Rubavu:Hangijwe ibilo 46 by’urumogi

Polisi y’u Rwanda na Minisiteri y’ubuzima, ku itariki 9 z’uku kwezi bafatanyije gukangurira abatuye Umujyi wa Gisenyi, mu karere ka Rubavu kwirinda gutunda, gucuruza no gukoresha ibiyobyabwenge by’ubwoko bwose.

Ibyo biganiro byitabiriwe n’abagera kuri 800. Byabereye mu kagari ka Kivumu, mu murenge wa Gisenyi aho Polisi y’u Rwanda yari ihagarariwe na Assistant Commissioner of Police (ACP) Morris Murigo, naho Minisiteri y’ubuzima ikaba yari ihagarariwe na Dr Mazarati Jean Baptiste.

Ubwo bukangurambaga bwabanjirijwe n’igikorwa cyo kwangiza ibiro 46 by’urumogi byafatiwe muri aka karere mu bihe bishize. Abaturage bakitabiriye babwiwe ndetse basobanurirwa ububi bw’ibiyobyabwenge n’ingaruka zo kubyishoramo, kandi basabwa kubyirinda no gufatanya gukumira iyinjizwa ryabyo mu gihugu, icuruzwa n’ikoreshwa ryabyo batungira agatoki Polisi ababikora.

Ubuyobozi bw’akarere ka Rubavu n’Abanyamuryango b’Ihuriro ry’urubyiruko rw’Abakorerabushake mu gukumira ibyaha bitabiriye icyo gikorwa cy’ubukangurambaga bufite insanganyamatsiko igira iti:"Twirinde ibiyobyabwenge kuko bidindiza iterambere."

ACP Murigo yabwiye abo baturage ko ibiyobyabwenge bifatirwa mu Rwanda biba byinjijwe mu gihugu rwihishwa bivanwe muri bimwe mu bihugu bihana imbibi n’u Rwanda.

Yavuze ko mu biyobyabwenge bikunze gufatirwa mu Rwanda higanjemo urumogi, Kanyanga n’inzoga zo mu masashe zirimo Chief Warage, Kitoko, Zebra Warage, n’izindi.

Yababwiye ko ibiyobyabwenge bitera ababinyoye gukora ibyaha bitandukanye birimo gufata ku ngufu, gusambanya abana, gukubita no gukomeretsa, n’ihohoterwa rishingiye ku gitsina kubera ko nta bwenge aba afite; bityo asaba abo baturage kubyirinda.

Yagize ati,"Gutunda, gukoresha no gucuruza ibiyobyabwenge ni icyaha. Ubifatanywe arafungwa akanacibwa ihazabu. Ikindi kandi kubishoramo amafaranga ni ukuyapfusha ubusa kuko iyo bifashwe birangizwa. Ababyishoramo baragirwa inama yo kubihagarika batarahura n’izo ngaruka ndetse n’izindi tutarondoye."

ACP Murigo yakomeje ubutumwa yagezaga kuri abo baturage agira ati,"Ndizera ko mujya mwirebera ubwanyu uko ibiyobyabwenge bigenza ababinywa. Ubwo mumenye ububi bwabyo mubyirinde, kandi mugire uruhare mu kurwanya ikoreshwa n’icuruzwa ryabyo mutanga amakuru yerekeye ababikora."

Yagize kandi ati,"Mu babyinjiza mu gihugu, ababicuruza, n’ababikoresha mu buryo bumwe cyangwa ubundi harimo abavandimwe, inshuti n’abaturanyi banyu. Kubirwanya bisaba ubufatanye bwa buri wese kubera ko ababinyoye bakora ibikorwa bihungabanya ituze rya rubanda muri rusange.

Yongeyeho agira ati,"Nubona umuturanyi wawe anywa ibiyobyabwenge cyangwa abicuruza uzamugire inama yo kubireka. Natakumvira uzamenyeshe inzego zibishinzwe ayo makuru. Niwigira ntibindeba ukumva ko nta cyo bigutwaye uzaba wibeshye kuko abo babinywa bashobora gusambanya umwana wawe ku buryo byamuviramo ingaruka zikomeye zirimo uburwayi budakira."

Yababwiye ko gukora, guhindura, kwinjiza no kugurisha mu gihugu ibiyobyabwenge n’urusobe rw’imiti ikoreshwa nka byo mu buryo bunyuranije n’amategeko bihanishwa igifungo kuva ku myaka itatu (3) kugeza ku myaka itanu (5) n’ihazabu y’amafaa kuva ku bihumbi magana atanu (500.000) kugeza kuri miliyoni eshanu (5.000.000) nk’uko biteganywa n’ingingo ya 594 yo mu gitabo cy’amategeko ahana ibyaha mu Rwanda.

Mu ijambo yagejeje ku bari aho, Dr Mazarati yababwiye ko gifatwa nk’ikiyobyabwenge mu Rwanda ikinyobwa cyose gifite methanol irengeje igipimo cya zero n’ibice bitanu ku ijana (0.5%) mu bikigize nk’uko biteganywa ku mugereka wa mbere w’Iteka rya Minisitiri w’Ubuzima Nº 20/35 ryo ku wa 09/6/2015 rigena ibinyobwa bitemewe n’ibindi bintu bicungwa kandi bifatwa nk’ibiyobyabwenge n’urusobe rw’imiti ikoreshwa nka byo.

Yababwiye ko Urumogi, Kanyanga, Mayirungi, Chief Warage, Suzie na Muriture ari byo kugeza ubu bifatwa nk’ibiyobyabwenge mu Rwanda nk’uko iri Teka ribiteganya.

Dr Mazarati yongeyeho ko guhumeka Kole na Lisansi na byo bifatwa nk’ibiyobyabwenge hashingiwe ku biteganywa n’iri Teka rya Minisitiri w’Ubuzima.

Yakomeje abwira abo baturage ko ikinyobwa cyose kirengeje igipimo cya mirongo ine na gatanu ku ijana (45%) bya alukoro, ndetse n’ikindi cyose kitujuje ibyangombwa byo kuba cyanyobwa; gifatwa nk’Ikiyobyabwenge nk’uko biteganywa n’Ingingo ya 24 y’Umutwe wa III w’Itegeko N° 03/2012 ryo ku wa 15/02/2012 rigena imikoreshereze y’ibiyobyabwenge n’urusobe rw’imiti ikoreshwa nka byo mu Rwanda.

Yasoje ubutumwa bwe asaba abaturage bari aho kwirinda ikitwa ikiyobyabwenge aho kiva kikagera no kuba abafatanyabikorwa mu kurwanya iyinjizwa ryabyo mu gihugu batanga amakuru atuma bikumirwa.

Yisangize Inshuti.

Ibitekerezo

Tanga Igitekerezo