AMAHIRWE ABONEKA RIMWE (Igice GISOZA)

7

Namaze umwanya nibaza ibibaye kuri telephone ya Brenda ariko nyuma nibuka ko nasize abantu munzu, ngaruka nisetsa nuko nkomezanya n’abandi gahunda zo kwishimira ko Ephrem agiye gusezerera ubusore, nuko ibirori bihumuje abataha baraherekejwe maze nanjye nigira kuryama ariko gahunda ari ukuzindukira kureba umwana wantwaye uruhu n’uruhande.

Mugitondo nazindutse njya kureba Brenda wanjye, nuko ngezeyo banyakira neza maze, baranyishimira, mbese bankorera ibyo umukwe akorerwa ageze kwa Sebukwe.

Mama wa Brenda yaraje aransuhuza ampa ikaze nk’umukwe wabo maze atangira kumbwira ati: "mwana wanjye umbabarire kubyo uzi byose byabaye hagati y’imiryango yacu kandi unambabarire kubyaraye bibaye kuko numvishe mfashwe n’ibinezaneza ntazi iyo bivuye maze nanirwa kwihangana ndigendera kugirango mbone ukuntu nshimira Imana kuko isubije ibyifuzo byanjye!"

Yakomeje ambwara ati:"mu byukuri Brenda yajyaga ukumbwira ariko nkumva bitazashoboka guhura nawe kuko twahoraga duterwa ipfunwe n’ikibazo uzi kiri hagati y’imiryango yacu!" maze nanjye ndamusubiza nti:"Nibyo koko biragora ariko ikiza ni uko twabagarira urukundo kurusha inzangano kandi nzi neza ko amaherezo icyiza gitsinda ikibi!"

nkimara kuvuga gutyo twumvise hari umuntu ukomanze maze Brenda ajya kumukingurira maze twumva arasakuje ati:"yeeh ni cya Nkusi!" nuko aramusuhuza ndetse anamuha ikaze.

Ubwo twakomeje kuganira muri rusange ariko Nkusi ahita atubwira ati:"nizereko inama z’ubukwe zatangiye!" maze Brenda aramusubiza ati:"ariko Nkusi wagiye ureka koko ! ubukwe aka kanya kweri?" akomeza agira ati:"koko yamagambo yawe yo kukazi urayasubiriye!" nuko Mama Brenda aramubwira ati:"usibye ko ntakibazo kibirimo!" maze Nkusi abwira Brenda ati:"ubu rero wowe n’umukunzi wawe naje kubakoraho igice cya kabiri cy’inkuru natangiye!" maze tumubariza icyarimwe duti:"Inkuru ki? ahubwo se wayitangiye ryari?"

Maze na we aradusubiza ati:"hari inkuru natangiye kwandika yitwa urusobe rusobanutse kandi igomba kwibanda ku bintu byabayeho,ubwo rero namaze kuvugana na Sabine ndetse na Ephrem bampa amakuru ku ruhande rwabo, none ndifuza ko namwe mwaboneka muri iyo nkuru kugirango ibe yuzuye kandi nimwaburamo sinzayitangaza!"

Brenda yahise asubiza ati"ntakibazo niba wumva hari ikintu yahindura ku muryango nyarwanda!" nuko Nkusi arahindukira ati ko mbona umugabo wawe ntacyo aivugaho?
Arashaka kunyima amakuru? Maze nanjye musubiza mumara impungenge nti niba wemeza ko ndi umugabo wa Brenda ibyo yasubije ntacyo nahinduraho kuko ndi urugingo rumwe mu zimugize, ubwo rero igihe yasubizaga najye namuvugiyemo kuko muri mo na we akambamo!!

Nkusi yahise amara impungenge Brenda ko iyo nkuru igamije guhindura byinshi ku muryango nyarwanda, ati:"ibyo nzatangaza muri iyi nkuru ntakibazo kandi reka mbanze mbumvishe ibyo abambere bavuze"

Nkusi yafunguye amajwi yafashe Ephrem na Sabine nuko arayatwumvisha.

Twamaze kuyumva twumva nta kibi bavuzemo nuko natwe twemera kugira icyo tuvuga maze atangirira kuri Brenda aramubaza ati:"Esse nyuma yo kumenya ko Simeon ari mwene Rutazihana akaba yarabenze Sabine amuziza ko avukana na Rugira ntakibazo cyangwa ubwoba byaguteye ko ashobora kukwanga kandi wowe umukunda?"

