Polisi y’u Rwanda yizihije imyaka 16 imaze ishinzwe

IGP Emmanuel Gasana, umuyobozi wa polisi y’igihugu

Kuri uyu wa 16 Kamena 2016 Polisi y’igihugu yizihije imyaka 16 imaze ishinzwe nyuma yo guhuriza hamwe inzego zari zishinzwe umutekano zabarizwaga muri Minisiteri zitandukanye.

Muri uyu muhango wabereye ku cyicaro gukiru cya Polisi y’u Rwanda, hishimiwe intambwe ikomeye Polisi y’igihugu yateye mu gihe yatangiriye ari bake nta myitozo ihagije bafite ndetse hakaba hari hashize igihe gito u Rwanda ruvuye muri Jenoside yakorewe abatutsi mu 1994.

Ikindi Polisi y’igihugu yishimiye ni ukuba abaturage basigaye bafatanya na bo mu kwicungira umutekano.

Umuyobozi mukuru wa Polisi y’u Rwanda IGP Emmanuel Gasana yavuze ko bishimira uburyo Polisi y’u Rwanda iri mu nzego zizewe cyane n’abaturage ndetse n’uburyo Polisi y’u Rwanda ifatanya na Polisi zo mu bindi bihugu haba mu guhererekanya abanyabyaha biciye muri Interpol no gucunga umutekano mu bindi bihugu.

IGP Gasana yagize ati “ muri iyi myaka 16 tumaze twageze kuri byinshi birimo icyizere abaturarwanda bagirira Polisi y’u Rwanda kubera umutekano n’amahoro biboneka nk’uko RGB ibigaragaza muri raporo yayo ya buri mwaka. Ibindi twagezeho ni ubufatanye n’andi mahanga no kugarura amahoro ku isi ubu Polisi ikaba iri hirya no hino, ubu bufatanye kandi bugaragara muri Polisi y’igihugu na Polisi z’amahanga ku isi yose, mwibuke ko u Rwanda ruherutse kwakira Inama mpuzamahanga ya Enterpol.”

Minisitiri w’Umutekano Sheikh Musa Fazili Harerimana mu butumwa yatanze yibanze ku kurengera abana kuko ari bo Rwanda rw’ejo nk’uko insanganyamatsiko y’’icyumweru cyahariwe ibikorwa bya Polisi yabyibanzeho, aho Minisitiri Harerimana yagiraga iti “Duharanire kurengera umwana no kumurinda.”

Yavuze kandi ko kuba Polisi yarashinzwe kuri iyi tariki bifitanye isano n’amateka yaranze u Rwanda ndetse n’amateka y’umwana w’umunyafurika muri rusange aho mu matariki nk’aya nabo batarengewe n’abari babishinzwe.

Yagize ati “umutekano utarinda umwana kandi utamurenganura uba ujegajega, mu bihe nk’ibi abana batarinzwe, abana batarengewe ababashuka, abana bari bamaze kuba urubyiruko bashorwa muri jenoside yakorewe abatutsi .”

Umunsi w’isabukuru y’imyaka 16 Polisi y’u Rwanda imaze ishinzwe wahuriranye no gusoza icyumweru cyahariwe ibikorwa bya Polisi ndetse n’umunsi mpuzamahanga w’umwana w’umunyafurika.


Abanyacyubahiro batandukanye bari bitabiriye kwizihiza iyi isabukuru.


Misitiri Gashumba(Ubanza ibumoso), Minisitiri Harerimana( Hagati), IGP Gasana(iburyo)

Yisangize Inshuti.

Ibitekerezo

Tanga Igitekerezo