AMAHIRWE ABONEKA RIMWE (igice cya Gatanu)

1

Mu gice giheruka twasize Ephrem arimo kubwira Simeo inkuru y’ifungwa ry’umuntu ariko mama wabo abaca mu ijambo inkuru itarangiye, Kurikira ibyaje gukurikiraho!

Ubwo twaraje dukomeza kwitegereza abantu barira bababajwe n’uko muzehe agendera kumbago ariko wabonaga we ntacyo bimubwiye maze arahaguruka afata imbago imwe arayiyegamiza maze aravuga ati:" ntababeshye ibyambayeho ntibinshimishije na gake, ariko si intangiriro yo guhanga urwango ahubwo nicyo gihe cyo kumeya kubaho bitandukanye n’uko nabagaho mbere!"

Akomeza agira ati:"njyewe nzi nezako kuba narakoze impanuka bikanamviramo gutakaza ukuguru kwanjye ntacyo bizahindura kumyumvire yanjye kuko ntacyo nakora ngo kugaruke!,gusa icyo nshaka kubabwira ni uko nashoboye kumenya ko nagambaniwe ngacibwa ukuguru,ariko ntacyo nagombaga gukora usibye kubabarira!" Abantu bari aho wabonaga ko bamuteze amatwi kandi bashishikariye kumva inyigisho n’impanuro yabahaga ariko njyewe na Ephrem ntacyo byari bitubwiye ahubwo twumvaga ari nk’aho yabuze icyo avuga nuko bigeze aho Ephrem arambwira ati:"twisohokere nkwibwirire bimwe nakubwiraga!" nuko turasohoka.

Ubwo Sabine yageraga mu rugo, yakomeje kuganira na musaza we witwaga Rugira akomeza amushimira kuba akomeje kumufasha mumyigireye agira ati:" Rugira rwa data na mama wambaye hafi ubwo ntari mfite data na mama wambereye bose ndetse ukomeza kumfasha no kumba hafi ubwo undi muvandimwe yari atuvuyemo kuko numvaga ntazashobora kwiga adahari,ariko wabimfashijemo none mpagaze nemye kubwawe!"

Ubwo Rugira yahise amubwira ati:"kana ka mama navukiye kugira icyo nkora kugirango umuryango wanjye ugire aho uva n’aho ugera n’ubwo bitampiriye kuko inyabutatu yacu yasenywe n’inyangabirama y’umushoferi tukaba dusigaye turi babiri nk’abana b’inuma!,ariko byange bikunde nzahorera umuvandimwe wagiye ntamwanga kandi ndahamyako batangiye gusogongera kungaruka z’icyaha cyabo!"

Njyewe na Ephrem tumaze kugera hanze nabajije Ephrem nti:"ngaho mbwira rero utongera kunyicisha amatsiko wabona nanone Mama agarutse agasanga ntacyo umbwiye!" nuko arambwira ati:" Simeon nagiraga ngo nkubwireko nyine nahamagawe na Dr.Anasthase akambwirako cya kigoryi cy’ikigome ngo ni Dr.Ngabo bagifunze ariko Telephone yanjye yahise izima ntamubajije icyo bagifungiye ariko ndaje ndamuhamagara mubaze!

Ubwo nahise ntangira kwibaza niba iby’ifungwa rye hari aho byaba bihuriye no gucibwa ukuguru kwa papa cyangwa niba ari impamvu z’akazi ariko sinabitindaho gusa nakibuka amagambo Nkusi yambwiye ambuza kwihorera nkumva afite ukuri,gusa nkananirwa gufata umwanzuro nibutseko kubaho kwanjye bizangora papa yararetse akazi.

Ubwo Sabine yagerageje kubuza musaza we (Rugira) ibintu byo kwihorera agira ati:"umva mwana wa mama dore dusigaye turi babiri nk’abana b’inuma nk’uko wabivuze ubwo rero nta mpamvu yo kwihorera kuko ushobora kubigwamo ikindi kandi ntagihamya ko uwo mushoferi wamugonze yaba yarabishakaga!" ariko Rugira yakomeje kubyanga aramubwira ati:"Sabine urabiziko icyo niyemeje nshyirwa nkigezeho kandi sinjya ntangiza urugamba ntazasoza ubwo rero ninshaka nzabigwemo ariko mporere umuvandimwe atazanyita ikigwari!" Sabine yabonye bimuyobeye ashaka uburyo bwo guhindura ikiganiro nuko aramubwira ati:" Sha uziko ubu ntakiri umwana!"

