Nyanza: Babiri batawe muri yombi bakekwaho kwiba moto

Mu karere ka Nyanza abagabo 2 batawe muri yombi nyuma yo gufatanwa moto yari yibwe mu mujyi wa Kigali.

Abagabo 2 batawe muri yombi mu karere ka Nyanza nyuma yo gufatanwa moto yari yibwe mu mujyi wa Kigali. Iyi moto ya Mbarushimana Jules Bosco ikaba yaribwe mu ijoro ryo ku itariki ya 2 Kanama, yibirwa ku Kinamba mu karere ka Gasabo.

Umuyobozi wa Polisi y’u Rwanda mu ntara y’Amajyepfo, Assistant Commissioner of Police (ACP) Dismas Rutaganira yavuze ko abakekwaho kwiba iyi moto ari Ndayambaje Aimable na Kagabo Antoine, bakaba barafashwe ku gicamunsi cyo ku itariki ya 3 Kanama bafatirwa mu kagari ka Rwesero umurenge wa Busasamana akarere ka Nyanza.

Yagize ati:” Ku itariki ya 2 Kanama, amakuru yatugezeho aturutse mu karere ka Gasabo ko hari moto ifite icyapa kiyiranga RD 175 N yibwe ikerekeza mu ntara y’Amajyepfo, nibwo twahise tubimenyesha Polisi zose zikorera muri buri karere k’iyi ntara, tunakorana n’amashyirahamwe y’abamotari, iyi mikoranire rero niyo yatumye tumenya aho iyi moto iri tunafata abakekwaho kuyiba.”

Amakuru avuga ko Ndayambaje yahawe iyi moto na nyirayo ngo ayikoreshe akazi ka nimugoroba, nawe agahita ayijyana mu karere ka Nyanza ariho yahuriye na Kagabo bagafatwa bari kuyishakira umuguzi. Ubu moto ikaba yarasubijwe nyirayo.

Umuyobozi wa Polisi y’u Rwanda mu ntara y’Amajyepfo yashimiye imikoranire ya Polisi n’abaturage kuko ituma ibyaha byinshi bikumirwa bitaraba, anabasaba kuyikomeza.

Yisangize Inshuti.

Ibitekerezo

Tanga Igitekerezo