Ibyagufasha kwitwara neza ku munsi w’abakundana urukundo rwanyu rukaramba

4

Kuri uyu wa 14 Gashyantare ni umunsi ngarukamwaka w’abakundanye, umunsi uzwi nka Saint Valantin. Ni i muri urwo rwego abakundanye bagirwa inama y’uko bagomba kwitwara kuri uyu munsi.

Uyu munsi w’abakundanye ni umunsi usobanura byinshi ku idini ry’abangirikani (Anglican Communion) ndetse n’idini ry’aba Lutheran aribo bayoboke cyangwa abakomoka kw’idini rya Martin Luther.

Uyu munsi nanone utuma benshi mu bayoboke b’idini rya Gaturika bibuka mutagatifu Valentin wagiye akora ibikorwa byinshi bitandukanye by’urukundo mugihe yari akiriho.

Gusa kuri uyu munsi hari abishima bakarenza urugero bikaba byabaviramo gukora amakosa batateganyije, aha twavuga nk’aho abakundanye bitwaza ko uyu munsi ari umunsi wo gushimangira urukundo rwabo bakaba bakabya bakajya mu ngeso zitari nziza nk’ubusambanyi.Umunsi w’abakundana ni igihe gikomeye ariko nanone gishobora kuzakubera urwibutso rubi mu buzima bwawe bwose, uramutse utitwararitse.

Mu mezi make akurikira tariki ya 14 Gashyantare niho uzasanga benshi bashaka muganga bifuza gukoresha ibizamini by’uko batwite cyangwa se abandi bipimisha agakoko gatera SIDA ndetse n’ibindi bizamini bya zimwe mu ndwara zandurira mu mibonano mpuzabitsina.

Inama ya mbere ni ukumva ko uwo munsi ari iminsi nk’iyindi. Yego ukaba wahura n’umukunzi wawe mukishimana mugasangira, mugahana impano zitandukanye ni byiza, ariko hakirindwa kuba habaho gutandukira mu kaba mwakora ibintu mutateguye bishobora gutuma muzicuza igihe kirekire.

Kuri uyu munsi byaba byiza gahunda zawe n’umukunzi wawe muziteguye hakiri kare,zikarangira kare kugira ngo ijoro ritaza kuba igishuko cyo kuba mwakora amakosa.

Kuri uyu munsi kandi byaba byiza wowe n’umukunzi wawe muwugize uwo gusura imiryango(Ababyeyi) ku babafite, ibi nabyo biba byiza kuko akenshi bibarinda kuba mwagwa mu bishuko kuko mugira amahirwe yo guhabwa inama za kibyeyi, bigatuma mufata ingamba zihamye mu rukundo rwanyu.

Mugihe ariko ibi byose twavuze haruguru byananiranye Makuruki irabibutsa kuzamenya kwikingira mukoresha agakingirizo mu rwego rwo kwirinda indwara zandurira mu mibonano mpuzabitsina nka virusi itera SIDA, mburugu, uburagaza, imitezi, n’izindi ndetse no kuba habaho gusama bitateganyijwe.

Umunsi w’abakundana ushobora kukubera umunsi w’ibyishimo n’umunezero mu gihe ariko ushobora no kuba iherezo ry’urukundo rwanyu hatabayeho ubushishozi no kwihangana bigatuma aho kuba munsi w’urukundo uba umunsi w’urwango hagati yanyu.

Turabifuriza kugira urukundo rurambye, rufite imizi kuri uyu munsi w’abakundanye.

Yisangize Inshuti.

Ibitekerezo 4

  1. Ndabashimiye cyane kubwizo nama mutanze ,ndahamyako hari benshi ziribufashe...kandi nanone biba byiza iyo umuntu yizihije umunsi runaka azi namateka yawo nicyatumye ubaho. Murakoze cyane (Makuruki.rw)

  2. Ndabashimiye cyane kubwizo nama mutanze ,ndahamyako hari benshi ziribufashe...kandi nanone biba byiza iyo umuntu yizihije umunsi runaka azi namateka yawo nicyatumye ubaho. Murakoze cyane (Makuruki.rw)

Tanga Igitekerezo