Nuko Rugira aramubaza ati:" Gutese?" nawe aramusubiza ati:" ubu nsigaye mfite umukunzi!" na we aramusubiza ati:"n’isoni zawe ndetse n’ukuntu watinyaga abahungu?" nuko Sabine aramubwira ati:" narakunze rero ahubwo reka nkuzanire agafoto ke arikumwe n’umuryango we!"

Ubwo Sabine yazanye ya foto namuhaye ayihereza musazawe nuko akiyikubita amaso yiterera hejuru ati:" Woow!! mbega byiza unkoreye ibyo nashakaga uburero unsabe icyo ushaka cyose kandi nanjye ndabona unshyigikiye mu byo ndimo kandi gahunda zanjye zigiye gutungana nk’uko mbishaka!"nuko Sabine abwira Rugira ati:" Nonese ibyo bihurira hehe n’umukunzi wanjye nkweretse ku ifoto we n’umuryango we?" ariko Rugira akomeza kwiterera hejuru ati:"wowe byihorere gusa!"

Ubwo Ephrem twakomeje kuganira dusa n’abishimiye ifungwa rya Dr.Ngabo n’ubwo bwose tutari tuzi muby’ukuri icyo yafungiwe,nuko mama ahita aza kutureba maze ahageze abwira Ephrem ati:"ariko koko ubwiri intumva amara ibinonko" akomeza agira ati:"sinabiyamye utwo dutsiko twanyu ese ubwo murabona abari munzu barimo gutekereza ko muri mubiki?"

Nuko Ephrem aseka cyane aramusubiza ati:"Erega ni uko uri kwijijisha naho ubundi icyaduteye gukora icyo wita udutsiko nawe cyagutera ibyishimo ndetse ushobora kutwiyungaho nubyumva!"nuko mama aza anyegera arambaza ati:"ngaho mbwira nyine numve koko niba ibyo murimo ari ibyagira aho bivana umuntu ndetse bikamugeza ahandi!:" maze ndamusubiza nti:"wabajije Ephrem ko ariwe shefu (chef) muri aka kanya!" nuko mama arongera abaza Ephrem ati:" murabona nkomeza kubatakazaho umwanya wanjye,mwavuze ibyo muvuga mukagira mugasanga abandi mu nzu!"

Nuko Ephrem aramusubiza ati:"Erega ni uko wakomeje kumpata amagambo naho ubundi mba nakubwiye neza uburyo abanyamafuti batangiye guhanirwa ibyaha byabo kandi niyo bitaba ibyo abantu babaziho burya ngo:"IMANA ihora ihoze!" nuko Mama n’umujinya mwinshi abaza Ephrem ati:("uvuze ngo:"iki?") Ephrem ati:"nakubwiye ngo:"Imana ihora ihoze"ubwo Ephrem yari akimara kubwira mama ati:"Imana ihora ihoze" byamuteye kurakara cyane maze aramubaza ati:"koko papa wanyu yabacumuyeho iki,cyangwa yacumuye iki ku Mana gituma ahura n’ibyago koko mukamuvugiraho muti:"ni ingaruka z’ibyaha!" akomeza agira ati:[" ibyanditswe birasohoye koko ngo:"abanzi b’umuntu bazaba abo murugo rwe"]

Nakomeje kwitegereza mama n’agahinda kensi kumaso yari afite maze ndamwegera ndamubwira nti:" mama watwibarutse ni uko utashatse kutwumva neza ariko twashatse kukubwirako babandi batumye papa acika akaguru batangiye gusogongera kubihano by’ibyaha byabo!" nuko arambaza ati:" ariko ubwo urashaka kuvuga iki" ndamusubiza nti:" nashatse kukubwira ko Dr.Ngabo ubu ari kubarizwa muburoko!" nuko mama akimara kumva ayo magambo ava aho yirukira munzu avuga ati:"iri ni ishyano noneho ritashye iwacu!"

