Inkuru ndende INTIMBA Y’UMUTIMA, igice cya Gatandatu

7

Mu gice giheruka Munana yari amaze kubona ibisubizo bimwereka ko yanduye Sida, mugihe Umulisa we yari arimo kwitabwaho n’agabanga nyuma yo kugwa igihumure, Kurikira uko byaje kujyenda

Munana yakomeje gutereza yibuka ko na mukuruwe yasambanye na Fabiola agahinda kari kenshi mu mutima wa Munana kuko yiyumvishaga ko uko biri kose umuryango wabo ugiye gushira ashingiye ko na mukuru we yari yaramwumvishe ari gusambana na Fabiola. Cyokora icyo utahindura uracyakira yabonye ko ntacyo yahindura kubyabaye yiyemeza kubyakira no gufata imiti neza nk’uko muganga yabimusabye.

Ku ruhande rwa Umulisa we uko abaganga bamusimburanagaho byaje kurangira agatima kagarutse arahembuka aba muzima, ubwo yakangukaga yasanze arikumwe na Ildephonse bonyine aho mubitaro maze arangije aterura amagambo y’urukundo ayabwira Ildephonse:

Ati “Mu byukuri naragukunze ku buryo budasanzwe, gusa sinari nzi ko wampemukira ngo unkoze isoni imbere y’ababyeyi n’urungano, ni kenshi mama yambwiraga ko umukobwa usambanye abari icyomanzi, icyangamibyizi n’ibindi, bityo nkahora numva ko njyewe ntazaba gutyo. Umunsi umwe ntazibagirwa bitewe n’urukundo numvaga nkufitiye waranshutse nanjye nshiduka byabayeho ntazi ibyaribyo, mu by’ukuri ndagukunda ndetse n’iyo Imana yo mwijuri iza kuba itabaho ni wowe nari kujya nsingiza, ariko kugeza ubu ntagaciro nkifite mu muryango kuko sindi umukobwa sindi n’umugore kuko ntabana n’umugabo nyamara mfite inda nkuru. None ndagusabye niba wemera ukuri kwanjye basi reka tujyane tubane kuko sinabasha guhinguka imbere ya mama mubwira ko ntwite n’inama zose yajyaga angira. Sibyo sheri?

Ildephonse yumvishe aya magambo yitonze arangije yitsa imitima gatatu maze asanga nta yandi mahitamo uretse kubyemera agatunga Umulisa umwari wasaga n’ihoho n’ubwo atari yarize! Kwamuganga bamuhaye imiti y’ibanze yongerera abagore imbaraga igihe batwite maze baramusezerera arataha kuko yari yatangiye koroherwa kandi birumvikana ntahandi yari afite gutaha uretse kwa Ildephonse. Mbega isoni n’ikimwaro Umulisa yari afite akimara kwinjira mu nzu ya Ildephonse! Yibazaga ukuntu ari butinyuke agakuramo imyenda yose yarangiza akaryamana n’umuhungu mu buriri bumwe akumva ni ihurizo rikomeye!

Ntibyatinze bwaragorobye ubwo Ildephonse yari ahishije ibitoki maze agaburira Umushyitsi we wa burundu ngo basangire, gusa kurya byarabananiye kuko Umulisa yajyaga gutamira amarira agatemba ku matama bityo bahitamo kubireka. Gusa nyine agatinze kazaza ni amenyo ya rugu ya masaha yo kuryama yaratinze arasohora kandi birumvikana neza ko ntayandi mahitamo yari ahari uretse kurarana. Ni nako byagenze uretse ko byagoranye bigasaba ko babanza bakazimya itara ku girango Umulisa akuremo imyenda nta muntu umureba! Akimara gukuramo yahise yinjira mu buriri ubundi atera umugongo Ildephonse.

Ijoro ryose Ildephonse yaraye ahendahenda ariko Umulisa yanga kumwumva nagatoya, byageze aho atangira kwicuza icyo byaba bimaze kwitwa ko yashatse umugore kandi kuriwe acyiryama nk’abasore yumvaga yamuturumbura mu buriri akamwirukana iryo joro agataha ariko agatima ka kimuntu kakazamo.

Bwaracyeye Ildephonse ajya kwiga, Umulisa arabyuka akora uturimo tw’abakobwa twose aranateka ategereza umugabo we ngo bajyane kugemurira Munana kuko we yari akiri kwa muganga. Ildephonse yaje yarakaye ahita ategeka umugorewe ko baryamana bagatera akabariro yabyanga agataha iwabo, Umulisa yatekereje ko adashobora gutaha iwabo atwite n’imitungo iwabo bamaze baziko arwaye urushwima maze ahitaamo kwemera araryama ngo yuzuze inshingano z’umugore mu rugo. N’ubwo imibonano yabayeho icyo gihe ariko Ildephonse yarangije afite umujinya utagira ingano kuko yari ameze nk’uwaryamanye n’igiti kuko Umulisa yabonye byakomeye aragenda araryama aragarama ubundi afata uburingiti yipfuka mu mason go adakubitana amaso na Ildephonse barimo bakora ibyamuteraga isoni!

