Inkuru y’urukundo Ifoto:Igice cya Karindwi

5

Mu gice giherutse Gaju yari ahereje ifoto Muganza kandi amusaba kutazongera kumutekereza ukundi.Ese byaje kugenda bite?

Gaju yahise asiga aho aragenda kuko yagombaga kubanza guca ku kazi aho yakoreraga ku kiliziya muri Karitasi (ni naho yari yaramenyaniye na Muganza kuko we yari umuririmbisha muri korari nkuru ya Paruwasi ari nayo Gaju yaririmbaga mo) ngo abasabe uruhushya rwo guherekeza umurwayi nawe bari bazi ko yamwitayeho.

Yarahageze ababwira uko bimeze ntibazuyaza kurumuha. Yahise anyura mu rugo gusezera kuri Yvette n’umukozi, asanga Yvette yamaze kwerekeza mu gasanteri kuko niho yari afite inzu itunganya imisatsi. Yarahamusanze kugirango amusezere, bamaze kuvugana amwifuriza amahirwe mu bishashi by’urukundo bya Kalisa yamubonyemo, Gaju arisekera ubundi yerekeza iy’ibitaro.Kubera inzira nyinshi Gaju yanyuze, byatumye ahagera asa n’uwatinze asanga Kalisa bamaze kumujyana, Claire yahasanze amubwira ko bamaze nk’isaha bagiye.

Gaju yahise yicara hasi yibaza icyo gukora, cyane ko yumvaga bavuga ko ngo muri biriya bitaro bajyanyemo Kalisa nta murwaza uhaba. Yibajije aho murumuna wa Kalisa azaba kandi we yari yamaze gupanga ko azamucumbikishiriza kwa mukuru we utuye Kimihurura mu mujyi wa Kigali, ahita asezera kuri Claire bwangu bwangu asohoka ibitaro yerekeza gutega imodoka zijya mu mugi. Yayibonye bitamugoye akurikira Kalisa i Kigali.

Yageze i Kigali akerewe ariko ntibyamubuza guhitira ku bitaro. Ahageze yatunguwe no gusanga murumuna wa Kalisa arira, amubajije uko byagenze amubwira ko yamaze gutunganywa ko bahasanze abaganga b’inzobere bavuye mu Buyapani ko bari kumukurikirana byimbitse, ariko ko bamubwiye ko ashaka aho ajya kurara ko muri ibyo bitaro hataba abarwaza.

Gaju yariruhukije amubwira ko icy’ingenzi ari uko Kalisa bamwitaho naho gucumbika byo ari bumujyane kwa mukuru we Kimihurura. Gaju yabajije umuganga yabonye hafi aho uko yabona Kalisa amubwira ko bitashoboka ko bataha bakazagaruka mu gitondo.

Yerekeje Kimihurura na murumuna wa Kalisa. Bahageze bananiwe, Gaju aganira gato na mukuru we, ubundi buri wese bamwereka aho aryama, nuko barasinzira.

Mu gitondo baramutse bajya ku bitaro byitiriwe Umwami Fayisali, dore ko no kugemura bitemewe uretse wenda imbuto. Nizo bateguye nyamara bagezeyo batunguwe no kubabwira ko Kalisa bazamubona nyuma y’icyumweru.

Gaju yabajije impamvu, bamusobanurira ko abaganga bari kumukorera ubuvuzi buhambaye kandi bamwizeza ko muri icyo cyumweru bazasanga ameze neza.

Kuko nta kundi bari kubigenza basubiye Kimihurura. Murumuna wa Kalisa yasabye Gaju ko yaba asubiye i Byumba kuko icyumweru cyari cyinshi akaba asanze urugo. Gaju yarabimwemereye, anamusezeranya ko azakurikirana amakuru ya Kalisa yose.

Bahanye nimero za telefoni ngo bajye bavugana, nuko baramuherekeza arataha, Gaju we asigara i Kigali kuko yahawe uruhushya rurerure ruvanze n’ikiruhuko cy’uburwayi kuko aribwo nawe yari akiva mu bitaro.
Mu minsi itanu Gaju yabonye nimero ya murumuna wa Kalisa imuhamagaye nawe ayitaba bwangu. Yamubwiraga inkuru y’uko Muganza yahamwe n’ibyaha yarezwe ndetse ko urubanza rwe rwaraye rusomwe ko yakatiwe gufungwa imyaka makumyabiri n’itanu.

Gaju wari wicaranye na mukuru we muruganiriro akimara kumva iyo nkuru yahise ajya mu bicu ashima Rurema ishyizeho ubutabera bwayo, ubundi ariruhutsa ati: “Nyagasani nasingizwe ahasigaye ngiye kwita kuri Kalisa menye ibye kuko yarokoye ubuzima bwange mu gihe bwagombaga kutazibukwa ukundi”.

N’ubwo Kalisa yari akiri mu bitaro, ntabwo isura ya Gaju yigeze imuvamo. Gaju nawe aho amenyeye Kalisa akanamenya ibyo yamukoreye, inzozi zo kuzinukwa gukunda zarangiriye aho. Kuri we ahubwo yumvaga ari intangiriro nziza.

Ntibyatinze icyumweru bahawe na muganga kirashira.Murumuna wa Kalisa nawe aba asesekaye mu murwa mukuru w’urw’imisozi igihumbi. Byari ibyishimo bivanze no gushidikanya kuri bose, dore ko bibazaga niba Kalisa bagiye kureba akiri mu mwuka w’abazima.

Nshimiyimana Leonidas

Yisangize Inshuti.

Ibitekerezo 5

  1. iyi nkuru nkunda kuyisoma.ndanayikunda ariko mutugezaho agace gato cyane mugerageze ijye iba ndende.Merci

  2. Mubyukuri inkuru ninziza ariko ikibazo nuko muri kuyigira ngufi bikabije,ntakibozo mukomeze mutubwire uko byabandanije.

Tanga Igitekerezo