Polisi y’u Rwanda yijeje umutekano usesuye abazitabira inama ya AU

ACP Celestin Twahirwa umuvugizi wa Polisi y’u Rwanda

Bwa mbere mu mateka y’u Rwanda rugiye kwakira inama ihuza ibihugu byibumbiye mu muryango w’ubumwe bwa Afurika, inama igiye kuba ku nshuro ya 27, ikazitabirwa n’abantu bari hagati y’ibihumbi 4 n’ibihumbi 5 barimo n’abakuru b’ibihugu bya Afurika uko ari 54.

Mu bigaragara, iyi nama igeze kure yitegurwa dore ko n’inyubako izaberamo (Kigali Convention Centre) yamaze gutahwa ku mugaragaro ndetse n’amahoteli azacumbikira abashyitsi bazaba bitabiriye iyi nama yamaze gutegurwa kuri ubu akaba ameze neza.

Uretse inyubako n’ayo mahoteli, hirya no hino ku muhanda hari ibyapa bigaragaza iyi nama ndetse n’amabendera y’ibihugu byose bigize uyu muryango akaba ashinze ku mihanda itandukanye mu rwego rwo kugaragaza iyi nama.

Ku kijyanye n’umutekano uzaba ugaragiye imirimo y’iyi nama, umuvugizi wa Polisi y’u Rwanda ACP Celestin Twahirwa aganira na Makuruki.rw yavuze ko u Rwanda rwiteguye mu buryo bwose mu kwakira iyi nama ikomeye.Yavuze kandi ko nk’uko bisanzwe ku kijyanye n’umutekano polisi y’u Rwanda ngo imara impungenge abashyitsi bazaba bitabiriye iyi nama izatangira tariki 10 Nyakanga 2016.

ACP Twahirwa avuga ko mu Rwanda n’ubusanzwe hari umutekano ariko kuri iyi nshuro ngo hakazaba hari akarusho kubera ko u Rwanda ruzaba rwakiriye abashyitsi bakomeye.

ACP Twahirwa yagize ati: Kwitegura turiteguye mu buryo bushimishije, akarusho karimo ni uko tuzaba dufite abantu benshi twakira, dukurikirana, dufata neza, tugomba gukurikiranira umutekano,ariko icyo mbizeza ni uko twiteguye mu buryo buhagije."

ACP Twahirwa akomeza avuga ko kubungabunga umutekano w’u Rwanda ari gahunda ihoraho, aho avuga ko u Rwanda rusanzwe rufite umutekano nk’uko amaraporo mpuzamahanga yakunze kubigaragaza.

Yagize ati :Muri rusange dufite umutekano ndetse n’abandi barabishima, mwagiye mwumva amaraporo mpuzamahanga abigaragaza ko dufite umutekano, ariko umutekano ntabwo ari igikorwa ukora rimwe ngo urarangije, ntabwo ari nk’uko wubaka inzu ukavuga ngo urarangije, ni igikorwa gihoraho ni uguhora wubaka ubushobozi.

Mbere y’uko itariki nyir’izina yo kwakira inama y’umuryango w’ubumwe bwa Afurika igera, tariki 2 Nyakanga 2016 mu mujyi wa Kigali hatangiriye ubukangurambaga bw’amezi 6 ku isuku n’umutekano mu mujyi wa Kigali, gahunda isanzwe ikorwa buri mwaka ariko kuri iyi nshuro bikaba byari umwihariko kubera abashyitsi badasanzwe u Rwanda rugiye kwakira.

Muri ubu bukangurambaga, Polisi y’u Rwanda ikangurira buri munyarwanda kubungabunga umutekano aho ari ho hose ari nako afasha inzego z’umutekano mu kuwucunga, ndetse no kwirinda impanuka ku batwara ibinyabiziga.

Yisangize Inshuti.

Ibitekerezo

Tanga Igitekerezo