MINALOC na Polisi y’u Rwanda bahuriye mu nama yo kwiga uko amatora yazagenda neza

Abayobozi batandukanye bo muri Minisiteri y’ubutegetsi bw’igihugu n’aba Polisi y’u Rwanda bahuriye mu nama yo kwigira hamwe no gufata ingamba, zatuma ibikorwa bijyanye no kwiyamamariza umwanya w’umukuru w’igihugu ndetse n’amatora,byose biteganyijwe mu minsi iri imbere bigenda neza.

Iyi nama yabaye ejo kuwa mbere ku cyicaro cya Polisi y’u Rwanda ku Kacyiru; yari iyobowe na Minisitiri w’ubutegetsi bw’igihugu Francis Kaboneka, ari kumwe n’Umuyobozi mukuru wa Polisi y’u Rwanda IGP Emmanuel K. Gasana. Yitabiriwe kandi n’abayobozi b’Intara zose, abayobozi b’uturere ndetse n’abayobozi bakuriye amashami n’imitwe inyuranye muri Polisi y’u Rwanda.

Minisitiri w’ubutegetsi bw’igihugu yashimye imikoranire myiza isanzweho hagati ya Minisiteri ayobora na Polisi y’u Rwanda, asaba ko yakomeza kuba myiza kurushaho cyane cyane mu gihe cyo kwiyamamariza umwanya w’umukuru w’igihugu n’umunsi nyirizina w’itora kugirango amatora azagende neza, ntacyiyahungabanyije.

Yagize ati:” imigendekere myiza y’ibikorwa byo kwiyamamaza ndetse n’amatora nyirizina bimaze kuba umuco w’abanyarwanda. Turifuza ko byakomeza gutyo, binyuze no mu guhanahana amakuru”.

Minisitiri Kaboneka yavuze ko muri icyo gihe, abaturage bakora ingendo zitandukanye ndetse bakanishima ku kigero runaka. Ni muri urwo rwego yakomeje avuga ko ari ngombwa ko bitabwaho bakarindirwa umutekenano kugirango ibikorwa byo kwiyamamaza ndetse n’amatora bizagende neza.

Minisitiri w’Ubutegetsi bw’igihugu yanavuze ko abaturage bafite uburenganzira bwo kwitabira ibikorwa byo kwiyamamaza, bityo ko abayobozi b’inzego z’ibanze bagomba kuzakurikirana imigendekere myiza yabyo. Yagize ati:” turifuza ko amatora aba nk’uko amategeko abiteganya, duharanire ko ntacyayahungabanya. Icyo dusabwa ni ugutuma agenda neza ariko kandi nta wemerewe no kuyivangamo”.

Yasabye by’umwihariko abapolisi bashinzwe umutekano wo mu muhanda kuba maso bagakora akazi neza, cyane cyane mu bikorwa byo kwiyamamaza. Ibi yabivuze bitewe n’uko abantu benshi muri icyo gihe bazajya ahantu hatandukanye mu gihe abakandida bazaba bari muri ibyo bikorwa byo kwiyamamaza.

Ingingo ya 41 y’itegeko n° 27/2010 ryo kuwa 19/06/2010 ryerekeranye n’amatora, niryo rigena inshingano z’abashinzwe umutekano mu gihe cy’amatora.

Umuyobozi mukuru wa Polisi y’u Rwanda IGP Emmanuel K. Gasana, nawe yashimye imikoranire myiza iri hagati y’inzego zombi mu myiteguro n’ingamba ziriho zizatuma amatora agenda neza hakurikijwe amategeko.

Ku bijyanye no kwirinda impanuka zo mu muhanda, inama yemeje ko imodoka zose zizatwara abantu mu bikorwa byo kwiyamamaza zigomba kuba zifite ibyangombwa birimo iby’ubwishingizi, no kuba ari nzima ; ni ukuvuga zarakorewe isuzumwa ry’imiterere yazo mu kigo gipima ubuziranenge bw’ibinyabiziga cya Polisi y’u Rwanda.

Umuyobozi mukuru wa Polisi y’u Rwanda yagize ati:” zigomba no kuba zifite utugabanyamuvuduko; ku buryo izo tutarimo, hashyizweho imodoka ya Polisi igenda izenguruka iva mu Ntara ijya mu yindi ipima imodoka; ikazafasha ba nyirazo kumenya imiterere yazo”. Yavuze ko izi ngamba zose zafashwe kugira ngo abaturage bakomeze kugira umutekano usesuye mu gihe kiri imbere cy’amatora.

Inama kandi yanaganiriye ku kuzajyana no kugarura ibikoresho by’itora ahantu hateganyijwe, gucunga umutekano w’ibiro by’itora n’uw’abakandida ndetse n’abakozi ba Komisiyo y’igihugu y’amatora.

Inama kandi yanaganiriye ku kuzafasha abafite ibibazo byihariye harimo abantu bakuze nk’abasaza n’abakecuru, abagore batwite, abafite ubumuga, abana n’abandi ku buryo bakitabwaho kurushaho kugira ngo badahutazwa mu bikorwa byavuzwe hejuru.

Ibikorwa byo kwiyamamaza biteganyijwe gutangira ku itariki ya 14 Nyakanga nk’uko byatangajwe na Komisiyo y’igihugu y’amatora.

Yisangize Inshuti.

Ibitekerezo

Tanga Igitekerezo