Musanze: Imvura nyinshi ivanze n’umuyaga yangirije abaturage

Imvura ivanze n’umuyaga yangije inzu z’abaturage,amashuli n’imyaka mu karere ka Musanze gusa ubuyobozi bukaba buvuga ko nubwo nta buzima bw’abantu yahitanye hangiritse byinshi bataramenya umubare wabyo.

Tariki ya 7 Nyakanga 2016 mu masaha ya ni mugoroba nibwo imvura ivanze n’umuyaga yatangiye kugwa mu murenge wa Cyuve mu Karere ka Musanze aho yangije inzu z’abaturage mu tugari twa Rwebeya na Kabeza.

Mu Kagali ka Kabeza hasenyutse inzu esheshatu,imyaka mu mirima irangirika ndetse hasenyutse n’ibyumba by’amashuri ku rwunge rw’amashuri rwa Kigombe ibisenge bikaba byagurutse.

Ku ishuri ribanza rya L’amitié hangiritse icyumba kimwe aho igisenge cyagurutse.

Manzi Jean Pierre, Umunyamabanga Nshingwabikorwa w’Umurenge wa Cyuve yabwiye Igihe ko iyi mvura yatunguranye ikangiza byinshi gusa ngo kubw’amahirwe nta muntu wahasize ubuzima.

Ati “Ntituramenya neza ibyangiritse byose uko bingana kuko turacyabarura,gusa nta muntu byahitanye uretse inzu, amashuri n’imyaka y’abaturage"

Abaturage bagezweho n’iki kiza bakaba bavuga ko bidasanzwe ko habaho imvura ishobora kwangiza mu mezi y’impeshyi gusa bakaba bavuze ko bahuye n’igihombo kuko bamwe muri bo batari bafite ubwishingizi.

Iyi mvura yaguye hafi mu duce twose tugize akarere ka Musanze gusa ikaba yangije ibintu mu murenge wa Cyuve mu tugari twa Kabeza na Rwebeya.



Iki ni icyumba cy’ishuli cyangiritse
Amafoto: Igihe

Yisangize Inshuti.

Ibitekerezo

Tanga Igitekerezo