Kwitana bamwana kw’inzego zimwe z’ubuyobozi ngo biri mubitera ubwiyongere bw’inkongi

Ignatius Mugabo Umuyobozi w’ikigo ‘MUGOLDS gishinzwe gukumira inkongi z’umuriro

Umuyobozi w’ikigo cyigenga gishinzwe gukumira inkongi z’umuriro ‘MUGOLDS’ Ignatius Mugabo akaba umushakashatsi n’inzobere mu bijyanye n’inkongi z’umuriro avuga ko impamvu ibintu bikomeje kwangizwa n’inkongi z’umuriro kandi mu buryo bumwe ari amabwiriza adahamye no kwitana bamwana kw’inzego bireba.

Uyu mushakashatsi avuga ko kuba mu Rwanda nta muntu n’umwe wize ubusesenguzi ku nkongi z’umuriro ‘fire investigation’ ari ikindi kintu gituma inkongi ziyongera kuko ngo usanga inzu ihiye uyu munsi ejo indi igashya kandi impamvu zateye izo nkongi ari zimwe, ibintu yavuze ko bitandukanye no bindi bihugu.

Yagize ati: ”ibindi bihugu twakoreyemo usanga hari inzego zisobanutse zishinzwe ibijyanye n’inkongi ku buryo n’aho ibaye izo nzego ziga amasomo kuri iyo nkongi bikabafasha kwirinda ntihazagire aho yongera kuba, bitandukanye no mu Rwanda bihora byisubiramo, ikibitera mbona ari uko mu Rwanda nta muntu numwe ufite ubumenyi k’ubusesenguzi bw’inkongi z’umuriro ‘Fire investigation’ rero byaba byiza duhuguye abantu.”

Ignatius Mugabo akomeza avuga ko kwitana bamwana kw’inzego bireba ari ikindi kintu gituma u Rwanda rukomeza kwibasirwa n’inkongi z’umuriro.

Yagize ati: ”ikibitera nyine nta ngamba zihari zikaze, nta politiki ihari ihamye, hari amabwiriza ari aho ariko ugasanga n’abantu barayasuzugura noneho hari polisi ishinzwe gutabara, hari inzego za Leta zishinzwe politiki zitandandukanye ariko zitana bamwana kenshi, inkongi iraba wabaza uti ni nde ushinzwe iki, bati jya muri iyi, wajya muri yo bakubwiye bati jya muri iriya bikarangira ugarutse aho watangiriye.”

Ignatius yasabye ko hajyaho ubufatanye n’ibindi bihugu hakarebwa uburyo igihe habayeho nk’ikibazo cy’inkongi ibindi bihugu byagifasha mu byo kitishoboyemo, ikindi yasabye u Rwanda ko rwafasha abanyarwanda kugira ubumenyi ku nkongi z’umuriro.

Twababwira ko nk’uko iyi mpuguke mu bijyanye n’inkongi z’umuriro yabigaragaje, hagati ya 2012 na 2014 inyubako zangiritse mu gihugu cyose zifite agaciro k’amafaranga y’u Rwanda kangana na Miliyari 5.

Yisangize Inshuti.

Ibitekerezo

Tanga Igitekerezo