Musanze: Ibiyobyabwenge bifite agaciro ka Miliyoni zisaga 10 byangijwe

1

Polisi y’u Rwanda ikorera mu karere ka Musanze ifatanyije n’inzego zitandukanye bangije ibiyobyabwenge binyuranye birimo urumogi, kanyanga, inzoga zitemewe zo mu masashi, amavuta yangiza uruhu n’ibindi. Ibi biyobyabwenge byangirijwe kuri Sitasiyo za Polisi y’u Rwanda zitandukanye zo muri aka karere, ku itariki ya 23 Kamena.

Ibi biyobyabwenge byose byangijwe, bifite agaciro k’amafaranga y’u Rwanda 10,115,800. Uwo muhango wo kubyangiza witabiriwe n’abayobozi b’inzego z’ibanze, iz’umutekano,ubushinjacyaha ku rwego rwisumbuye muri aka karere ndetse n’abaturage.

Umuvugizi wa Polisi y’u Rwanda mu Ntara y’Amajyaruguru Inspector of Police (IP) Innocent Gasasira, ubwo yagezaga ubutumwa ku baturage bwo kubyirinda yagize ati:” nta terambere ry’umunywi w’ibiyobyabwenge, kuko adakora kandi ibyakabaye bimuteza imbere abipfusha ubusa, abigura ibimwangiriza ubuzima”. IP Gasasira yavuze ko ibyo biyobyabwenge byafatiwe mu mikwabu ya Polisi y’u Rwanda, yakozwe hirya no hino muri aka karere mu rwego rwo kubirwanya, guhera mu ntangiriro z’uyu mwaka.

Umuvugizi wa Polisi y’u Rwanda mu Ntara y’Amajyaruguru yakomeje ashima ubufatanye bwa Polisi y’u Rwanda, abaturage n’izindi nzego mu kurwanya ibyaha agira ati:”Ubufatanye nibwo bwatumye hafatwa ibi biyobyabwenge ndetse ababifatiwemo bashyikirijwe inzego z’ubutabera. Turifuza ko iyi mikoranire myiza yakomeza”.

Yasoje asaba abaturage kwirinda ibiyobyabwenge agira ati:” kunywa, gucuruza no gutunda ibiyobyabwenge, binyuranyije n’amategeko ndetse ababifatiwemo bahabwa ibihano birimo no gufungwa kugera ku myaka itanu nk’uko bikubiye mu gitabo cy’amategeko ahana ibyaha mu Rwanda mu ngingo ya 594”.

Yisangize Inshuti.

Ibitekerezo 1

Tanga Igitekerezo