Polisi imaze gufata toni 7 za caguwa ituruka muri D R Congo ku buryo butemewe

Polisi y’u Rwanda ifatanyije n’ikigo cy’igihugu gishinzwe gukusanya imisoro n’amahoro bafashe toni zirindwi z’imyenda ya Caguwa yinjizwaga mu Rwanda inyujijwe mu kiyaga cya Kivu iva muri Repubulika iharanira Demukarasi ya Congo ku buryo butemewe n’amategeko.

Polisi y’u Rwanda yatangaje ko bagiye bakurikirana iyinjizwa ry’iyi myenda ku makuru babaga bahawe n’abaturage.

Polisi y’u Rwanda yavuze ko itarabasha gufata abinjije iyo myenda bose, ariko ngo hari batatu bamaze gufatwa bakurikiranweho kwinjiza imyenda ku buryo bwa magendu.

Umwe mu bafatanywe Caguwa ya magendu witwa Nisingizwe Conolate, yabwiye itangazamakuru ko yafatanywe amabaro 29, ubwo yarimo yerekeza i Kigali avuye i Rubavu akavuga ko muri ayo mabaro 29, amabaro 19 yose nta misoro yari yayatangiye.

Undi witwa Munyampeta Joseph we avuga ko yinjije mu Rwanda amabaro 19 ya caguwa kuri magendu akaba ashinjwa kwinjiza amabaro 59 kuko n’andi 40 avuga ko yasoreye nta byangombwa by’imisoro yerekana.

Ikigo gishinzwe gukusanya imisoro n’amahoro (RRA) cyagaragaje ko iyo iyo myenda aba bafatanwe itaza gufatwa igacuruzwa idatangiwe imisoro, igihugu cyari guhomba miliyoni icumi z’amafaranga y’u Rwanda y’imisoro.

Umuvugizi wa Polisi y’u Rwanda mu mujyi wa Kigali, SP Emmanuel Hitayezu, yavuze ko abaturage bangomba gukangukira gutanga amakuru ku byaha nk’ibi bimunga ubukungu bw’igihugu cyane ibigamije kunyereza imisoro kandi ngo abacuruzi na bo basabwe kubyirinda kuko ngo Polisi yarabihagurukiye.

Kuri ubu, abantu batatu bafashwe bari mu maboko ya Polisi mu gihe hakomeje gushakishwa n’abandi binjije indi myenda yafashwe.

Abafashwe bahishuye ko abacuruzi ba caguwa bose batajya basorera imyenda binjiza mu Rwanda. Kubera imisoro ihanitse bakwa kuri caguwa ngo bahitamo gusorera imwe indi bakayinjiza kuri magendu kugirango barebe ko babona inyungu baba bakeneye.

Leta y’u Rwanda yongeje imisoro ku myenda n’inkweto bya caguwa mu rwego rwo guteza imbere ibikorerwa mu Rwanda aho kuri ubu umusoro ku myenda ya caguwa wavuye kuri 0,2$ ugera kuri 2,5$ ku kilo kimwe cy’imyenda ya caguwa.

Ku nkweto za caguwa, uyu musoro wavuye kuri 0,5$ ugera kuri 5$ ku kilo kimwe cy’inkweto za caguwa zinjijwe mu gihugu.

Ibi byatumye abari basanzwe bacuruza caguwa batinya imisoro bavuga ko ihanitse cyane ndetse bamwe bakishora mu bikorwa byo kwinjiza caguwa mu buryo bwa magendu.

Ingingo ya 369 y’Igitabo cy’amategeko ahana ibyaha mu Rwanda iteganya ko umuntu wese unyereza imisoro, ahanishwa igifungo kuva ku mezi atandatu kugeza ku myaka ibiri, n’ihazabu ingana n’imisoro yanyereje, cyangwa kimwe muri byo.

Yisangize Inshuti.

Ibitekerezo

Tanga Igitekerezo