AMAHIRWE ABONEKA RIMWE (Igice cya Cyenda)

2

Mu gice giheruka twasize Brenda atandukanye na Simeon ku buryo budasobanutse nyuma yuko Nkusi yari abatunguye akabasangana! Kurikira uko iyi nkuru yakomeje kugenda.

Ubwo Brenda yari agiye nasigaye nibaza mumutima wanjye nti:"ese naba nakoze iki gitumye yivumbura akigendera" nararebaga nkabura ikosa naba nakoze ariko Nkusi arambaza ati:"Simeon uriya mukobwa muraziranye?" ndamusubiza nti:"Nonese urumva twaba tutaziranye akaba yaje kunsura?"

Nuko ameze nk’urakaye arambwira ati:"ariko uziko abakobwa ari ababeshyi?" ndamubaza nti:"ese kubera iki" nuko aransubiza ati:"Simeon ntunguwe no gusanga uriyamukobwa hano kandi yavuye kukazi ambwirako agiye gusura umukunzi we (cherie/honey) wakoze impanuka ya moto yamugonze none mbabajwe no gusanga yiyiziye hano mugihe twebwe akazi kari katwishe!"

Ubwo nacecetse akanya gato nitegereza Nkusi nuko mumutima ndibwira nti:"ibuye rimwe rirashe inyoni ebyiri!" ubwo navugaga ko nsobanukiwe impamvu yarebanaga na Nkusi batavuga ndetse menya ko inzozi zanjye zo kumwegukana zigiye kuba impamo maze nkamutuza mumutima wanjye ubudatuza dore ko nanjye numvaga nifuza ko twahuza akanyibagiza Sabine.

Nakomeje kwitegereza Nkusi nuko mwenyuramo gake ndetse nzunguza umutwe maze Nkusi arambaza ati:"nonese bigenze bite?" nuko nzamura ikabutura mwereka ivi ryanjye ryari ripfutse nuko ndamubwira nti:"nonese urabona uriya mwana w’umukobwa yakubeshye?" maze Nkusi arivugisha ati:"ndarota cyangwa?" akomeza agira ati:" muvandi wabaye iki? None se ko utambwiye?

Ubwo Nkusi yarambwiye ati:"Gusa niba uterekwa urahanura!" maze numva sinumvise neza icyo ashaka kuvuga maze ndamubaza nti:"kubera ikise?" maze na we aransubiza ati:"banza umbwire ibyawe n’uriya mukobwa nanjye ndaza kukubwira icyo nashakaga kuvuga!"

Ubwo nabwiye Nkusi nti:"muvandi,ibyo uriya mukobwa yakubwiye,hafi ya byose ni ukuri kuko ejobundi nari ndi muri sport ndangije akazi maze sinzi ukuntu moto yangonze mera nk’ubuze ubwenge ubwo naje gushiduka ndi mubiganza by’uriya mukobwa,yaransindagije angeza hano gusa sinari nashoboye kumenya izina rye ahubwo anyibwiye nonaha gusa numva mukunze ariko mfite ubwoba bwo guterwa indobo!"

Nkusi yarambwiye ati:"Simeon sinzi icyo nakubwira gukora gusa icyo nkubwira ni uko ashobora kuba agukunda!" yongeraho ati:"ibisigaye wifatire umwanzuro ntabwo uri umwana!’ maze nanjye ndamubwira nti:"Brenda yangiriye neza yakijije ubuzima bwanjye kandi numva andi hafi n’iyo ntamureba gusa iyo ntekereje numva nifuza kubana nawe iteka ryose!" maze aransubiza ati:"wowe kora icyo umutima nama wawe ukubwira!" maze nanjye ndamubwira nti:"ok,maze kukubwira ibyanjye nawe mbwira impamvu ya bimwe wambwiraga!"

Nkusi ataragira icyo avuga nagiye kumva numva telephone yanjye irasonnye nuko ndebye mbona ni Brenda nuko ndamwitaba maze arira arambaza ati:"Simeon ningusaba imbabazi urambabarira?" nuko ndamubwira nti:"ntanakimwe ntakubabarira kandi warakijije ubuzima bwanjye mbese nyuma y’umucunguzi uri uwa kabiri!" nuko arambwira ati:"umbabarire kuba ntashoboye kugumana nawe nubwo nanjye nabyifuzaga!"