Ubwo Sabine yakomeje kwinginga Rugira (musaza we) ngo amubwire impamvu itumye yishima cyane nyuma yo kubona ifoto yanjye ndikumwe n’umuryango wanjye nuko aho bigeze aramusubiza ati:"Reka nkubwire ibyo utari uzi kandi utigeze kumenya kuko uyumunsi amahirwe yansekeye kandi yakuziye kugirango ubashe guhorera musaza wawe wishwe nk’imbwa azize akarengane!" Ubwo Sabine akimara kumva ayo magambo ntiyatumye Rugira arangiza kuvuga ayandi, nuko abaza Rugira ati:"ubwo ushatse kuvugako......." atarakomeza Rugira amuca mw’ijambo n’umujinya wose ati:"yego ibyo utekereza nibyo niko kuri kuko baduhereye kera none bageze n’ubu, ariko iki nicyo gihe kugirango twihorere kandi ndabona ari wowe ntwaro mfite ubwo umaze kumva agaciro ka musaza wawe witabye Imana!"

Nuko Sabine asubiza Rugira ati:"ariko nan’ubu sindumva icyo ushaka kuvuga nakweretse ifoto y’umukunzi wanjye ari kumwe n’umuryango we ariko wowe uranyibwirira iby’urupfu rwa musaza wanjye ukongeramo n’ibyo kwihorera ubwo urumva bizahurira hehe koko?" akomeza amubaza ati:" cyangwa wasaze nshake abantu tukujyane kwa muganga!" maze n’umujinya wose Rugira aramusubiza ati:" hasaze wowe wa kigoryi we kitazi gutandukanya ururo n’icyatsi none ukaba utangiye gucudika n’inzigo zo gacika amaguru zose!"

Nuko amarira abuga mumaso Sabine abaza Rugira ati:"ko wari wishimyese noneho bigenze bite ko uhise undakarira?" nuko Rugira aramusubiza ati:"none ko mbona utari gushaka kumva ibyo nkubwira uragirango nshimishwe n’iki ahubwo ko mba ngushishimuye iyo utaba mushiki wanjye!" akomeza agira ati:" ndagusaba kunyumva ugatera hejuru uragirango ngukorere iki kindi usibye kwiyahura nanjye nkisangira ababyeyi na mukuru wanjye kombona Sabine bansigiye ambereye ikigeragezo!"

Akomeza agira ati:”uriya muryango si abantu beza! dore ubwa mbere uriya mugabo yanyirukanishije kukazi,none yagonze mukuru wanjye none nawe watangiye gukundana n’iriya nyeshyamba yabo ngo ni Simeon? Ubwo urumva hari ikiza agushakira usibye kukugirira nabi ndetse akakwica umuryango wacu ugacika!" maze n’agahinda kenshi ndetse n’amarira kumaso Sabine aramusubiza ati:"ndabizi Simeon ntiyabikora!" nuko Rugira aramusubiza ati:"Ceceka kandi wumve ibyo nkubwira nonaha!" akomeza amubwira ati:" nutumva ibyo nkubwira ugomba kunkorera ndahagarika amafaranga y’ishuri nkwishyurira kandi ndakwirukana iwanjye ujye kuba indaya nk’izindi zose ndabona aribyo wahisemo!" Maze Sabine atangira kurira!

......Ubwo Rugira yabonye gutera ubwoba Sabine bishobora gutera ibindi bibazo aho kumugeza kucyo yashakaga maze abwira Sabine ati:"mwana wa mama urabiziko ntakwanga, kandi urabizi ko ntawundi muvandimwe nsigaranye usibye wowe maraso ya data na mama!" akomeza agira ati:"ababyeyi bacu bakiriho bahoraga badutoza umuco wo kubahana no gukundana batibagiwe no gutabarana ndetse no kugirana inama,ubwo rero ntega amatwi ijambo nkubwira nturisige aha!" Sabine ntiyatinze kumubwira ati:"urabiziko ntakwanga umpana cyangwa ungira inama ndetse nkubaha mumwanya wa data, ngaho mbwira ndakumva Rugira rwa data na mama"

