Kimisagara: Ibiro 450 by’urumogi byafatiwe mu nzu y’umuturage

Umuyobozi w’akarere ka Nyarugenge, Kayisime Nzaramba yasabye abagatuye kutaba ba ntibindeba mu gufatanya kurwanya ikoreshwa n’icuruzwa ry’ibiyobyabwe; ahubwo bakabyirinda; kandi bakagira uruhare mu kubirwanya batungira agatoki inzego zibishinzwe ababyishoramo.

Ubu butumwa yabutanze ku itariki 20 z’uku kwezi mu kiganiro yagiranye n’abaturage bo mu murenge wa Kimisagara ubwo Itangazamakuru ndetse n’abo baturage berekwaga ibiro by’urumogi bigera kuri 450 byafatiwe mu nzu iri mu mudugudu wa Karwarugabo, mu kagari ka Kamuhoza.

Abari aho beretswe kandi abantu batatu bamaze gufatwa kugeza ubu bacyekwaho ubufatanyacyaha mu gutunda no gucuruza urwo rumogi rwafashwe ku wa 19 Werurwe uyu mwaka. Aberekanwe ni nyiri inzu rwari rupakiyemo witwa Ahobantegeye Samuel, umurinzi w’iyo nzu witwa Nvunabandi Ezechias n’Umumotari witwa Kwizera Felix wafashwe aje kurupakira.

Iperereza ry’ibanze rigaragaza ko urwo rumogi ari urw’uwitwa Uwamahoro Jeanette (ugishakishwa); akaba ari na we wakodesheje iyo nzu rwari ruhishemo, kandi uwaharindaga akaba ari musaza we; uyu (Mvunabandi) akaba na none yari amaze igihe gito afunguwe nyuma yo kumara imyaka igera kuri ibiri afungiwe muri Gereza ya Miyove azira kwishora mu biyobyabwenge.

Na none mu bagize umuryango wa Uwamahoro harimo abandi bafunzwe bazira kwishora mu biyobyabwenge barimo umugabo we, basaza be babiri n’umukobwa we.

Asobanura uko amakuru y’urwo rumogi yamenyekanye, Umuhuzabikorwa w’Umurege wa Kimisagara, Sage Ruzima yagize ati,"Muri iyi minsi twakajije ingamba zo kurwanya ikoreshwa n’icuruzwa ry’ibiyobyabwenge twibanda cyane cyane ahantu tubicyeka harimo n’aha hafatiwe ibi bingana gutya. Ubwo abanyerondo bari mu kazi muri aka kagari ka Kamuhoza bafashe umumotari wapakiraga umufuka w’urumogi kuri moto; hamyuma barebye muri iyi nzu basangamo urundi rwinshi, ni ko gufata uwaharindaga , uwo mumotari ndetse na nyiri iyi nzu; hanyuma baraharinda, kandi babimenyesha inzego zibishinzwe."

Yagarutse ku bubi bw’urumogi avuga ko rwangiza urubyiruko kandi ari rwo ahazaza h’iguhugu; bityo ko hakenewe ubufatanye mu kurwanya itundwa n’icuruzwa ryabyo.

Mu butumwa yagejeje ku baturage bari aho, Umuyobozi w’akarere ka Nyarugenge Kayisime Nzaramba yababwiye ati,"Niyo haba nta muntu wo mu muryango wawe wishora mu biyobyabwenge ntugomba kurebera ababikora. Umenye ko uwo ubinywa ukamuhishira ari we ejo uzasambanya umwana wawe akanakora n’ibindi bikorwa bihungabanya umutekano. Murasabwa kwirinda kuba ba ntibindeba mu kubirwanya (ibiyobyabwenge). Mutyo twese dufatanye kurwanya ubu bucuruzi buroga abaturarwanda, bushyira ubuzima bwabo mu kaga; kandi bubatera gukora ibinyuranyije n’ amategeko."

Yasabye by’umwihariko urubyiruko kwitandukanya n’icyitwa ikiyobyabwenge agira ati,"Muri amaboko y’igihugu n’imbaraga zacyo. Mwirinde kwishora mu biyobyabwenge ndetse n’ikindi cyose gishobora kwangiza ahazaza hanyu. Ntimugahishire kandi ubinywa ndetse n’ubicuruza kabone niyo yaba inshuti cyangwa umuvandimwe wanyu kubera ko ibikorwa bye bihungabanya ituze rya rubanda muri rusange."

Mu ijambo rye, Umuyobozi wa Polisi y’u Rwanda mu Mujyi wa Kigali, Assistant Commissioner of Police (ACP) Rogers Rutikanga yavuze ko Uwamahoro asanzwe ashakishwa kubera gucyekwaho gucuruza urumogi; akaba yaraje kubikorera muri Kimisagara avuye muri Cyahafi, mu murenge wa Gitega agerageza kwihisha inzego z’umutekano zamushakaga.

Yakomeje agira ati," Bigaragara ko uru rumogi rwazanagwa n’imodoka. Ntibyumvikana ukuntu abatuye hafi y’iyi nzu rwafatiwemo batigeze baca iryera abarupakiyemo. Ndibaza kandi impamvu abatuye hafi aha batigeze bagira amakenga y’ibikorerwa muri iyi nzu yari ifite umuzamu; kandi igakingurwa nijoro gusa. Aba batatu mweretswe ni bo kugeza ubu bamaze gufatwa bacyekwaho ubufatanyacyaha mu itundwa n’icuruzwa ry’uru rumogi; ariko iperereza rirakomeje kugira ngo n’abandi babigizemo uruhare bafatwe."

Yagize kandi ati," Hari ubwo umwana atsindwa mu ishuri umubyeyi we cyangwa undi ufite inshingano zo kumurera akibwira ko byatewe n’ubuswa nyamara byatewe no kunywa ibi bitindigasani. Igihe ni iki cyo gufatanya kurwanya twivuye inyuma ikoreshwa n’icuruzwa ryabyo."

Yisangize Inshuti.

Ibitekerezo

Tanga Igitekerezo