Inkuru nshyashya:INTIMBA Y’UMUTIMA, igice cya mbere

5

Burya koko urugiye cyera ruhinyuza intwari.Umulisa Angel yari umukobwa utagira uko asa akaba agakumi gashyitse ku myaka y’ubwangavu, yari mwiza bidasanzwe.

Iwabo ntibasabaga umunyu cyangwa umuriro, kuko bari bishoboye cyane. Icyakora uyu mukobwa ntiyagize amahirwe yo kwiga kubera imyumvire y’ababyeyi be, gusa kuba atarize ntibyamubuzaga kuba umukobwa ababyeyi bose batangagaho urugero mu bwitonzi no mu myitwarire, yagiraga umutima mwiza cyane yaba kubantu bamuruta, abo bangana, n’abo aruta. Si ibyo gusa no ku isura yari mwiza, yari inzobe idasobanya izira mukorogo kandi idatinya gukukira inka. Ibi byose byari bihagije gutuma wakwita uyu mukobwa nyampinga.

Uyu muryango wo kwa Umurisa wari inshuti z’akadasohoko n’umuryango wo kwa KANIMBA, baturanaga inzoga, bagahana inka ndetse n’umugeni ntibashoboraga kumwimana kuko ubushuti bwabo bwari bwihagije kandi ni mu gihe n’imitungo barayinganyaga, ndetse ise wa Umurisa yendaga kunganya ubukuru na Kanimba uretse ko Kanimba yari yarashatse mbere ye. Imfura ya Kanimba yari umuhungu, w’ubwenge n’ibigango akaba yarakuze yendaga kungana na Umurisa kuko yarushaga umurisa imyaka itatu yonyine y’ubukuru. Uyu musore wo kwa Kanimba yitwaga Ildephonse.

Akirangiza amashuri ye yabonye akazi ko kwigisha ku kigo cy’amashuri abanza cya Mayaga yari umwarimu mwiza cyane kandi w’umuhanga.

Umunsi umwe iwabo b’Umurisa bari baraje inkera maze batumira abazigaba ngo basangirae igitaramo cy’imihigo , Kanimba n’umuhungu we Ildephonse ntibahatanzwe bari abashyitsi b’icyubahiro. Igitaramo cyaratangiye ababyinana barabyina abivuga barivuga ariko muri bose ntawanejeje Karangwa akaba umutware w’abega. Amasaha akuze igihe agatama kari kamaze kuyoboka abagabo bari bateraniye aho, umuhungu wa Kanimba Ildephonse yarahagurutse yivuga imyato, yivugwa ibigwi maze abari aho bose bakoma akamo bati: Guma,Guma,Guma!

Ataritsa yahise akomereza ibyivugo by’iningwa maze abari aho bose barizirwa cyane. Umusaza Karangwa yahise ahaguruka akora mu ntoki za Ildephonse aramushimira maze aramubwira “singuhaye inka kuko ntarusha so amashyo, kandi sinakugabira ibyanya kuko n’iby’iwanyu byihagije, ahubwo nkugabiye imfura yanjye ingana ise ikanganira nyinaUMURISA Angel, umurongore akubere mutima w’urugo kuko nta wundi akwiriye uretse umusore w’intaramikwa, umuhungu wa Kanimba! “

Ababyeyi bose bavugije impundu, abagabo bahanika amajwi hejuru bashimira umubyeyi Karangwa.

Kanimba wizihirwaga cyane yahise ahaguruka akora mu ntoki za Karangwa arangije aramubwira ati “sha kuko uduhaye igihozo kiduhoreza umuhungu, nanjye nkukwereye amashyo yanjye ari mu kibaya cy’Amayaga ndetse guhera none abe ari wowe azajya akamirwa mu gihe tutarakora umuhango wo gukwa ku mugaragaro. Akitsa ijambo abari aho bamuhaye amashyi y’urufaya maze ibirori birakomeza.

Ku ruhande rwa Ildephonse ibibazo byari bimubanye urusobe kuko yibazaga ukuntu agiye kubana n’umukobwa batakundanye bikamuyobera ariko nyuma y’akanya gatoya abiterezaho, yaje kwigira inama yo gutangira kwiyegereza Umurisa bagakundana byibura bakazabana bakundana badatinyana.

Ntibyatinze inkera yarasojwe maze abari aho bose bajya mu ngo zabo, Umurisa yari yamenye amakuru kare ko se yamuhaye Ildephonse, gusa yari yabyishimiye cyane kuko yumvaga bidasanzwe kurongorwa n’umuhungu wize uri umunyacyaro gusa icyo Atari azi ni uburyo Ildephonse yari ahangayikishijwe no kibana n’umuntu atigeze akunda kandi ntiyari kubyanga nanone yari kuba igicibwa mu muryango no kumayaga hose. Kandi ni no mugihe Umurisa Angel yari mwiza cyane kuburyo Atari kubasha kumwirengeshwa namba.

