Igice cya 12:Amacenga y’urukundo

9

Mu gice giherutse hari umuntu wari uje kureba se wa Brandine, bavuga ko ameze nk’umusazi, ese uwo muntu yari nde?

…….Kwa muganga ibyaho ntibyatinze intumwa papa wa Brandine zagezeyo zisanga amaze gukanguka ariko ubona nta mbaraga afite gusa ntiyavugaga,ariko bakomeje kumwitegereza babona iminwa ye iranyeganyega,nuko baramwegera bakomeza kumutega amatwi ngo bumve icyo avuga ariko ntibagira icyo bumva, nuko azamura akaboko abacira amarenga abereka akaboka kanyeganyega nk’akandika maze bamuhereza ikaramu n’urupapuro.

Bamaze kumuha ako gapapuro n’ikaramu,arabijugunya atangira kurira,ariko muganga ahita yinjira,maze bamusobanurira uko bimeze maze babona amuhereje agapapuro yari afite,nuko babona aragasomye agacishamo akamwenyura arangije kugasoma babona ararize maze arongera abasaba agapapuro,maze yandikaho ngo:"ndashaka papa"

Byihuse bahise bajya kureba Papa wa Brandine nk’uko Brandine yabibasabye, bagezeyo basanga ibintu byakomeye Eddy arigusakuza cyane ati:"Oyaa Edmond ntiwari ukwiye kuza hano kuko ndahari nk’umuvandimwe wawe kugirango nkemure ibibazo bihari" ariko Edmond aramubwira ati:"muzira kwivanga mubitabareba.Kuki mushaka kurwana urugamba mutazi uko rwatangiye?"

Nuko papa wa Brandine na we aramubwira ati:"urakaza neza mboga zizanye!, ubu noneho nemerewe kugukoresha icyo nshaka kandi noneho birahindutse!,ari wowe ndetse n’izi nshuti zawe nta n’umwe wemerewe kuva hano!" maze akivuga atyo za ntumwa ziramubwira ziti:"boss wa mukobwa yakangutse! ariko dore inyandiko yatwandikiye!"

Inyandiko yarayisomye maze ahita avuga ati:" aba bo ni bigendere uyu musazi nimumubohe mumunshyirire mumodoka muze tujye kureba umwana wanjye!"

Maze baragenda,bageze kwa muganga basanga Brandine aracyasoma ka gapapuro,gusa noneho yabashaga kuvuga nubwo byamugoraga, maze papa we akihagera,aramusuhuza ati :" Mwana wanjye umutembatoto uzira gucunaguzwa ukwiye gucurangirwa worohewe ngusubize murugo ko nifuza ko wataha ugakurikiranwa wibereye mu rugo?"

Ariko Brandine ntiyagira icyo amusubiza ahubwo atangira kumusomera ka gapapuro agira ati:" sinigeze nsobanukirwa ko iyo inyoni iguruka ishobora gucika ibaba kandi ntimanuke ngo igwe hasi,ahubwo igakomeza kuguruka kugeza aho igeze aho iteganya kujya, kandi ibyo ntibizihira zose kuko hari iziremereye n’izoroshye"

Akomeza agira ati:"hanyuma rero Brandine ibyakubayeho nyuma y’igitaramo mbizi ntarakebutse ngo ndebe inyuma yanjye,kandi byambabaje ntacyo nabikoraho kuko nsigaye ndi umukire kurusha so wihaye kumpemukira aziko nzapfa ariko ndacyariho!,umumbwirire ko abasore batatu afite harimo impanga yanjye , nagira uwo arya n’urwara nanjye nzamwima ijuru, ndetse umukobwa yibwira ko yashimuse ndamumenyesha ko natumye malaika wanjye akamumukura mu maboko,kandi njyewe ndagiye ngo mwihe ankoze ibyo ashaka nk’uko nahaye umwana wanjye abanyabyaha bakamubamba nanjye nk’Imana y’urukundo ndagiye so anyice Edmond"

Nuko Brandine abwira papa we ati"koko papa ni wowe uhangara kugirira nabi Edmond inshuro ya kabiri? ese gusara ntibyari bihagije? kuki koko ushaka ko apfa?"

Papa we aramusubiza ati:"koko iyo mbwa ni yo ishobora kuvuga amagambo nk’ayo? noneho ndayifite igomba gupfa!,ahubwo nibayizane urebe ukuntu nayiboshye!" nuko baramuzana Brandine amukubise amaso amarira aramanuka.

Ku rundi ruhande wa musore wajyanye Jesca na Slyvie yahise ababwira atuje ati:"mwihangane kubera ibyo nabakoreye byose nagirango mbone uko mbacikisha,kandi Edmond yari yantumye umwe ariko nyine nimugende ibindi ndabyimenyera" nuko Jesca aramubaza ati:"ese uri nde wowe udutabaye?" aramusubiza ati:"noherejwe na Edmond ndi Mukunzi mwene Rukundo kandi icyo mbasabye ni uko muva hano vuba cyane ibintu bitarakomera!"

Ntibyatinze abo bakobwa bombi bagera iwabo agatima ntahandi kari kari batekerezaga Papeterie yabo maze bakibuka ko imaze iminsi idakora kandi amafaranga bayitangije ari inguzanyo bikabatera guhaangayika ndetse bakanatekereza ko igihe bari barashimuswe na yo yaba yaribwe!

Baragiye bagezeyo,babona harakinguye maze Slyvie ubwoba buramwica atangira kubunga amarira mu maso,abura icyo avuga ariko Jesca aramukomeza aramubwira ati:"Slyvie mwana wa mama ntuzahangayike kuko Imana idukuye hariya hantu iracyari kumwe natwe kandi naho ibintu byose byashira,ndagusezeranya ko tuzabona ibindi kuko tugifite ubuzima!"

