AMAHIRWE ABONEKA RIMWE (Igice cya Cumi)

6

Mu gice giheruka twasize Brenda avuga ko Simeon namenya ababyeyi be ashobora kudakomeza kumukunda, gusa Simeon we yari amwemereye kuzajyana na we kubareba. Byaje kugenda bite? Kurikira iki gice!

.....Ubwo murugo twari twicaye turi kwiganirira nyuma yo gufata ifunguro rya kumanywa (saa sita) ariko Ephrem ntiyari ahari nuko mama arambaza ati:"Simeon mwana wanjye,urabona ari njyewe ari na papa wanyu turashaje none ntabwo muri gushaka abagore ngo mutwereke ibirori, ese koko murabona tuzabafasha iki nitumara gusaza cyane tugacika intege?"

Narakebutse maze ndeba uruhande mama yari yicayemo nuko ndamubwira nti:"mama urihuse cyane wagirango muri kunyirukana murugo rwanyu kuko ndumva ibyo mwagombaga kubibwira Ephrem kuko niwe mukuru kandi ni na we wabonye akazi mbere yanjye!" nuko muzehe yisekera arambaza ati:"nonese Simeon isezerano wagiranye na Ephrem ko muzakoreshereza ubukwe umunsi umwe wararyibagiwe?"

Naratekereje numva iyo ni ingingingo muzehe anteye nuko ndamubwira nti:"ariko igihe kiracyahari kuko Ephrem ntamugore yari yazana yewe ntan’umukunzi yari yerekana ubwo rero iyaba ariwe umbwiye ko yabonye umugore mba ngize ikibazo!" ndongera nti:"ariko kandi niba yarababwiye ko amufite nanjye rwose ni vuba aha nkamubereka kandi ndabizi neza ko muzamwishimira!

Mama yarebanye na papa maze mbona barasetse nuko mama arambaza ati:"ariko usigaye uri umukinnyi w’amakinamico?" maze nanjye ndamubaza nti:"kubera ikise?" nuko papa ahita avuga ati:"nawese uyumunsi wakundanye na mushiki wa Rugira hadaciyemo n’iminsi ingahe ngo wakunze undi, urumva iyo atari ikinamico uri kudukinira?" maze mama yongeraho ati:"ahubwo buretse Sabine bamugutware abana bazi icyo gukora ndebe ukuntu usigara wimyiza imoso!"

Nkiri muri ibyo numvise telephone yanjye isonnye maze ndayishaka ngo nyitabe ariko nkomeza kuyibura maze nkomeje kwitegereza mbona iri iruhande rwa mama nuko arayimpereza arambwira ati:"inshuti ya kera iraguhamagaye!" maze nshaka gusohoka ngo njye kuyitabira hanze ariko abo mu rugo bampuriraho bansebya bati :" kuki ugiye kwiherera ngo muvugane!" barongera bati::"oya niba utamukunda mwitabire hano turebe ikimwaro ufite "ariko njyewe ntabwo nari namenye uwo ari we, nuko ndebye mbona ni Sabine maze arambwira ati:"Simeon Rugira arashaka ko muvugana"

Ubwo nitabye telephone nyishyira haut parleur (loud speaker) nuko Rugira arambwira ati:"ndabizi ko Sabine yakubwiye ibyanjye byose kandi nziko ukimara kubyumva wandakariye ari na cyo cyangirije umubano wawe na Sabine!" arongera ati:"ndabizi ko wamwanze kandi ndakeka ubu waramwikuyemo gusa umbabarire kuko nahagaritse urukundo rwanyu,mpora ninginga Imana ngo izambabarire nubwo utabana na Sabine byibuze muzaturane cyangwa muzajye musuhuzanya nk’abaziranye kuko mbonye mubanye nabi byambabaza kuko arinjye ntandaro ya byose!

Nabwiye Rugira nti :"humura!" ntarakomeza arambwira ati:"ndakeka ubizi neza ko Sabine ubu afite undi mukunzi gusa ndakwinginze umbabarire kandi ubikuye kumutima" nuko ahita akupa maze papa arambaza ati:"noneho watangiye kumva ibyo twahoze tukubwira?" maze ndamusubiza nti:"papa ubwo wamubabariye nanjye ndamubabariye ariko sinzakomeza gukundana na Sabine kuko nawe uracyacumbagira!" nuko mama arambwira ati:"burya wabeshyaga ntambabazi wigeze umugirira"

Ephrem yahise yinjira munzu nuko abwira papa na mama ati:"hanze hari umuntu ubashaka kandi ngo abafitiye ubutumwa bwihutirwa!" ubwo papa yaramubwiye arinjira maze tubona ni umugore umuze neza ushobora kuba ari uwo mumuryango wishoboye kubera ukuntu yari yambaye n’uburyo yari akeye maze aricara aravuga ati:"ndahamya ntashidikanya ko hano ari kwa muzehe Rutazihana !" nuko papa aramusubiza ati:" yego,ntiwayobye"

Ubwo umugore yakomeje avuga ati:" birashoboka ko mutamenye" arongera ati:"Nitwa Betty nkaba ndi umugore wa Dr.Anasthase " ubwo abagize umuryango twabaye nk’abikangamo ariko muzehe aratubaza ati:"mubaye iki ko mbona mutangaye?" maze abwira uwo mugore ati:"komeza nguteze yombi!"

