nyuma y’agahinda kenshi cyane no kwitsa imitima ndetse no kwimyoza bya buri kanya nibwo yaje kwigira inama yo guhamagara Tycoon , umusore biganaga ku rwunjye rw’amashuri rwa Gitarama ngo nibura amubaze amakuru ya MANZI Furaha wari umukunzi we kuko umunsi wose wari ushize Furaha yakuye telefone.

Niko guhamagara Tycoon kuko we yari n’inshuti magara ya Furaha , basangiraga akabisi n’agahiye.

Mbere y’uko Icyirabo ahamagara Tycoon, yabanje kubitekereza cyane arwana n’umutima yibaza ukuntu ari butinyuke agakangura umuntu byongeye badakundana muri iryo joro bikamuyobera, rimwe agashaka kubireka undi mutima uti bikore, ariko nyuma aza gufata umwanzuro wo kumuhamagara zigakamwa ayo zitahanye!

N’igihunga cyinshyi afata telephone ye ashakishamo izina TYCOON, ntibyamutindiye kuribona kuko niwe wenyine watangizwaga n’inyuguti ya T muri telefone ye, bityo akimugeraho yahise ahamagara yiteguye guhita amusaba imbaabzi ko amukanguye, ariko mugihe agitekereza ibi, yatunguwe no kumva inimero ya Tycoon ari kuyivugiraho iryo joro! ariruhutsa ati ’Nibura ntari buvuge ko mukanguye!, ariko kuko uyu mukobwa yagiraga ikinyabupfura yahise akupa bwangu ngo Tycoon abanze avugane n’uwo bari kuvugana maze we baze kuvugana ubwo Tycoon araba arangije.

Icyo atamenye ni uko Tycoon yari arimo kuvugana n’umukunzi Icyirabo, akaba n’inshuti idasanzwe ya Tycoon uwo akaba ari MANZI Furaha. Dore ikiganiro bagiranaga:

- Bite se munywanyi? ko wiriwe wakuye telefone ku murongo? Cyangwa wari watemberanye n’umukunzi kuri uyu munsi mwangaga ko tubarogoya?

- : Byihorere sha!nyir’imyaku arara yoze akaramukana uburimiro! Kandi yarara maso akaramukana ingonera!

- Ye! Ko unjimije muvandi?

- Ni iki utumva se ? sha nyine ejo hashize mu ijoro hagati twahuye n’ikibazo na n’ubu kigikomeje kandi gihangayikishije..., Akivuga atyo telefone iracika nuko Tycoon ahita yongera ngo amuhamagare bwangu yumve neza icyo mushuti we yashakaga kuvuga ariko inimero ye yayigerageje inshuro ebyiri byanga niko kubyihorera ariko yibukako hari umuntu wamuhamagaye ubwo yavuganaga na Furaha ntabashe kumufata, arebye asanga ni umukunzi wa Furaha, Icyirabo wahoze amuhamagara, niko kwivugisha ati”ubuse uyu arambwira iki ra?nari ngizengo ni wa muhemu Eugenie! Sha ndumva bimbabaje kuba telefone idutengushye nta bwiye Furaha akumiro nahuye nako ngo numve n’inama angira.

Tycoon yavugaga ibi kuko yari afite agahinda yatewe n’umukunzi we Eugenie bigaga ku kigo kimwe gusa Eugenie we yigaga inyuma yabo ho umwaka. Uyu mukobwa yari yasezeranyije Tycoon bari bamaranye amezi atanu kumusura iwabo kuri uwo munsi w’abakundanye ariko Tycoon atungurwa no guhera mu gitondo amutegereje inkoko zigataha atamubonye yewe n’inka zikarinda zinikiza atanamuhamagaye mugihe Tycoon yari yahamagaye uyu mukobwa incuro cumi n’enye nta muntu umwitabye! Ibi bikaba byari byarakaje uyu muhungu cyane kuburyo yashakaga kugisha Furaha inama yo kureka uyu mukobwa kuko akenshi bahoraga batongana bapfa ubusa ariko ikifuzo cya Tycoon telefone yacitse batakiganiriyeho we na Furaha.

Mu gihe Tycoon yari akiri mu majune ako kanya nibwo Icyirabo yahise yongera arahamagara ngo yumve ko Tycoon yavuye kuri telefone k’ubw’amahirwe Tycoon ahita yitaba telefone ya Sunny!