Nuko Rugira aterura amagambo aramubwira ati :" hari kera nko mumyaka umunani ishize,wigaga mumashuri abanza,uriya muvandimwe wazize impanuka yigaga mumashuri yishumbuye,yitegura gusoza ikiciro cya kabiri cy’amashuri yisumbuye,njyewe nari animateur kukigo kimwe cy’ishuri naho papa w’uriya muhungu wita cherie wawe yari umushoferi (chauffeur/driver) w’ikigo nakoragaho ubwo rero……" atarakomeza Sabine ahita amuca mu ijambo aramubaza ati:"nonese ko numva wari umurenzeho kandi umurusha umwanya mwiza umbwira ute ko yakwirukanishije?" nuko Rugira aramusubiza ati :"nyine nibyo nakubwiraga ko yabonye uriya muvandimwe aje iwanjye aho nacumbikaga kuko urabyumva ko nabaga mukigo agahamagara umuyobozi w’ikigo akambeshyera ko ninjije umukobwa w’umunyeshuri aho mba bigatuma banyirukana!"

Ubwo Sabine yabaye nk’ucecekaho gato maze aramubaza ati:" nonese ubwo ubuyobozi bwapfuye gufata icyemezo cyo kukwirukana gusa bushingiye kumagambo babwiwe ntagihamya?" nuko Rugira aramusubiza ati :" umva nawe ra yari yabiteguye kare byose kugirango abone uko angusha mucyaha!" maze Sabine aramubaza ati:" atese?"

Rugira akomeza agira ati:" nari nanze kukubwirako mbereko uriya muvandimwe aza yari yasinze kandi yaje nijoro!" nuko Sabine yongera kumubwira ati:"ariko nan’ubu ndumva ntaho bihuriye n’ibyo umbwira!" ariko Rugira akomeza amubwira ati :"nyine izo nzoga yari yaziguriwe na se w’uriya muhungu kandi yari yazimuhaye aziha n’undi mwana w’umukobwa nuko abonye umuvandimwe aje ahita abwira uwo mukobwa ngo amukurikire ariko kuko uwomukobwa yari yanyonye ntiyabashije kwinjira iwanjye ahubwo yatoraguwe kw’irembo ry’amacumbi y’abakobwa mugitondo nuko baherako bemezako arinjye wabikoze kuko hari uwanshinjaga icyo cyaha!"

Nuko Sabine aramubwira ati:"ngaho komeza numve uko byagenze!" akomeza amubwira ati:"nyine baragenzuye basanga akendake k’imbere ntako yambaye barebye basanga kari imbere y’icumbi ryanjye bituma bavugako ari njye wabikoze!" nuko Sabine yongera kumubaza ati:"nonese ntabipimo kwa muganga bamufashe?"nuko Rugira yikorozaho gato arasubiza ati:"ubwo nyine baramupimye!" ariko Sabine yongera kumubaza ati:"ubwose byagufashe gute?" na we aramusubiza ati:" ubwo nyine bari bantetseho imitwe bansaba kuzana ako kambaro nuko muganga apimye aho kubona ibikumwe by’uwakoze ayo mahano abona ibyanjye watumwe kuzana ako kambaro!"

Iwacu murugo ubwo mama yari akimara kumva inkuru y’uko twishimiye ifungwa rya Dr.Ngabo yarirutse akigera munzu aho papa n’insuti ndetse n’abaturanyi bari ahita ababwira ati :"nimuceceke noneho munyumvire ibyabaye!" nuko bose bacecekera rimwe maze papa aramubaza ati :"habaye ikise kandi?" nuko mama arababwira ati:" reka ahubwo ni ishyano ryaguye!" nuko mama akivuga atyo telefoni (telephone) ya papa ihita isona nuko arayitaba yumva umuntu amubwira ati:" amakuru muze!?," ahita akomeza amubwira ati :" wananiwe kubikora ariko njyeweho nzabyikorera kandi neza naho wowe utamfasha mfite abazabimfashamo!" nuko ahita akupa telefoni(telephone)

...Ubwo Papa yakomeje kwinginga uwo muntu ngo amwibwire nuko yumva uwomuntu arasetse hanyuma aramubaza ati:"koko ntiwamenye?!" akomeza agira ati:"birumvikana ko utamenye kandi sinakurenganya kuko uwamenya ni umwe mubahungu bawe kuko ntekerezako bo bamenye urugamba natangije banshyigikira!"nuko njye na Ephrem baduhamagara byihutirwa badusaba ko twavuga ikihishe inyuma y’ibyari biri kuba muri ako kanya ariko tubabwirako natwe twaguye mukantu,ariko mama akomeza kuvuga ati:"oya barabizi kuko ntakuntu baba bari kwishimira ifungwa rya Dr.Ngabo ngo......!" atarakomeza muzehe ahita amubwira ati:["subiramo uvuze ngo ifungwa rya Dr.Ngabo?,yafunzwe nande?"]

