Kigali: Umugore n’umusore bakekwaho ubushukanyi bafashwe bashinjanya ubutekamutwe

1

Abanyerondo na DASSO mu mujyi wa Kigali bafashe umugore n’umusore bashinjanyaga ubutekamutwe n’ubwambuzi biciye mu kuvunjirana amadorali n’amafaranga y’u Rwanda.

Ibi byabaye kuri uyu wa 06 Nzeri 2017, mu ma saa tanu n’igice z’amanywa mu mujyi wa Kigali ahazwi nko ku Nkurunziza, aho umugore wo mu kigero cy’imyaka 30 yatabaje inzego z’umutekano avuga ko yambuwe n’abashukanyi bamubwira ko bashaka kumuvunjira bakagenda batamuhaye amadorali kandi we yabahaye amafaranga y’u Rwanda.

Uyu mugore yateranaga amagambo n’umusore maze abashinzwe umutekano barimo DASSO n’abanyerondo bahita babafata bombi ndetse n’abaturage barahurura, uyu mugore yahise abwira umunyamakuru wacu ko atifuza ko amufata amashusho yewe ko n’ijwi arihindura ariko yemera kumuvugisha.

Ati: ”Nari ndi muri banki ngiye gushaka amadorali, uyu mu tipe nimba yambonanye amafaranga menshi simbizi arambwira ati njyewe mfite amadorali ndayashaka ku mafaranga 600 ati ntakibazo mfite ibihumbi 20 ngwino nkuvunjire. Ndamubwira nti banza umpeho 100 tujye ku biro by’ivunjisha turebe niba atari amadorali y’amiganano dusanga ni mazima.”

Uyu mugore yavuze ko uyu musore yari ari kumwe n’abandi basore batatu. Yakomeje avuga ko kubera ubwinshi bw’amafaranga n’amadorali bari bafite byabaye ngonbwa ko bajya kwicara ahantu bakayabara neza ariko akaza gusanga abo bahungu bafite ubwoba nk’abambuzi.

Ati : ”Noneho nahise mbabwira nti dore ayo madorali ni menshi muze dushake aho twicara mbabarire amanyarwanda mumpe amadorali. Turagenda turicara ariko nkabona uyunguyu n’umugabo bari bari kumwe basa nk’aho bafite ubwoba ndababwira nti amafaranga yange ntayo nkibahaye ariko noneho rya 100 rivunje ibihumbi 60 byo nari nabibahaye ubwo twahise tujya kubarisha akamashini dusohotse umwe ahita yiruka na moto undi ndavuga nti ni mu mumfatire.”

Uyu mugore wavugaga ahinduranya imvugo, yabanje kuvuga ko uyu musore na bagenzi be bamuhaye amadorali 100 ariko nyuma aza kuvuga ko ntayo bamuhaye ahubwo akavuga ko yabahaye amafaranga maze bakayirukankana batamuhaye amadorali hagasigara umwe.

Uyu mugore ashize amanga yavuze ko yifuza gusubizwa amafaranga ye anahakana ko yahawe amadorali nubwo mbere yari yavuze ko bamuhaye amadorili 100. Ati: " icyifuzo ni uko bansubiza ayange nkigendera”


Umugore aravuga ko uyu musore na bagenzi be bashakaga kumutekera imitwe.

Uyu musore w’imyaka 22 uvuga ko atuye mu karere ka Muhanga we avuga ko yaje i Kigali aje kuvunjisha amadorali ahabwa n’abazungu kuko akora ubujyeni. Avuga ko yari azanye amadorali 150 kuyavunjisha kandi ko yose ari ayo ahabwa n’abazungu.

Uyu musore yavuze ko nta mafaranga y’uwo mugore afite avuga ko uwo mudamu ashaka kumwambura abicishije mu kumubeshyera.

Ati :”Uyu mudamu bakimara kumfata yavuze ko nta n’igiceri yigeze ampa n’abantu hano bari bahari nta mafaranga ye nigeze njyana. Rero sinzi ukuntu atangiye kumpinduka ngo yampaye amafaranga ngo ndayajyana.”


Umusore (wambaye ishati y’umweru) ni we ushinjwa ubutekamutwe na we akabushinja umugore ubumushinja.

Umwe mu bashinzwe umutekano bari bambaye imyenda itari iy’akazi bari bafashe uyu musore n’uyu mugore bavuze ko uyu mugore ashobora kuba ari mu bagore bakora akazi k’ubutekamutwe mu mujyi wa Kigali.

Ati :” Umuntu ni mugari cyane, uyu mudamu tumufatiye hariya avuga ko nta mafaranga yibwe tuje kumurenganura turamubaza tuti uribwe cyangwa ntabwo wibwe aratubwira ati sinibwe. Uyu musore tugomba kureba ko aya madorali ari mazima kandi ikigaragara ni mazima ahubwo uyu mugore ashobora kuba ari muri ba bagore bateka umutwe i Kigali .”

Undi wo mubashinzwe umutekano ariko avuga ko hari imodoka yatwaye bagenzi b’uwo musore batatu irabacikisha bagasaba ko na yo yakurikiranwa. Ati :” hari imodoka yatwaye bagenzi b’uyu batatu RAD 548 M yahise ibirukankana uyu iramusiga na yo abayobozi bayikurikirane.”

Uyu musore ndetse n’umugore bose byarangiye bajyanwe kuri sitasiyo ya Polisi ya Muhima ngo hasuzumwe ukuri ku byo bashinjanya.


Inzego z’umutekano zahise zibajyana kuri Polisi bambi

Yisangize Inshuti.

Ibitekerezo 1

  1. Uwanditse iyi nkuru ni fake azashake akandi kazi kamuteza imbere.ibintu yanditse ntakuri kurimo.ahubwo yari yabuze icyo akora

Tanga Igitekerezo