Inkuru ndende INTIMBA Y’UMUTIMA, igice cya Karindwi

12

Mu gice giheruka, Ildephonse na Umulisa bari bategereje igisubizo nyuma yo kwipimisha agakoko gatera Sida. Kurikirana uko byaje kugenda.

Ibisubizo bikimara kuboneka basanze Umulisa Angel na Ildephonse bose baranduye agakoko gatera Sida. Ntibyari byoroheye Umulisa kwakira igisubizo cy’uko yanduye Sida, yahise aturika ararira, ndetse asa n’ufashwe n’ihungabana. Muganga yafatanyije na Ildephonse kumuhumuriza bamwumvisha ko akwiye kwiyakira.

Yahise atekereza ko ari Ildephonse wamwanduje kuko nta wundi muntu yari yararyamanya na we uretse Ildephonse gusa yahise yiremamo akanyabugabo asaba umugabo we ko bataha.

Muganga yabasabye gutangira gufata imiti kandi bagakoresha uburyo bwo kwirinda igihe bubaka urugo rwabo, batashye bose bumiwe mbese Ildephonse we yarebaga nk’umuntu winyariye mu ruhame kubera ibimwaro, bageze mu rugo kubera ukuntu Umulisa yumvaga yihebye kubera ko yanduye sida yageze aho yanga kunywa ya miti, yumvaga arutwa n’uwapfuye, cyokora Ildephonse we yakomeje kuyinywa uko yabitegetswe. Iyo Ildephonse yashakaga kugira icyo abwira Umulisa undi nawe aho gusubiza amarira yahitaga atemba ku matama mbese yasaga n’uwarwaye indwara y’agahinda gakabije muri iyo minsi.

Umunsi umwe yahamagaye umugabo aramubwira ati: “Mubyukuri naragukunze ariko ahari nagukunze urukundo rudashoboka kuko aho kunzanira ibyishimo n’amahoro mu buzima ahubwo kuva nkukunze wanzaniye amakuba n’agahinda bihoraho, ubu umutima wanjye uhorana intimba intimbagura bitewe nawe, sinzi niba narahisemo nabi ariko wahemukiye ubuzima bwanjye kuburyo numva ntazakubabarira,ahari nibeshye kurukundo nkukunda utari ubikwiriye kuko sinari nzi ko wanyanduza sida kandi numva bavuga ngo abantu mwize mugira ubwenjye. Cyokora napfa cyangwa nkabaho uzamenye ko intimba njyendana idateze kuzasibangana na rimwe mu mutima wanjye.”

Ntakintu na kimwe Ildephonse yigeze asubiza kuko yari abizi ko ariwe nyirabayazana w’ibiri kuba byose yaba kuriwe ndetse no ku muryango, ndetse yabuze n’imbaraga zisaba imbabazi umugore we ubundi arituriza araryama kuko mu gito yari afite kujya kwiga.

Ubu buzima babubayemo n’ubwo bwari bugoranye kuko icyizere cyari cyarashize, maze ubwo amezi icyenda ashize nk’abandi babyeyi bose Umulisa nawe ajya ku gise cyo kubyara agifatwa umugabo yashatse kumujyana kwamuganga undi arabyanga amusubiza ko na banyina babyaraga kandi batagombye kujya ku mavuriro, inda yagendaga imanuka nyuma y’akanya gatoya ikongera igatuza kuburyo Umulisa yamaze umunsi n’igice yananiwe kubyara ariko burya ngo akagabo gahimba akandi kataraza byageze aho Umulisa yumva igise kimuzengereje yemera kujya kwa muganga.

Yagezeyo yarembye cyane kuburyo umubiri wari wacitse intege atakibasha no kuvuga, abaganga baje vuba na bwangu bagerageza gukiza umwana n’umubyeyi inda Umulisa yari atwite yavuyemo umukobwa ariko kubw’amahirwe makeya Umurisa we ibye byarangiye ubwo yitaba Imana abyara. Abaganga batukaguye Ildephonse cyane kuko yamutindanye kandi azi neza ko yabanaga n’ubwandu ariko Ildephonse yaziraga ubusa kuko ntako atagize ariko Umulisa akanga kujya kwa muganga, ahari ubanza byari byabindi bavugango ari buve ntarara mumubiri Umulisa nawe ntako batamugize ariko yanga kujya kwa muganga mbere y’igihe.

Nyuma y’imihango yo kwera imiryango yo kwa Ildephonse n’iyo kwa Umulisa bashatse uwarera umwana wari wasizwe na nyina baramubura kuko bari bamaze kumenya neza ko Umulisa yabanaga n’ubwandu maze abaturage bo ku Mayaga baravuga bati buriya uwakora kuri uriya mwana nawe yakwandura, ibyo byatumye habura n’umwe wafasha Ildephonse kurera uwo mwana.

