Ruhango: Umugabo yasanzwe mu mugezi yapfiriyemo

2

Umugabo witwa Nzayisenga Soviline w’imyaka 46 y’amavuko yapfuye yishwe n’amazi nyuma yo kugwa mu mugezi witwa Ururumanza uherereye mu mudugudu wa Karama, akagari ka Kizibere, mu murenge wa Mbuye

Uyu mugezi wahitanye uyu mugabo ubusanzwe ngo ni umugezi utemba utajya ukama no mu gihe cy’impeshyi nubwo ngo hari ubwo amazi yawo ajya agabanuka mu gihe cy’izuba ryinshi.

Bitewe nuko muri iyi minsi hamaze iminsi hagwa imvura nyinshi, uyu mugezi kuri ubu ngo waruzuye kuburyo kuwambuka bisaba gushishoza ukareba utuyira twashyizweho two kwambukiraho ukabona kwambuka.

Uyu mugabo witwa Nzayisenga Soveline rero ngo yanyuze kuri uyu mugezi yaganjijwe n’inzoga kuko ngo yawambutse avuye mu kabari nkuko abamubonye atashye babitangaza bikaba bikekwa ko yaba yaguye muri uwo mugezi bitewe nuko bwari bwije kandi yari yasinze.

Umuyobozi w’umurenge wa Mbuye, Jean Paul Byiringiro, yemeje aya makuru avuga ko icyo bakeka ari uko yaba yaguye muri ayo mazi kubera ko yari yasinze kuko ngo uwo mugezi ufite inzira nto zo kwambukiraho.

Niringiyimana Janvier wageze ahasanzwe umurambo wa nyakwigendera yatubwiye ko abantu bawusanze mu mazi bagiye guhinga mu gitondo cyo kuri uyu wa 5 Ukwakira 2016.

Niringiyimana yagize ati:"abantu bamubonye nka saa mbiri z’ijoro ava mu kabari atashye bavuga ko yari yasinze, ubwo rero kubera ko aho ataha abanza kwambuka uwo mugezi, ashobora kuba yaguyemo bitewe nuko yari yasinze kandi hari no mu mwijima w’ijoro"

Yakomeje agira ati: " Ubwo rero umugore yamutegereje aramubura mu gitondo abantu bajyaga guhinga bamusanga muri uwo mugezi yapfuye"

Abambuka uyu mugezi ngo barasabwa kwitonda muri iki gihe cy’imvura nyinshi kandi bakawambuka hakigaragara mu rwego rwo kwirinda kuba bawugwamo.

Nyakwigendera Nzayisenga Soviline asize umugore n’umwana umwe.

Yisangize Inshuti.

Ibitekerezo 2

Tanga Igitekerezo