Nyarugenge: Abantu 8 bakomerekeye bikomeye mu mpanuka y’imodoka

Imodoka na Moto byangiritse bikomeye/ Photo: Umuseke

Mu gitondo cyo kuri uyu wa gatandatu, imodoka yo mu bwoko bwa Fuso ifite plaque No: RAC 151 Q yaturukaga mu bice bya Nyamirambo, yakoze impanuka ikomeye aho yagonze moto n’imodoka maze abantu 8 barakomereka bikomeye.

Amakuru twatangarijwe n’umwe mu bari bahari ubwo iyi mpanuka yabaga, yatubwiye ko iyi modoka yamanutse yerekeza Nyabugogo ariko ngo igeze hafi y’ikiraro cy’ahitwa kwa Mutwe ngo ibura feri ari nabwo ngo yahitaga igonga moto zari zihari ndetse n’imodoka yo mu bwoko bwa RAV4 yari irimo umupadiri, umubikira ngo n’akana gato.

Amakuru atugeraho avuga ko ngo mu bantu umunani bakomeretse harimo babiri bari muri iriya Fuso, gusa nyuma yo kugonga, umushoferi w’iyi Fuso ngo yahise yiruka, ku buryo ngo yaburiwe irengero.

Ibikorwa by’ubutabazi birimo Imbangukiragutabara ngo zahise zihagera zitwara abakomeretse cyane kwa muganga.

Polisi y’u Rwanda nayo yahise ihagera igerageza kongera kugarura umutekano no gufasha mu bindi bikorwa by’ubutabazi.

Umuvugizi wa Polisi y’u Rwanda ishami rishinzwe umutekano wo mu muhanda, SP Jean Marie Vianney Ndushabandi yatangaje ko iyi mpanuka nta muntu yahitanye uretse ngo abakomerekejwe nayo.

Yavuze ko inzego z’umutekano zikomeje gukora iperereza ryimbitse kugira ngo hamenyekane icyateye iyi mpanuka.

Abakomeretse bahise bajyanwa ku bitaro bya kaminuza bya Kigali (CHUK) kugira ngo bakurikiranwe n’abaganga.

Iyi mpanuka ije ikurikira iyari iherutse kubera mu muhanda Nyamirambo- Mageragere ku itariki ya 30 Kamena 2016, aho imodoka ya Hiace yataye umuhanda maze ihitana abantu bane, naho abagera ku icyenda barakomereka.


RAV4 yari irimo abihaye Imana yangiritse bikomeye/ Photo: Umuseke


Fuso nayo yangiritse cyane ku gice cy’imbere/ Photo: Umuseke

Yisangize Inshuti.

Ibitekerezo

Tanga Igitekerezo