Rulindo: Polisi yishe irashe uwashakaga kwica mushiki we

7

Polisi yishe irashe umugabo witwa Faustin Munyembabazi wari utuye mu mudugudu wa Gatare w’a kagari ka Mukoto, mu murenge wa Bushoki, mu karere ka Rulindo nyuma yo gushaka gutema mushiki we witwa Patricie Muhawenimana bamumutesha agashaka no gutema abaturanyi be n’abapolisi baje batabaye.

Uyu mugabo yarashwe mu gitondo cyo Kuri uyu wa gatandatu tariki 8 Ukwakira 2016.

Uyu Munyembabazi ngo yahereye kuwa gatanu yigize nk’umusazi ashaka gutema mushiki we (Muhawenimana) baramumutesha ndetse bamuha irondo ngo rimurarire bakeka ko yaba yanyweye ibiyobyabwenge bikaba ari byo byamuteye gusara.

Gusa ngo abaturage babonye ko afite umugambi wo kwica Mushiki we ubwo no kuwa gatandatu yabyukanaga umuhoro ajya kwa mushiki we kumutema nyuma yo kugerayo yamubura akirara mu nsina ze akazitemagurira kuzimaraho ndetse akajya no muz’abaturanyi.

Ibi byemejwe na Nzeyimana Pierre Claver, umunyamabanga nshingwabikorwa w’uyu murenge.

Nzeyimana yagize ati:"Yagaragaje ko ashaka kwica mushiki we, abaturage barabimenya baramubuza ariko arananirana aragenda ajya kwa mushiki we avuga ko agiye kumwica abantu bamutangira agashaka kubatema, agezeyo aramubura, amubuze atemagura insina zose arazararika, yadukira n’iz’abaturanyi harimo abo bafitanye amasano n’abandi baturanyi na zo arazitemagura"

Abaturage ngo babonye ko ibyo uwo mugabo arimo gukora bidasanzwe bitabaje Polisi mu gitondo cyo kuri uyu wagatandatu. Abapolisi bahageze ngo uwo mugabo nabo ntabwo yabatinye ahubwo ngo yahise abasatira ashaka kubatema.

Umupolisi ngo yagerageje kurasa amasasu hasi agirango amukange ariko aho guhunga ahubwo akamusatiriza umuhoro ashaka kumutema, nibwo umupolisi mu kwitabara yafashe umwanzuro wo kumurasa ahita ahasiga ubuzima.

Nzeyimana adusobanurira urupfu rwa Munyembabazi yagize ati: "Yabanje gusatira mwenenyina wari ufite ikibando ashaka kumutema ahamya ikibando yari afite cyenda gucika, ubwo abapolisi babonye bikomeye baramubuza ahita abahindukirana ajya kubatema barasa amasasu hasi bashaka kumukanga ariko aranga asatira umwe aramusimbukira abangura umuhoro agiye kumutema umupolisi aritabara ahita amurasa arapfa"

Nzeyimana yatubwiye ko icyateye uyu mugabo gushaka kwica abanyamuryango be ari uko ngo bari baramuragije amatungo yabo yose akayarya bajya kuyamwishyuza akayabura.

Icyatumaga yibanda cyane kuri mushiki we witwa Patricie Muhawenimana ashaka kuba ari we yica mbere, ngo ni uko yajyaga avuga ko ari we ugira inama abandi bavandimwe be ngo bazajye kumwishyuza amatungo yabo bamuragije akayarya.

Uyu mugabo ngo yari amaze iminsi avuga ko azica abavandimwe be bose akabamara agasigaza umwe muri bo ngo yajyaga abwira ko azamuraga umwana we.

Uyu mugabo yapfuye afite imyaka 33 akaba asize umugore n’umwana umwe.

Yisangize Inshuti.

Ibitekerezo 7

  1. UBWO SE IYO AMURASA MU KAGURU BURI GIHE NGO BAMURASHE ARAPHA OYA NI GUTE WABA USHINzwe kurinda umuntu ukamurasa

  2. ariko pati ubwo ariwowe wafata umuntu ufite umuhoro koko ubwo se imbunda yaba imaziki ? rimwe narimwe ntitukajye turenganya inzego zishinzwe umutekano

Tanga Igitekerezo