Iyo Ildephonse yajyaga kumusoma yaburaga aho asoma kuko yari yipfukiranye mu isura hose, kubera izi mpamvu Ildephonse yatangiye kwiterereza Fabiola uburyo yari umukobwa mwiza wirekura, kandi akakwigisha uko ubigenza ngo imibonano mpuzabitsina ibaryohere ni uko yumva atangiye kwicuza impamvu atari we yashatse ngo areke uwo mukobwa w’umuturage utazi no gusomana, cyokora ntibyatinze igikorwa nyirizina cyarabaye kiranarangira maze bafata inzira bajya kugemurira Munana. Mu nzira Umulisa ibimwaro byari byamwishe atavugisha umugabo we, umugabo na we yari afite umujinya yibaza nimba n’abandi bakobwa b’abaturage bateye nka Umulisa kuburyo yaterezaga ati: “ni ukubona ubwiza bwo ku ruhu ariko ntacyo biyiziye,”

Bageze kwa muganga iby’uburakari barabyiyibagije kugirango baganirize umurwayi, gusa basanze ameze neza yatangiye koroherwa kandi muganga yari yamubwiye ko nta kibazo bamusezerera agataha ubundi akajya akomeza agafata imiti igabanya ubukana bw’agakoko gatera Sida uko bikwiye nta kibazo, cyokora Munana yirinze kubwira mukuru we ko yanduye amubwira gusa ko bamusezereye ngo atahe ajya afatira imiti mu rugo. Ntibyatinze bwarakeye arasezererwa arataha maze bamutuma ku babyeyi ngo ababwire ko Ildephonse na Umulisa bishyingiye basigaye bibanira maze undi aragenda abivuga uko bamutumye.

Uratekereza ko ababyeyi ba Umulisa bifashe bate nyuma yo kumva ko umukobwa wabo yishyingiye bari bamaze kumutakazaho imitungo bamuvuza ibyo atarwaye? Tekereza Kanimba yumvise ko uwo yatumye kwiga yahise ashaka umugore atabibwiye umuryango!

N’ubwo ababyeyi ba Umulisa byabababaje ariko ku iherezo barabyakiriye barihangana kuko n’ubundi zimwe mu nkwano bari barazakiriye kera. Kanimba na we yemeye urwaje kuko burya ngo akaje karemerwa, kandi ubuze uko agira agwa neza.

Umulisa na Ildephonse bakomeje kubana mu mugi cyokora ubunyacyaro bwa Umulisa ntibwigeze bushira yaba mu buryo yubakagamo urugo atera akabariro yaba n’uburyo yambaraga kuko buri munsi yabaga yambaye ibigutiya binini cyane bigera ku birenge kandi yakomeje kujya yipfuka mu maso akanazimya itara mbere yo gutera akabariro, ibintu byababazaga umugabo kuko n’abandi basore biganaga bamusererezaga ko umugorewe yambara nk’abamasera mugihe abanyamugi babaga bifuza umugore witonda kandi wambara imyenda igaragaza uburanga bwe bukagaragarira bose yaba amatako meza, inda nziza, imfundiko nziza… byose abagore b’abanyamugi birirwaga babyereka abakeneye kubireba n’abatabyifuza nyarmara ariko Umulisa yari yarahakanye mwene iyo myambarire kuko nyina yari yaramutoje ko ibanga ry’umugore ari iry’umugabo we gusa, bityo rero yangaga ko hari undi wabona amatakoye uretse umugabowe gusa kandi nabwo igihe baryamye bonyine.

Babaye muri ubwo buzima batunzwe na buruse gusa kandi yari inahagije ugereranyije n’ubuzima bw’icyo gihe, ntibyatinze ukwezi kwarashize Ildephonse na Umulisa babana birumvikana ko bari bamaze kumenyerana n’ubwo Ildephonse atari yakwishimira umugorewe na rimwe batera akabariro, ukwezi gushize bibutse ko muganga yabasezeranyije ko buri kwezi bazajya bajya kwipimisha inda.

Ninako byagenze igihe cyarageze Umulisa na Ildephonse berekeza kubitaro bakimara kubapima inda bagasanga umwana akura neza nta kibazo byanabaye ngombwa ko babapima n’agakoko gatera Sida kugirango bamenye neza ko umwana uzavuka azagira ubuzima bwiza dore ko muri iyo minsi aribwo icyo kiza cyari cyadutse mu bantu. Babafashe amaraso abaganga bajya kuyasuzuma abandi nabo baba batembera gake gake bategereje ibisubizo by’amaraso batanze.

Murenzi Sixbert

Yisangize Inshuti.

Ibitekerezo 7

  1. As I web site possessor I believe the content material here is rattling great , appreciate it for your hard work. You should keep it up forever! Good Luck. dakkkgdebcecedda

Tanga Igitekerezo