Nyanza: Abaturage batanze amakuru yatumye abantu umunani bafatanwa urumogi n’ibindi biyobyabwenge

1

Polisi y’u Rwanda ikorera mu karere ka Nyanza, mu rukerera rwo kuri uyu wa gatatu tariki ya 3 Gicurasi yataye muri yombi abantu 4 bakoreshaga bakanacuruza urumogi. Bose bakaba bafatanywe udupfunyika 830 twarwo, ubu bakaba bafungiye kuri sitasiyo ya Polisi ya Busasamana mu gihe iperereza rikomeje.

Abafashwe ni Uwineza Mwadjuma w’imyaka 31 wafatanywe udupfunyika 629, Gatari Charles w’imyaka 33 wafatanywe udupfunyika 135, Tuyisenge Jerome w’imyaka 40 watanywe udupfunyika 48, na Munyezamu Emmanuel w’imyaka 21 wafatanywe udupfunyika18.

Umuyobozi wa Polisi mu karere ka Nyanza Superintendent of Police (SP) Celestin Musuhuke yavuze ko abaturage aribo batanze amakuru yatumye aba bakekwaho ibi byaha bafatwa aho yavuze ati:” Nyuma y’aho dukanguriye abaturage cyane cyane urubyiruko gukumira, kurwanya no kwirinda ibiyobyabwenge, ubu bahagurukiye kubirwanya. Ni muri urwo rwego abaturage bo mu murenge wa Busasamana mu tugari twa Nyanza na Rwesero bari bamaze iminsi babona aba bantu banywa bakanacuruza urumogi baduhaye amakuru, tujya kubafata tubasangana urumogi tungana kuriya.”

Yakomeje avuga ko ubusanzwe mu karere ka Nyanza hadakunze kugaragara urumogi rwinsi kuko n’abarufatanwa babafatana udupfunyika ariko ko ruhari, avuga ko Polisi izakomeza kongera imbaraga yashyize mu kurwanya ibiyobyabwenge, akaba asaba buri muntu wese waba ufite amakuru y’ubicuruza cyangwa ubinywa kuyageza kuri Polisi imwegereye cyangwa ku zindi nzego zishinzwe umutekano.

Hagati aho kandi, no mu karere ka Gatsibo, umurenge wa Kabarore, hafatiwe Ntakirutimana J d’Amour w’imyaka 29, Mukatwari Consitantinew’imyaka 27 ,Nyiranzirorera Constantine w’imyaka 37 na Mukeshimana Justine w’imyaka 33; nyuma y’amakuru Polisi ikorera muri aka gace yahawe n’abashoferi batwara abagenzi , ko aba bafashwe bari bafite amapaki 32 ya Zebra Waragi, ubwo bari mu mudoka yavaga Matimba yerekeza I Kigali; ubu bakaba bafungiye kuri sitasiyo ya Polisi ya Kabarore.

SP Musuhuke yashimiye abaturage bahaye Polisi amakuru yatumye aba bafatwa, akomeza abahamagarira kwirinda gukoresha no gucuruza ibiyobyabwenge kuko uretse no kubakururira ibibazo byo gufungwa bibangiriza ubuzima, bityo bikabadindiza mu iterambere.

Ingingo ya 594 yo mu gitabo cy’amategeko ahana ibyaha mu Rwanda ivuga ko umuntu wese ukoresha ibiyobyabwenge ahanishwa igifungo kuva ku mwaka umwe kugeza ku myaka itatu n’ihazabu y’amafaranga y’u Rwanda kuva ku bihumbi mirongo itanu kugeza ku bihumbi magana atanu.

Yisangize Inshuti.

Ibitekerezo 1

Tanga Igitekerezo