Namuteze amatwi nuko ansobanurira nk’ibyo Nkusi yambwiye hanyuma arambaza ati:"nonese urambabariye ?" nuko nanjye ndamusubiza nti:"nanjye umbabarire kuba ntashoboye kubungabunga umutekano w’umwari utuje wuje ineza mumutima kandi umbabarire kuba nananiwe kuguhuza na Nkusi kugirango dusobanukirwe impamvu ya buri wese kumyitwarire yagize!" nuko Brenda arambwira ati:"Simeon ko nshaka ko ejo tuzabonana uzambonera umwanya?"

Ubwo Nkusi yakomeje ambwira ati:"urabiziko ntigeze nimuka hahandi twabaga kandi uribukako hegeranye n’aho Sabine atuye?" ndamusubiza nti:"nonese ibyo bihurira hehe no kwerekwa cyangwa guhanura wambwiraga?" nuko arakomeza ambwira ati:"Simeon maze igihe mbiguhisha kugirango ntaguha amakuru atariyo ugasanga binkozeho cyangwa bitumye umubano wacu uzamo agatotsi" ndamubaza nti:"ibikise?"

Nkusi arambwira ati:"uziko ubungubu Sabine atakiri wenyine ahubwo asigaye afite umukunzi?" maze aho nari nicaye nkoma amashyi ndavuga nti:"byiza cyane ntiwumva inkuru nziza ahubwose uwo ni inde?" maze Nkusi aransubiza ati:"Simeon ntawundi ni Ephrem mukuru wawe kandi amusura buri munsi!" maze ndamubaza nti:"Ephrem?"

..Nakomeje kuganira na Nkusi mubaza niba ibyo ambwira byaba ari byo gusa ntinda kubyemera kuko numvaga nubwo Ephrem yansabye gusaba imbabazi Sabine atashobora kwihanganira gukundana na we kandi azi neza ibyo musaza we yakoreye papa! gusa njye kuko nabonaga bumaze kwira ibyo sinakomeje kubyitaho ahubwo naribazaga nti:"ariko buracya ryari ngo njye kwiyumvira icyo Brenda anshakira?

Nkusi yarambajije ati:"Simeon ubu washobora kugera kumuhandase ngo turebe ukuntu twajya gufata akantu mbonereho kugufata mumugongo kuko watewe gapapu na mukuru wawe?" naramusubije nti:"nagerayo ahubwo tugiye kwishimira insinzi ya Sabine kuko birangiye atsindiye kwibanira na mukuru wanjye!" ubwo twahise tugenda twavuye mukabari bwije kuburyo icyo nari ntegereje cyari uko bucya nkajya kongera kwihera ijisho uburanga burangaza abagenzi bwa Brenda umwari utagira uko asa !

Igitondo cyakurikiyeho nakangutse bwakeye ari nka saa yine nuko nkangura Nkusi ndamubaza nti:"ese noneho ntujya kukazi?" nuko aranseka niko kumbaza ati:"Ese Simeon ntukibuka iminsi?" arongera ati:"uyobeweko uyumunsi ari kuwa gatandatu?" maze n’ikimwaro cyinshi ndamusubiza nti:"mwana jya ureka numvagako akazi kanyu no muri weekend gakorwa kuko amakuru ahoraho"

Uko amasaha yakomeje kwegera imbere numvaga atagenda gusa nkakomeza kwitegura ntegereje telephone ya Brenda kugirango duhure numve icyo anshakira!, ubwo nkiri muri ibyo nagiye kumva numva telephone irasonnye maze nyikura mumufuka nihuta ngira ngo ni Brenda ariko nsanga ni muzehe umpamagaye maze numva ntibinshimishije ariko ndamwitaba kuko ni we muntu numvaga nkunda mubuzima bwanjye kuko nari naremeye kureka Sabine kubera akaguru ka papa!

Ubwo telephone narayitabye maze atangira kumbaza amakuru yanjye nanjye musubiza ko usibye impanuka nagize ntakibazo ndetse mubwirako ndi kugenda noroherwa maze arambaza ati:"ese ibyo mukuru wawe yakubwiye ubyumvaho iki?" nuko nanjye ndamusubiza nti:"erega Ephrem tubwirana byinshi ubwo rero sinamenya ibyo umbaza!"

