Ubutumwa kubanya-Kayonza ,nyuma yo kwangiza ibiyobyabwenge

Ku itariki ya 19 Gicurasi, abaturage 380 b’umurenge wa Mukarange mu karere ka Kayonza bahawe ubutumwa bwo kudakoresha ibiyobyabwenge haba mu kubinywa, kubicuruza no kubikwirakwiza kuko bigira ingaruka nyinshi ku buzima no ku iterambere ryabo ndetse no ku gihugu muri rusange.

Ubu butumwa babuhawe nyuma y’igikorwa cyo kubyangiza cyari cyitabiriwe n’abaturage ubwabo, ubuyobozi bwa Polisi y’u Rwanda ikorera muri ako karere ndetse n’izindi nzego.

Ibiyobyabwenge byangijwe ndetse bigashyirwa ahabugenewe ni urumogi rungana n’ibiro 600, litiro za kanyanga 825, ibinini by’ubwoko butandukanye 1114, imiti ya gakondo amapaki 120, litiro 92 n’igice z’inzoga z’inkorano, ibikoresho byitwa insheke 30 byifashishwa mu guteka kanyanga n’ibindi. Byari byarafatiwe mu duce dutandukanye two muri aka karere mu minsi ishize.

Umuvugizi wa Polisi y’u Rwanda mu Ntara y’I Burasirazuba Inspector of Police (IP) Emmanuel Kayigi yahaye ubutumwa abaturage bwo kwirinda ibiyobyabwenge agira ati:” ibi biyobyabwenge biri ku isonga yo kuba nyirabayazana w’ibyaha nko gukubita no gukomeretsa, gusambanya abana, no gufata ku ngufu. Yabasabye kutabinywa, kutabicuruza, no kutabitunda, ahubwo bagaha Polisi y’u Rwanda amakuru y’ababikoresha.

Yagize ati:"Umutekano ni inkingi ya mwamba y’iterambere rirambye; ntacyo twakwigezaho tukibereye mu biyobyabwenge kuko ibikorwa by’umuntu wanyoye ibiyobyabwenge bibangamira ituze rya rubanda, akaba ari yo mpamvu bigomba kwirindwa kandi bikarwanywa na buri wese."

IP Kayigi yakomeje abwira abaturage ati:"Ingaruka z’ibiyobyabwenge harimo igifungo, no gucibwa ihazabu, kandi ibyafashwe nabyo bikangizwa, ibyo bikaba biteza igihombo gikomeye uwabifatanywe."

Yasoje abagira inama yo gucuruza no kunywa ibinyobwa byemewe n’amategeko kandi bidafite ingaruka mbi ku buzima bwabo bakabona uko baha umwanya ibibateza imbere.

Umuyobozi w’akarere ka Kayonza Murenzi Jean Claude nawe yagejeje ubutumwa ku baturage b’umurenge wa Mukarange bwo kwirinda ibiyobyabwenge ndetse bakitabira ibikorwa bibateza imbere. Yagize ati:” iterambere ry’umudugudu, akagari n’umurenge muri rusange riri mu maboko yanyu. Ibiyobyabwenge ni imwe mu mbogamizi y’iterambere, ukurikije uburyo bigira ingaruka mbi cyane cyane ku rubyiruko kandi arizo mbaraga z’igihugu kandi dutezeho ejo hazaza hacyo.”

Yabwiye cyane cyane urubyiruko rwari aho ati:"Hari bagenzi banyu bishora mu biyobyabwenge bigatuma bata amashuri ndetse abandi bakishora mu bikorwa bibi by’ubujura, bityo ingaruka zikaba nyinshi zirimo gutwara inda zitateganyijwe, igifungo n’ibindi. Ubwo mumaze gusobanukirwa ingaruka mbi zabyo rero turabasaba ko mukwiriye kuba abafatanyabikorwa ba Polisi mu kubirwanya."

Abari aho bose biyemeje gufatanya na Polisi y’u Rwanda n’izindi nzego kurandura burundu ibiyobyabwenge cyane cyane batanga amakuru y’uwo ariwe wese bazabona abicuruza, abinywa cyangwa se abikwirakwiza no mu bundi buryo.

Ubu butumwa babuhawe mu gihe hagikomeje icyumweru cyahariwe ibikorwa bya Polisi y’u Rwanda aho hirya no hino katangwa ubukangurambaga bwo gukumira no kurwanya ibyaha.

Yisangize Inshuti.

Ibitekerezo

Tanga Igitekerezo