Umunsi umwe byari ku gasusuruko Ildephonse yicaye ku irembo aganira na nyina maze abona umukobwa mwiza arahingutse yisetsa n’udusoni twinshi, yari yambaye neza yikwije hose maze araza arabaramutsa. Nta wundi yari Umurisa Angel! Yaba umurisa yaba Ildephonse bose bari babuze aho bakwirwa kubera amasoni n’ibimwaro, icyakora nta n’iminota Umurisa yamaze ubundi arabasezera ababwira ko yari yanze kunyura ku rugo adasuhuje naho ubundi agiye kwahira icyarire cy’inyana mu kabande.
Ako kanya nyina wa Ildephonse yahise abwira umuhungu we ngo ajyane n’undi mwana nawe ashake icyarire, n’ubwo Ildephonse yari amaze gukura ariko nanone ntiyagombaga gusuzugura nyina ngo yange ahubwo yahise afata inzira ajyana na Umurisa Angel akaba umugore we w’ahazaza.! Birumvikana byari bibaye amahirwe atagira ingano kuri Ildephonse yo kubona akanya ko kuganira n’umugore we imbone nkubone barimo kwahira.

Gusa nk’abandi bose bagiye bafite amasoni ntawe uvugisha undi kuburyo barinze bagera mu ishyamba wagirango bose bafite ubumuga bwo kutavuga! Icyo washoboraga kumva ni umuvuduko w’umutima wateraga insigane ku mpande zombi. N’ubwo hari habuze uwavugisha undi, imbarutso yaje kuba imbeba y’urumende, mu gihe Umurisa yari acyunama acyijya kwahira icyarire yagiye kubona abona imbeba yinaze hejura agira ubwoba bwinshi nawe arataka ariruka agirango ni inzoka imusimbukiye, kubw’amahirwe makeya ubwo yahise akandagira mu mwobo ikirenge kiravunika yikubita hasi ataka cyane.

Ildephonse nawe utari wagapfura urwatsi na rumwe yahise aza yiruka agira ati “komera, komera! Yaraje amubaza icyo abaye undi amubwira ko yari agiye abonye ikintu kimusimbukiye uretse ko kita mukozeho neza, ubwo Ildephonse yakebutse ku ruhande ngo niba ari inzoka ayice ariko arebye neza abona ni urumende rwiruka hafi aho. Bose bakirubona baraturitse baraseka nk’aho nta kibaye maze Ildephonse atangira guserereza Umurisa ko akangwa n’ubusa. Birumvikana ingingo yo kuganiraho yari ibonetse muri makeya ubwoba bwari bushize! Ubwo Umurisa yatangiye kwisobanura ukuntu nta muntu bitabaho kwikanga cyane cyane aramutse ari ikintu gitunguranye, ni uko Ildephonse ati “ngaho haguruka twahire uragaragaye!

Ubwo yahise amuhereza ikiganza ngo amuhagurutse ariko bari bahugiye mu guseka gusa ntibari bamenye ko ikirenge cya Umurisa cyavunitse. Ubwo umurisa gushing kaguru byaranze maze Ildephonse afata umwanzuro wo kumucyura mu rugo bakamwunga. Ni uko amutera ibitugu barataha amujyana iwabo, abantu bose bahuriraga mu nzira bagendaga babavugiraho neza bati “mwihekere sha n’ubundi baramuguhaye ntawe umuburana nawe!

Mu nzira Ildephonse yagerageje kubaza Umurisa uko yakiriye ibyo ise yavuze, ariko kuko Umurisa yavugaga makeya cyane, nta gisubizo gihamye yamubwire kuko yamusubije ati “nabyakiriye uko bikwiye”.

Barimo bagenda baciye iwabo wa Fabiola akaba ari umuryango wari wimukiye ku mayaga vuba uvuye mu mugi, Fabiola abonye uburyo Ildephonse ahetse Umurisa kwihangana byaramunaniye araturika araseka cyane,ati “mwari ndabona uzi kurera urukundo rwose arahirwa uwo mukobwa mukunda! Uziko urera urukundo nk’urera uruhinja?” Icyakora birinze kumusubiza byinshi uretse kwikiriza gusa nta kindi bavuze. Ntibyatinze bageze mu rugo iwabo wa Umurisa maze Ildephonse abatekerereza uko byagenze ni uko umusaza Karangwa aritonganya cyane atukagura abagaragu be ababaza impamvu batagiye kwahira ikirarire kugeza ubwo umwana we avunikira mu kinani? Abandi basubije sebuja bamurahira ku mana ko ntacyo batakoze ngo bamubuze ariko akabyanga akagenda. Ako kanya umusaza yahise atumizaho umuvuzi wari bubashe kuvura umwana icyakora ntibyatinze haje umugabo wari umuhanga mu kunga igicucucucu maze aramuvura, ubwo Ildephonse abonye ko Umurisa atangiye kumererwa neza yaritahiye.

Ubwo yageraga kwa Fabiola wa muryango wari warimukiye mu gace vuba, nyina wa Fabiola yaramuhamagaye ngo aze amubwire, yasanze yicaye mu cyumba ahendahenda uyu musore ngo agemo aranga kuko atari azi icyo yifuza kugeraho dore ko uyu mugore nta n’umugaboyagiraga uretse ko yabanaga n’umukobwa we gusa.
Mu gihe uyu musore yakomezaga kwanga kujya mu cyumba cya mama Fabiola yabuze icyo akora maze abwira Ildephonse ati: nagirango nkubwire ujye uza kudutaramira urabona ntituramenyera ahangaha, wenda mwadufasha kumenyera, ndetse nta n’ikibazo wenda ujye uzana na murumuna wawe nta kibazo.”

Murenzi Sixbert

Yisangize Inshuti.

Ibitekerezo 5

Tanga Igitekerezo