Nuko mama aramusubiza ati:"njyewe byandenze kuko aba bahungu bawe bombi nibo bambwiyeko Dr.Ngabo afunze ariko ntibambwiye icyo afungiwe cyangwa uwabahaye ayo makuru ariko bakwibwirira kuko ngaba barahari!" ubwo Ephrem ntiyigeze atinda yahise atangira kubabwira ati:["muby’ukuri natwe dutangajwe n’uwo muntu uvuze ati:"nzabyikorera ndetse dutangazwa n’ukuntu mama abihuje n’ifungwa rya Dr.Ngabo!"} akomeza agira ati:"ariko icyo ntabura kuvuga cyo ni uko Dr.Ngabo afunzwe kandi ayo ni amakuru yizewe nahawe na Dr.Anasthase ariko sindamenya ikintu afungiwe na ho impamvu yatumye twishimira ifungwa rye ni uko umuntu ashobora guhita afatiraho agatanga ikirego cy’uburyo papa yaciwe ukuguru kandi ibizamini by’abandi baganga byerekanako yari atangiye gukira!"

Ubwo muzehe yari yicaye yiturije asa n’udashaka kuvuga byinshi,ariyumvira ariko aho bigeze aravuga ati:"uko bimeze kose bana banjye muragenda munyerekako mugenda muba abantu babi!" akomeza agira ati:" nubwo ntemeranya namwe ko gucika akaguru kwanjye ari Dr.Ngabo wabigizemo uruhare,kandi n’iyo yaba we ntimwemerewe kwishimira ingorane z’abandi nk’uko mutemerewe kwihorera kuko amategeko y’Imana n’ay’igihugu cyacu ntabwo abyemera!"

Sabine we yari yakomeje kumva inkuru ahabwa na Rugira ijambo rikaba ryarindi ngo:"Oya Simeon ntiyabikora ndamuzi neza kandi niba papawe yaragize uruhare mubibazo by’umuryango wacu wahuye nabyo,njyewe na Simeon turahari ngo tugire uruhare mugutuma imiryango yacu yiyunga!"Rugira yaramubwiye ati:"nukuri kuva navuka mbonyeko hakiriho abantu bafite urukundo kandi nyarwo!" akomeza agira ati:" sinari nziko mfite mushiki wanjye ufite umutima ukomeye gutya!,ahubwo iyo uza kwibera umusirikare kuko nta rugamba wari kuzigera utinya kujyaho!" nuko Sabine yumvise ayo magambo abaza Rugira ati:"Nonese uyobeweko bavuga ngo :" ibindi byose bizashira ariko urukundo ruzajya imbere!?"

Maze Rugira ahita avugana umujinya mwinshi ati:"ceceka aho wakagoryi we aho ntiwumvise mvuga ngo :"ufite umutima ukomeye ukagira ngo nagushimye?" yongeraho ati:"Ese ubwo usanze uwo wita umukunzi wawe abaye atagukunda nk’uko ubitekereza wabyifatamo ute?" arongera ati:" umva rero nkubwire: " wabyumva utabyumva ugomba gufata umutima ukomeye nakubwiye ukaworosaho urukundo rw’ikinyoma maze tukabasha kwihorera!"

Maze Rugira ahita ahaguruka nk’uwivumbuye yinjira mucyumba cye, Sabine ahaguruka amukurikiye amubwira ati:"ndakwinginze Rugira uvuze byinshi mubuzima bwanjye ntugire ikibi ukora utababaza umuvandimwe wawe!" nuko Rugira ahita asohokana agacupa agahereza Sabine aramubwira ati:" Iyi ni aside (acide) !"

Kanda hano usome igice cyabanje
Ntuzacikwe n’igice kizakurikira!

Yanditswe na Ndayisaba Simeon.

Yisangize Inshuti.

Ibitekerezo 1

Tanga Igitekerezo