Polisi yaburiye abantu bafata amafoto y’ahabereye impanuka batabyemerewe

SP Jean Marie Vianney Ndushabandi umuvugizi wa polisi ,ishami rishinzwe umutekano wo mu muhanda

Polisi y’ u Rwanda iraburira abantu bashimishwa no kwihutira gufata amafoto y’ahabereye impanuka batabifitiye uburenganzira maze bagatangira kuyahererekanya ku mbuga nkoranyambaga.

Mu nama yaguye y’uburezi ku rwego rw’umujyi wa Kigali,yabaye kuri uyu wa 23 Kamena 2016, Umuvugizi wa Polisi y’u Rwanda ishami rishinzwe umutekano wo mu muhanda, superintendent Jean Marie Vianney Ndushabandi atanga ikiganiro ku mutekano w’abana mu muhanda, bajya cyangwa bava ku ishuri yavuze ko abantu bakwiye gucika ku bikorwa byo gushimishwa no kwamamaza Byacitse bahererekanya amafoto bafatiye ahabereye impanuka.

Yavuze ko mu gihe habaye impanuka abantu bakwiye kwitondera gufotora kuko ngo hari igihe usanga abafotora hari ubwo bafotoye amafoto ahungabanya abantu cyangwa arimo ubushinyaguzi.

Yagize ati “Hari abantu bashimishwa no kugera ahabaye impanuka bakareba cya kintu kibi cyane, urupfu rurasanzwe rwaba ari uruturutse ku mpanuka cyangwa uruturutse ku ndwara, ariko iyo ufashe umuntu w’umubyeyi wagize impanuka ari mu muhanda mu gihe ababishinzwe bataramugeraho ngo bamutunganye ugafata ifoto ugatangira kohereza kuri za mbuga nkoranyambaga nibaza ko haba harimo gushinyagura”.

Yakomeje kandi avuga ko kubaha biri mu muco wa Kinyarwanda ndetse ko yaba umuzima cyangwa uwitabye Imana aba akwiye guhabwa agaciro ke .

Yakomeje avuga ko uwafatwa akamenyekana ko ari we wakwirakwije amafoto nk’ayo mbere yabihanirwa

Ku kibazo cy’impanuka zikorwa n’amamodoka atwara abana bajya cyangwa bava ku ishuri, superintendent Ndushabandi yakemanze amakompanyi akora aka kazi.

Yavuze ko izi modoka zigomba kuba zujuje ibyangombwa byuzuye ndetse ababyeyi n’abarezi bakabikurikiranira hafi byakwanga bagasesa amasezerano bagiranye na ba ny’iri imodoka.

Ni kenshi ahabereye impanuka hagaragara abantu bafotora bifashishije za telefoni zigendanwa batabifitiye uburenganzira bagahita bayashyira ku mbuga nkoranyambaga nka Facebook, WhatsApp n’izindi, ibi ngo bagomba kumenya ko ari ikosa rikomeye baba bakwiye guhanirwa nubwo baba bibwira ko barimo kumenyekanisha ibirimo kuba.

Yisangize Inshuti.

Ibitekerezo

Tanga Igitekerezo