Aho yari yicaye yarebaga ibiri kuba maze akibuka amagambo Umulisa yamubwiye mbere y’uko apfa: mubyukuri naragukunze ariko ahari nagukunze urukundo rudashoboka kuko aho kunzanira ibyishimo n’amahoro mu buzima ahubwo kuva nkukunze wanzaniye amakuba n’agahinda bihoraho, ubu umutima wanjye uhorana intimba intimbagura bitewe nawe, sinzi niba narahisemo nabi ariko wahemukiye ubuzima bwa njye kuburyo numva ntazakubabarira,ahari nibeshye kurukundo nkukunda utari ubikwiriye kuko sinarinziko wanyanduza sida kandi numva bavuga ngo abantu mwize mugira ubwenjye. Cyokora napfa cyangwa nkabaho uzamenyeko intimba njyendana idateze kuzasibangana na rimwe.”

Yageragezaga uburyo bwose yabyiyibagiza ariko bigahora bimugaruka mu matwi buri munsi akumva afitiye ikosa rikomeye Umulisa atigeze amusabira imbabazi. Ildephonse yabaye aho akarera umwana we kuko nta wundi yagombaga kumuha. Ntibyatinze Ildephonse yaje kurangiza amashuri ye ubwo umwana we na we yari afite imyaka isaga ibiri, kuko yari umuhanga Ildephonse yahise abona akazi mu kigo cy’igihugu gishinzwe integanyanyigisho birumvikana ubuzima bwari bugiye kuba bwiza gusa yababazwaga n’uko bumuryoheye atakirikumwe n’umugore we babyaranye.

Amaze kubona ko atazabyishoboza ibijyanye n’akazi no kurera umwana yahisemo gushaka undi mugore ngo ajye asigarana umwana igihe we yagiye mu kazi, yibajije umugore yashaka nawe wanduye kugirango adateza ubwandu bushya aramubura yigira inama yo gusubira kwa Fabiola cyane ko we yamufataga nk’umunyamugi usobanukiwe buri kimwe cyose mu gutera akabariro.

Fabiola ntiyigeze amugora ahubwo akimugezaho igitekerezo cy’uko ashaka kumurongora Fabiola yahise abyemera kuko na we ubwe yari yarabuze umugabo wamucyura, ariko n’ubwo yarongoye Fabiola Ildephonse yahoranaga intimba n’agahinda byo kuba yaravutse ari muzima akaza kwanduzwa na Fabiola atanabizi.

Iyi ntimba yamuhoraga ku mutima rimwe na rimwe akumva yanamwica akihorera kubwo kwanduzwa Sida gusa icyamuremaga agatima ni akana ke gusa ubundi ibindi byo ku isi ntacyo byabaga bimubwiye, cyokora byo yaje gushimishwa n’uko akana ke kakuze yagapimisha agasanga nta Sida kavukanye.

Ako kana kakuze karerwa na Fabiola gusa we ntiyigeze abona urubyo kuko hashize igihe cy’imyaka itanu nta no gutwita namba ibi byose byatumaga uyu mugabo yibaza ko iyo aza kuba akirikumwe n’umugore we yitaga umunyacyaro wenda bari kuba bafite utwana twinshi akabona abo azaraga imitungo ye yose. Nubwo Ildephonse yaje kubona amafaranga ariko yahoranaga intimba ko yahemutse akanduza uwamukundaga by’agahebuzo.

Cyokora murumunawe Munana we yakomeje gufata imiti neza araramba ndetse banagira inama ise ko nawe ajya kwipimisha. Kanimba na we basanze yaranduye atangira imiti, iyo Ildephonse yaganirizaga umuntu wese yahitaga amubwira intimba ze maze akagira inama abantu bose yo kutazizera umuntu n’umwe yaba afite amatako asize zahabu cyangwa yaba asa ate.

Byaje kurangira uyu mugabo yituriye mu buzima bwo kwicuza kubera guhubuka no kutabasha kurinda ubuzima bwe ari nabyo byatumye ubwa Munana n’ubwa Umulisa nabwo bujya mubyago. Burya koko inyana ni iya mweru kuko Munana na Ildephonse bakurikije ise ubusambanyi na ho Fabiola we akurikiza nyina.

Ushaka gusoma igice cyabanje, Kanda ku magambo abanziriza iki gice

MURENZI Sixbert

Yisangize Inshuti.

Ibitekerezo 12

  1. ariko ibi sibyo kabsa kuko kuduha ibice byaruta ntimuyiduhe kuko ni ukudukinisha kabsa kandi turi bakuru

  2. Iyi nkuru iratinda ikarambirAna reba nkubu tuyiheruka kuwa 5 burinze bwira ku 1 ntayo

  3. 1 | 2

Tanga Igitekerezo