Nuko Brenda aramusubiza ati:"muby’ukuri nkibimenya numvise ntaye ubwenge ariko nza kwibuka imvugo ivuga ngo ntawiyima kandi umwima ahari bituma nigirira icyizere!"

Nkusi yakomezje amubaza n’ibindi bibazo maze hakurikiraho njyewe.
Nuko nanjye arambaza ati:"Ese ukimara kumenya ko Brenda avuka ku muntu utumvikana na we kandi uzi neza ko watandukanye na Sabine noneho ukabona Se wa Brenda agukubise amaso arirutse watekereje iki?"

Ubwo nanjye naramusubije nti:"umutima waradishye ariko nihagararaho ndavuga nti:"ntakundi nyine niba ari ishyano narikoze usibye ko nabonaga ntacyo nishinja!"

Arongera arambaza ati:"nonese ukimenyako Sabine yakundanye na mukuru wawe wakoze iki cyangwa wumvise umerewe ute?" nuko ndamusubiza nti:"byaranshimishije kuko nari maze gucengerwa na gahunda zo kubabarira no kwiyunga, ubwo rero ntacyari kumbuza kwishima!"

Arongera arambaza ati:"Ese ntujya ukumbura ibihe byiza wagiranaga na Sabine?" maze nanjye ndamusubiza nti:"Burya umuntu yibuka ibihe nk’ibyo iyo ari wenyine cyangwa uwo bari kumwe atamunyuze,none njyewe uwo mfite anyibagiza ibyahise kandi anyumvisha ibyiza ntigeze kumenya! ndetse ubu nta kabuza kuko wabivuze vuba aha turabatumira mu birori by’ubukwe!!"

Yongera kumbaza ati:"ngaho ishyire mumwanya wa papa wawe abana bawe barahiye bakugira inama yo kwihorera, wari gukora iki?"

Narasubije nti:"mbonereho no kuvuga ko yampaye urugero rwiza nshobora kumenya nezako abaharanira gukora nabi n’iyo baba benshi ngomba kubumvisha uburyo gukora nabi atari byiza,ubwo rero mfite abana bagaharanira kwihorera nakomeza nkabigisha ibyiza kandi bagera aho bagahinduka kuko ikiza kinesha ikibi!

Nuko arambaza ati:"ese ntiwicuza kuba waranze Sabine?" maze ndamusubiza nti:"oya kuko nanyuzwe n’uwo turi kumwe!" maze arambwira ati:"Ngaho mbiza ukuri, uko byagenda kose Sabine azasoma iyi nkuru, abaye ari hano akumva ni iki wamubwira?"

Naravuze nti:"namwifuriza urugo ruhire kandi nkamwifuriza guhirwa mu muryango wacu!"

Arambwira ati:"Ngaho gira icyo ubwira abazakurikirana iyi nkuru!"

Ubwo naravuze nti:"muby’ukuri twaciye muri byinshi, nk’uko bigaragara urukundo rw’umukobwa n’umuhungu rushobora kuba intangiriro yo kwiyunga kw’imiryango yatandukanye, ariko kuba narananiwe kunga umuryango wanjye n’uwa Sabine byatumye nshobora kunga uwanjye n’uwa Brenda kandi nizeye ko njyewe na Brenda tuzashobora gutuma Dr.Ngabo atwiyumvamo nubwo akomeje gusa n’uduhunga azasyira adusange"

Ndongera nti:"kandi nk’uko nabivuze nananiwe kunga umuryango wanjye n’uwa Sabine ariko nabonye imbaraga zo guhuza uwanjye n’uwa Brenda ubwo rero n’ubwo njye nabonye amahirwe ya kabiri nabwira abazasoma iyi nkuru ugiye gukora ko AMAHIRWE ABONEKA RIMWE!" nuko Nkusi aradushimira ajya kunononsora iyo nkuru.

Natwe dukomeza kwipangira iby’urukundo rwacu n’uko tuzabana.

IHEREZO RY’INKURU!

Kanda hano usome igice cyabanje

YANDITSWE NA Ndayisaba Simeon

Yisangize Inshuti.

Ibitekerezo 7

  1. Turabashimira cyane rwose kubwo inama nziza mudahwema kutugezaho.Mukomereze ahorwose ni byiza.Icyinejeje cyane ni uko injury irangiye neza.ndetse ninyigisho rwose yari nziza rwose.

Tanga Igitekerezo