Nuko Slyvie asubiza Jesca ati:"ariko sha wagiye ureka guteta? Uyobewe koko ariya mafaranga uburyo yatuvunnye kandi nta handi hantu dufite twakura andi?" ariko Jesca aramusubiza ati:"njyewe ndumva mpamanya n’umutima wanjye ko nta kibazo Papeterie yacu yahuye nacyo,kandi ndakwizeza ko iriya miryango ureba ifunguye ari imiryango y’ibisubizo ku bibazo by’umusubirizo tumaranye iminsi"

Ntibyatinze begera imbere,gusa uko bakomeza kwegera imiryango niko bumvaga abantu bavugira mo imbere ibyo bigakomeza gutera ubwoba Slyvie akabwira Jesca ati:"Jesca! Ntiwumva ko itakiri Papeterie isigaye ikorerwamo ibindi bintu tutazi?" gusa Jesca ataragira ikintu avuga Benitha murumuna wa Slyvie aba arasohotse maze ariyamira (avuga cyane) ati:"Slyvie funga amaso ngufitiye siripurize(surprise) kandi uhanagure ayo marira!"

Nuko bombi Slyvie na Jesca binjira muri Papiterie bagezemo baboba ibintu byose biri ku murongo,nta cyangiritse, nuko babaza Benitha bati:"Ese ni iki cyakubwirije kuza gukora hano koko?" maze na we arabasubiza ati:"bavandimwe naho naba nta mutima ngira,sinabura kubakura mu byago ngo ntume mugwa mu gihombo!.

Slyvie aramubwira ati:"nonese agashya uranyereka nafunze amaso karaba kameze gate kandi ndaba ntabona?"

Ku rundi ruhande mama wa Edmond na Eddy yari ari kurira agira ati:"Ese koko ni iki gitumye amatama yanjye ashokaho amarira kandi nshaje!,ni iki gitumye imvi zanjye zumva urusaku no kuniha kwanjye,birutwa n’iyo mfa nkava ku isi kuko nasigiwe agahinda wagirango ni wo murage wanjye!" ariko umuhungu we Eddy agakomeza kmwihanganisha.

Umukecuru yakomeje kurira ariko umuhungu we akomeza kumuhoza amubwira ati:" mama watubyaye ndagirango nkwizeze ko aho bukera Edmond ararekurwa kuko iyatumye arokoka ruriya rutare yajugunyweho ndetse na ririya sumo n’uyu munsi iracyari kumwe na we,nukuri ceceka, kandi n’iyo ibyo bitaba nkwijeje ko nzakora ibishoboka byose naho nabura ubuzima ariko umuvandimwe azagaruke amahoro!"

Kwa muganga Papa wa Blandine yazanye Edmond aboshye nabi,maze abaza muganga ati:"ujya wibuka ko iri vuriro ari iryanjye ?uzi ko nshaka nakwirukana?" maze muganga yubika umutwe aramubwira ati:"Yego" undi ati:"nigute wemerera iyi nyana y’imbwa kumvogerera imitungo izana ibintu by’ibyandiko bitampaye agaciro?"

Muganga ataragira icyo asubiza Edmond ahita amusubiza ati:"kuva navuka sinigeze mbona umuntu mwiza nkawe!,umuntu ushinga ivuriro rivura abandi akibagirwa irizamuvura we ubwe!" maze n’umujinya wose Papa wa Blandine ahita abaza Edmond ati :"urabona ndwaye ikisha?" Edmond ati:"Urwaye kugira icyubahiro cyinshi! "

Maze n’agasuzuguro Papa Blandine ahita abwira Edmond ati:"koko uri umusazi! ni inde wakubwiye ko icyubahiro kivurwa? na ho Edmond no kwiyoroshya ati:"Kera imbeba zakiniye aho intare yiryamiye yasinziriye,nuko kubw’ibyago zirayikangura maze ihita ifata kamwe muri utwo tubeba irakaye cyane ishaka kukica ariko karayibaza gati ‘mbese agatumbi kanjye kakumarira iki?’

Edmond akomeza agira ati:"nuko intare itekereje isanga koko nta ntare yo guhangana n’imbeba none wowe ko ufite icyubahiro ndetse n’imitungo ni iki gituma uhiga inyana y’imbwa nk’uko wabivuze? aho wowe ntabwo waba uri inyana y’!?"

Maze uwo musaza atangazwa n’amagambo abwiwe na Edmond w’umusazi ariko kubwo kwihagararaho abwira Edmond ati:"ukoze ikosa riremereye cyane! ubu ngiye kuguhana nihanukiriye kuko wasuzuguye umukire,dore uri mu bwatsi bwanjye, ivuriro ni iryanjye , abakozi ni abanjye,none rero icyo nagukorera cyose ntawanyitambika itegure ugiye gusogongera kubusharire bwo kwisumbukuruza wumve ko utazongera gukunda umwana w’umukire!"

Ndayisaba Simeon

Yisangize Inshuti.

Ibitekerezo 9

  1. Mwokabyara mwe. Wa mwanditsi we ntibavuga "Brandine"bavuga "Blandine".njye nari nagize ngo wibeshye ariko mbonye wabyanditse kenshi

  2. none ko mbona Edmond atangiye kuba muzima Reba imigani aba aca? aha iyi Nakuru muzayikoremo film inkunga yanjye nzayitanga nzakina ndi edmond

Tanga Igitekerezo