Muri Tanzaniya 11 bapfuye naho 200 barakomereka mu mutingito wageze no mu Rwanda

Inzu zasenywe n’umutingito wabaye muri Tanzaniya
Abayobozi b’igihugu cya Tanzaniya batangaje ko abantu 11 bapfuye abandi 200 barakomereka mu mutingito wabaye mu majyaruguru y’uburengerazuba bw’iki gihugu.

Ku gicamunsi cyo kuri uyu wa 10 Nzeli 2016, humvikanye umutingito mu bice bitandukanye by’igihugu, ukaba wari uri ku gipimo cya 5,7 aho wanyuze mu Rwanda, Tanzaniya, Uganda na Kenya.

Amakuru dukesha BBC aravuga ko uyu mutingito wahitanye abantu 11 ndetse abandi barenga 200 barakomereka mu gihugu cya Tanzaniya.

Abashinzwe ibikorwa by’ubutabazi baravuga ko umubare munini w’abantu baheze mu mazu yasenyutse ubwo uyu mutingito wabaga.

Uyu mutingito wabaye ahagana saa 14:27:28 ukaba waramaze igihe kitageze ku munota.Waturutse hafi y’Ikiyaga cya Victoria ku ruhande rwa Tanzania nk’uko byemejwe n’urubuga rutangaza ibijyanye n’imitingito earthquake.usgs.gov.

Uyu mutingito wabaye wagaragaye mu bihugu bitandukanye by’ibituranyi na Tanzaniya nka Kenya, Uganda, Rwanda n’uburundi.

Umutingito nk’uyu wo ku gipimo cya cya 5.8 waherukaga kuba mu Rwanda mu ijoro rya tariki 6 rishyira 7 Kanama 2015 aho wumvikanye mu Rwanda ndetse no mu bindi bihugu bituranye n’u Rwanda.

Nk’uko byagaragajwe n’impuguke mu bijyanye n’ibirunga, uyu mutingito waturutse mu Kiyaga cya Kivu mu gice cya Repubulika iharanira Demokarasi ya Kongo. Wagize ingaruka ku birunga bya Nyamuragira na Nyiragongo ariko zidakanganye ku buryo watuma ibirunga biruka.

Yisangize Inshuti.

Ibitekerezo

Tanga Igitekerezo