- Komera Sunny wacu? Amakuru y’uyu munsi w’agahebuzo se kuri mwe mufite abo mukundana?

- Abakundanye? Urakoze! Gusa nti wongere kumbwira ibyo niba udashaka kunyangiriza umutima kand ibyawangije n’ubundi atari bike.

- Byagenze bitese kandi kana gato?

- Sha niriwe mpamagara Furaha umunsi wose ndamubura, ibaze nawe kwitwa ngo ufite inshuti umunsi nk’uyu ukira byibura nta n’ubutumwa bugufi bukwifuriza umunsi mwiza aguhaye? ukanamuhamagara ukamubura ku murongo?

- Yooo! Ihangane gusa mukanya twavuganaga ameze neza.

- Eeeh! wowe mwavuganye mbese? Bivuze ngo ni njye adashaka kuvugisha? Ubu se tuvuge ko inshuro namuhamagaye atazibonye kuki njye atahise ampagara wenda niba nari namuhamagaye ataboneka? Burya ni uko abahungu mudufata? Sawa sha ni uko! Ariko Tycoon, reka nkwibarize, umbwize ukuri, ubona ntiruka inyuma y’umuyaga? Koko buriya Furaha arankunda? reba tumaranye amezi arindwi, nta na rimwe biramucika ngo ambwire ngo arankunda byibura hari n’undi muntu umwe kabone niyo yaba ari uruhinja? Kereka kubyandika nabwo rimwe na rimwe yishe umunyana! Reba ntaransaba na rimwe kumusura i wabo, njye n’iyo mbimusabye aranjijisha ntagire icyo ansubiza, sha njyewe nahereye nkiryama kugeza n’bu ntekereza icyo nakora? Mbabarira ungire inama.

- Sha ihangane utuze gukundana biragora wowe wibigira amarushanwa bitware gake cyane hanyuma uzafate umwanzuro,gusa ntuzatekereze ko ibyo wifuza mu buzima aribyo ubona kuko Imana iguha icyo ibona kizakugirira akamaro ntiyaguha ibidafite umumaro!

- Sha jye mbona Eugenie yarahiriwe pe! Reba mumaranye amezi atanu ariko umwereka urukundo najye bikandenga ntari nyirarwo! Reba wamusuye i wabo, ku ishuri ujya ku musangiza ngo atarya wenyine,reba wamuhaye impano nyishi, sha urwanyu ruraryoshye ureke njye nirukanka inyuma y’ibyansize!

- Wivuga utyo wabona Furaha nawe afite impamvu zibimutera kandi wibuke ko burya n’impanga zidakunda ibintu bimwe bityo Furaha ntakunda ibintu byo gukabya nkanjye! Ahubwo se amakuru ya Eugenie sha?

- Ese ubwo uragirango unyumve? Humura nta cyo yampisha rero yabimbwiye, mu gitondo yambwiye ko agiye kureba umugabo, rero ntungire injiji yo kujijishwa ndabizi! Twihuriye mubwiye ko yambaye neza ambwira ko ariko umugabo wabimusabye kandi nta wundi mugabo agira atari wowe!

- Ahwiii! Urakoze cyokora kuko utumye menya ukuri! kuko ibyo yankoze uyu munsi si iby’i Rwanda! Gusa mbwiza ukuri niba afite undi muntu umutereta basi nkuremo akanjye karenjye hakiri kare?

- Sha uwo bakundanaga mbere yawe ubanza bataratandukana gusa ikiza uzabigenzure neza ariko nanjye mba mbona kariya gakobwa kakubabaza rwose ahubwo iyo aba kera twavuga ko yakuroze.

Aya magambo yababaje Tycoon cyane ahita abwira Icyorabo gusubika ikiganiro bakazagikomeza ejo, ariko yumvaga afite umujinya n’agahinda byishi ndetse yumvaga atazongera kuvugisha Eugenie na rimwe, ariko kuko yakundaga gushyira mu gaciro, yafashe umwanzuro wo kubanza kubyigaho neza akamenya niba ibyo abwiwe ari ukuri.