Nuko uwo mugore akomeza agira ati:"nashoboye kumenya ko mwahoze muvuga ubutumwa muri gereza umugabo wanjye afungiyemo, sinashoboye kuhagera usibye ko nta kindi nari kuhakora usibye kuba nasaba umugabo wanjye akagusaba imbabazi kubera ibyo yagukoreye ariko kandi nubwo atabikoze njyewe umutima umpatira gusaba imbabazi murwego rw’umuryango kuko ndifuzako iri ryaba itangiriro ry’umubano hagati y’umuryango wanjye n’uwanyu!"

...Hashize igihe kinini mbaza Brenda ikibura ngo anyiyegurire wese kuko njye nari narakwamye kandi ibya Sabine na Ephrem byari bigeze kure kuburyo biteguraga kurushinga kandi bari bashyigikiwe na Rugira ndetse n’umuryango wanjye.

Icyogihe nahamagaraga Brenda tukaganira nkamwinginga nti:"Brenda narahiriye imbere y’Imana n’imbere yawe konzagukunda kandi nkakuba hafi mubihe byose kandi ntazigera nkureka ndetse usibye kukureka sinabitekereza" ariko igisubizo cye kikaba cyakindi ngo:"erega sindi uwo gukundwa cyeretse nubanza ukareka nkakwibwira neza kandi ukanyemerera tukagira ahantu tujyana kandi nkagira ibyo nkwereka!"

Yakomezaga agira ati:"ni ukuri ndagukunda kandi sinigeze gukunda undi nkawe ariko mfite icyasha kintera guhorana ubwoba ko umunt nkawe atankunda!" Nakomeza kumwinginga mubwira nti:"Ibyo ubona nk’ingorane nzafatanya nawe kuzikuraho kandi icyo wita icyasha nakigeneye ibahasha yuzuye urukundo kandi nziko uzizera nezako ngukunda numara gucurura!"

Nakomezaga kumwereka urukundo no kumwitaho gusa ntibyari binyoroheye kuko akenshi twabaga twishimye najya kubona nkabona ararize ariko nkagerageza kumwihanganisha mpangana n’impamvu ntazi zituma arira, gusa byagezeho arambaza ati:"harya ntiwambwiyeko aho nshaka ko tujyana tuzajyanayo?" nuko nanjye ndamusubiza nti:"cyane rwose!" nuko arambwira ati:"kenyera witegure kuko ejo tuzajyana njye kugira ibyo nkwereka"

Sinitaye kubyo yashaka kunyereka ahubwo inkoko nayiraye kw’ibaba,sinjye wabonye bucya nuko njya kumureba nuko mugitondo njya kumureba nuko ngeze iwabo arambwira ati:sha usanze mama yagiye mukazi ariko ngwino tujye hahandi nakubwiraga" ubwo twafashe imodoka gusa ngenda nibaza ahantu anjyanye gusa mumutima nkibwira nti:"buriya ni surprise ashaka kunkorera!"

Ubwo twafashe urugendo ngiye kubona mbona twerekeje kuri gereza nuko nkomeza kwibaza impamvu yabyo gusa ndibwira nti:"nyiramaso yerekwa bike ibindi akibonera reka tugereyo ndebe icyo ashaka kuvuga!" nuko turagenda tugezeyo turategereza gusa namubaza icyo twaje gukora akarira ariko akambwira ati:"tegereza hari icyo nshaka ko umenya!"

Ubwo umwanya wo gusura warageze mbona haje umugabo wambaye imyambaro y’abagororwa nabonaga akuzemo gusa ntibyari bikabije,uko yazaga anyegera niko narushagaho kumwitegereza nkabona wagirango ndamuzi gusa yaraje asuhuza Brenda ati:"uraho mwana wanjye?" nuko Brenda amusuhuza n’amarira menshi hanyuma aramubwira ati:Papa suhuza n’umushyitsi nakuzaniyese!"

Ubwo yarahindukiye dukubitanye amaso twembi turikanga nuko aravuga ati:"wowe nturi mwene Rutazihana?" ndamusubiza nti:"yego" nuko ahita asubira muri gereza yirukanka.

NTUZACIKWE N"IGICE KIZAKURIKIRA

KANDA HANO USOME IGICE CYABANJE

Yanditswe na Ndayisaba Simeon

Yisangize Inshuti.

Ibitekerezo 6

Tanga Igitekerezo