Umusirikare w’ubu ikidutandukanya ni imyenda gusa-Abaturage i Gicumbi

1

Abaturage bo mu Murenge wa Ruvune ho mu karere ka Gicumbi ubwo bifatanyaga n’ingabo mu gukora umuhanda Kuri uyu wa kane tariki 4 Gicurasi mu gutangiza icyumweru cy’ingabo z’igihugu (Army Week), bavuze ko basigaye bisanzuye ku ngabo z’igihugu ku buryo ikibatandukanya ari imyenda gusa.

Bamwe mu baturage ubwo baganiraga na Makuruki.rw bavuze ko bishimira ubwitange bw’abasirikari ba none bavuga ko babisanzuraho cyane.

Karuranga Pierre Celestin ni umwe mu basaza baganiriye na Makuruki.rw yagize ati : “Umusirikari w’ubu uretse iriya myenda yambaye intandukanya na we njye mbona ari mugenzi wanjye rwose kuko dukorana imirimo yose, turirirwana, baturwanaho mu buryo bwose.”

Mu gutandukanya ishusho y’umusirikari wa kera n’iy’uw’ubu undi musaza wo mu murenge wa Ruvune yagize ati: “Ubundi kera umusirikari twamubonaga aje muri konji ariko ab’ubu dukorana na bo cyane. Kera wabonaga imodoka y’abasirikari ikiri kure warayihishaga kuko iyo yabaga ikwegereye ikagucanaho amatara washoboraga no kuyigwamo kubera ubwoba. na ho ubu urayibona ikagutwara rwose, ab’ubu ni abana beza.”

Aba baturage bavuga ko kera nta muntu washoboraga kujya mu kabari umusirikari wa kera yicayemo ariko ubu ngo umusirikari arakubona akakugurira agacupa.

Gushima ubupfura bw’abasirikari byabaye ubwo bafatanyaga n’abaturage gusana ikiraro gihuza akarere ka Gicumbi ndetse n’uturere twa Gatsibo na Nyagatare.
Hamwe na hamwe mu duce tw’icyaro muri aka karere hagaragara ibibazo bitandukanye. Bimwe muri byo hari ibijyanye n’imihanda idatunganyije, ibiraro byangiritse,abaturage batagira ubwiherero n’ibindi.

Mu cyumweru cy’ingabo z’igihugu (Army week) cyatangiye kuri uyu wa Kane, Ingabo z’u Rwanda zatangiye gufatanya n’abaturage gufasha abo batishoboye, ndetse no gusana ibikorwa remezo byangiritse nk’ibiraro n’imihanda.

Lieutenant Colonel Claver Kirenga, Umuyobozi w’ingabo mu karere ka Gicumbi na Burera yavuze ko ubwitange n’ubufatanye bwa buri wese bukenewe kugira ngo barusheho kwiteza imbere.

Yagize ati :”ibintu nitwe tugomba kubyikorera ntabwo uzategereza abandi ngo baze bakubakire umusarane cyangwa ngo bagukorere ibikorwa nawe utabigizemo uruhare,iyo tutaza kwikorera ntituba tugeze aho tugeze ubu turabasaba ubufatanye kugirango tugire icyo tugeraho.”

Ubuyobozi bw’akarere ka Gicumbi buvuga ko hari byinshi buzungukira muri iki cyumweru ndetse akanashimira ingabo mu bikorwa bitandukanye by’iterambere bakunze kugaragaramo

Army week ubusanzwe yamaraga icyumweru ariko uyu mwaka ni umwihariko kuko izamara igihe kingana n’amezi atatu.Ingabo zifatanyije n’abaturage zizakora ibikorwa bitandukanye bigamije iterambere.

Mu karere ka Gicumbi iki gikorwa kikaba cyabereye mu kagali ka Rebero murenge wa Ruvune , aho ingabo zafatanyije n’abaturage gusana ibiraro byari byarangiritse muri uyu murenge .

Ingabo mu Karere ka Gicumbi zifatanya n’abaturage b’umurenge wa Ruvune mu gutangiza Army Week

Patrick RURINDA

Yisangize Inshuti.

Ibitekerezo 1

  1. Birumvikana.abasirikari ni benshi cyane kandi iyo bicaye ntacyo bakora bituma bshobora gutekereza gukora ikibi.Ni ukubaha ikibarangaza rero kuko nta ntambara ihari.Ntahandi ku isi ingabo zijya mumirima yabaturage cg kubaka amateme mu gihe cyamahoro....

Tanga Igitekerezo