Nyamara ariko bakimara kuvugana Tycoon yahise yakira ubutumwa bugufi buvuye kwa Furaha buteye gutya: “Umva muvandi, telefone irantengushye iri kwizimya kuko guhera ejobundi sindashyiramo umuriro gusa nifuzaga kukubwira ko ndi i Byumba mama wanjye ameze nabi twaraye tumuzanye atumva nka saa tanu z’ijoro yaciye, na telefone nari nayitaye cyokora nayizaniwe na mukuru wanjye mukanya aje kutureba. Gusa ndabona umukecuru ameze nabi sinzi niba uyu munsi awurenga pe! Y’amarozi bamuhaye yahagurutse noneho ku buryo biri kumuniga akamara umwanya adahumeka. Sha sawa ariko nyiramwiza wanjye aribunyice nasanze yampamagaye inshuro utabara, gusa nimbona umuriro ndamuvugisha uretse ko mbona bigoye. Sawa nuvugana na Sunny umusobanurire ko nta muriro mfite ariko ibya mama ntubimubwireho buriya Imana nibishaka ejobundi tuzajya ku ishuri yaratoye mitende.”

Furaha yavugaga ibi ari mu rukerera rwo kuwa 15 Gashyantare 2011 kandi abanyeshuri bari kuzasubira ku masomo kuwa 20 Gashyantare 2011 ubwo haburaga iminsi itanu gusa.

Tycoon akibona ubutumwa bwa mugenzi we yahise amwandikira ubutumwa bumwihanganisha ndetse anamubwira ko yavuganye n’ Icyirabo kandi ameze neza.

Mu kanya gato nyuma yaho Tycoon yoherereje ubu butumwa yahise yakira ubundi butumwa yirukira kubusoma aziko ari mugenzi we Manzi Furaha ubwohereje, ariko atungurwa no gusanga ari Icyirabo umwoherereje ubutumwa buteye butya:”ijoro ryiza muhungu mwiza ariko mfite igiterezo gikeneye inama zawe nzakubwira ku Cyumweru ku ishuri niba ubyemeye”.

Icyirabo akimara kohereza ubu butumwa yahise agwa agacuho arasinzira byimazeyo k’uburyo Ku munsi ukurikiyeho yakanguwe na telefone ya mukuru wa Eugenie ariwe Jeannette nka saa yine z’igitondo.

Icyirabo yahise yibwira ko ari Eugenie uyikoresheje amuhamagara ngo amuhe amakuru y’umunsi mukuru, yibwira ko ahari iye yaba yashizemo umuriro akaba ariyo mpamvu akoresheje iya mukuru we, ariko Icyirabo yatunguwe no kumva ari Jeanette umuhamagaye.

- “Sha Eugenie mwaba mwararanye ko ejo yavuye hano atubwira ko mujyanye gushaka umushinga ku Karere none akaba atigeze agaruka kandi tukaba twahamagaye inimero ye ijoro ryose ntatwitabe?”

Nuko Icyirabo wari asanzwe afitanye utubanga twishi na Eugenie ahita asubiza ati “Yego nibyo twagiye kureba umushinga ariko dutaha bwije kuburyo atari gutaha ngo agere aho bityo twiryamira mu rugo, ahubwo ubwo mwanamuhamagaraga twasinziriye kubera umunaniro ntitwayumva! Ahubwo n’ubu Eugenie we aracyasinziriye ntiyumva n’uwinjiye ariko buriya nakanguka araza.

- Sha urakoze twari dufite ubwoba (maze akupa telefone).

Icyirabo n’agatwenge gatyaye ati”Ndaguhamije si nahamaje bake! Ariko se ubu uyu mukobwa yaraye he ko na Tycoon yambwiye ko atigeze amusura kandi yarambeshye ko ariho agiye? Sha reka muburire ataza kugera murugo akarya iminwa ariko nawe amaze kwiga imico mibi pe! Gusa genda Tycoon wagorwa! Ngo ubu nawe ufite za mashuti rero kandi umwana yaraye asusurutsa abandi wowe wanditse kane mu gitanda? ababyeyi bo bazi ngo za makobwa zagiye gushaka umushinga! sha Tycoon ni uko atabyemera ampaye amahirwe namwikundira urutaryarya. Nuko nyuma yo kwivugisha atyo ahita yandikira Eugenie ubutumwa bugufi amubwira ukuntu yabeshye iwabo ngo nibamubaza ataza kurya iminwa...

Sixbert Murenzi

Yisangize Inshuti.

Ibitekerezo 7

Tanga Igitekerezo