Ubwo muzehe yafashe umwanya wo kunsobanurira ibijyane na Sabine ndetse n’umuryango we ariko nongera kumubwira nti:"erega muzehe icyo ntabura kukubwira nuko Sabine namubabariye ariko kongera gukundana na we ntabwo nabishobora nkibona ucumbagira!" maze na we arambaza ati:"nonese Imana yo ibasha ite kukwihanganira ibona ucumura kandi udashaka kwihana!" maze ntangiye kurya iminwa arambwira ati :"ejo urakenewe murugo kandi birihutirwa!" maze arakupa.

Noneho Brenda yarashyize arampamagara maze ansaba guhurira nawe mubusitani (Garden/Jardin) bwa hotel yoroheje yari iri hafi y’iwanjye,ubwo nahise numva ntazi ibyo anteyemo maze ntega tax-voiture yihuse, ngezeyo nasanze yantanze kugerayo maze ndamwegera mugwamo numva aramfashe aramperanye ariko ntiyavuga nuko ndebye neza mbona amarira aramutemba kumaso nuko muhanaguza ishati yanjye mbona aramwenyuye mumutima ariko nkomeza kwibaza impamvu yabyo.

Narebye kuruhande maze mbona agatebe ntekerezako ari ako yanteguriye ariko ngize ngo nkicareho arambuza maze arambura agatambaro yari afite hasi maze arambwira ati:"Simeon mbabarira wicare aha kuko ariho naguteguriye!" maze ndamubwira nti:"Oya Brenda,agatambaro kawe karacyeye kandi ni umweru ubwo rero sigaho ntakanduza!" ariko arambwira ati:"nabikubwiye nzi neza ko kaza kwandura ariko ndagirango nkumenyeshe ko kuva nakumenya nifuje gukora isuku kukintu wakoresheje!"

Nanjye nk’uwikinira naramubajije nti:"nonese ugiye kumbwirako wambonyemo umunyamwanda?" aransubiza ati:"Simeon sicyo nashatse kuvuga ahubwo navuzeko numva nifuje kugukorera buri kimwe naho yaba isuku!" nuko nongera kumubwira nti:"Brenda have ntakwanduriza agatambaro!" nuko amfata ibiganza byombi amanura gahoro maze ndamwemerera ndamanuka maze mpita niryamira kuri ako gatambaro ndamubwira nti:"urakoze mukunzi w’ibihe byose!"

Ubwo ibyo yari yatumije byarahageze dutangira kwisangirira dutamikana umwe kuwundi turebana amaso kuyandi maze nkumva nguwe neza kuburyo ntifuzaga ko bwira kuko nishimiraga kwigumira iruhande rwe maze ndamubwira nti:"Brenda wampa amahirwe yo kuguhindurira icyiciro maze nkaguha ikicaro mumutima wanjye ngo uhiturire ubudasimburwa!" maze aransubiza ati:"Simeon nasomye urwandiko wanyandikiye ukoresheje amaso yawe kandi naragusubije!"

Nuko ndamubaza nti:"ariko nanjye ndagirango unsubize ukoresheje umunwa nk’uko nkubajije nkoresheje umunwa!" maze arambwira ati:"urabizi ko nakubwiye ko ntacyo ntagukorera ariko ndakwinginze gabanya kunkunda kuko ahari nubigabanya nanjye nzakwikuramo!" maze numva arantangaje niko kumubaza nti:"kubera iki se?" aransubiza ati:"Brenda afite umutima ukunda ariko umenye ibye ntiwamukunda!"

Ubwo nakomeje kumwinginga ngo ambwire impamvu ariko bigeze aho arambwira ati:"ntacyo nkubwiye keretse nunsezeranya ko tuzajyana nkajya kukwereka mama na papa!" ndamusubiza nti:"niba wowe wemeye ntakibazo ababyeyi nzabasanga mbarebe " maze mbona yongeye kurira!”

NTUZACIKWE N"IGICE KIZAKURIKIRA

KANDA HANO USOME IGICE CYABANJE
Yanditswe na Ndayisaba Simeon

Yisangize Inshuti.

Ibitekerezo 2

  1. yewe kugeza aho ndumva aribyiza gusa impamvu iriza uriya mukobwa ntizabe mbi kuko bya bishya igice gikurikiye ho kandi courage kabisa!

Tanga Igitekerezo