Rusizi: Umugore yivuganye umugabo we amuteye icyuma gihata ibirayi

3

Mu ijoro ryo kuri uyu wa gatanu tariki 15 Nyakanga 2016, umugore witwa Nyirangendabanyika Laurence utuye mu mudugudu wa Gatovu, akagari ka Cyangungu, mu murenge wa Kamembe, yivuganye umugabo we witwaga Nzeyimana Joseph amuteye icyuma mu mutima.

Nkuko amakuru atugeraho abivuga, aravuga ko nyakwigendera yageze mu rugo asanga umugore we ari kurwana n’abana, maze ngo mu kujya kubakiza uyu mugore ahita amutera icyuma gihata ibirayi mu mutima ahita amwica.

Aya makuru yemejwe n’umunyamabanga Nshingwabikorwa w’umurenge wa Kamembe, Ntivuguruzwa Gervais wavuze ko uyu mugabo yishwe ubwo yari agiye gukiza umugore we warwanaga n’abana. Yavuze kandi ko bakeka ko iki gikorwa cyaba gishamikiye ku makimbirane yo mu muryango.

Abaturanyi ba nyakwigendera batangaza ko n’ubusanzwe ngo uyu mugore asanzwe agira amahane ku buryo bukomeye, aho ngo aba ashaka kuyobora umugabo we bivugwa ko yicishaga bugufi cyane.

Kuri ubu Nyirangendabanyika yajyanwe kuri sitasiyo ya Polisi ya Kamembe, naho umurambo w’umugabo ukaba wari wajyanywe ku bitaro bya Gihundwe gukorerwa isuzuma gusa mu gitondo cyo kuri uyu wa gatandatu ukaba washyinguwe.

Uyu mugore aramutse ahamwe n’icyaha, yahanwa n’ingingo y’142 y’igitabo cy’amategeko ahana ibyaha mu Rwanda, ivuga ko umuntu wese wishe uwo bashyingiranwe ahanishwa gufungwa burundu.

Yisangize Inshuti.

Ibitekerezo 3

Tanga Igitekerezo