Kigali: Abamarine bagarukanye ubugome budasanzwe mu kwambura abahisi n’Abagenzi

2

Bamwe mu baturage bakorera ndetse n’abagenda mu gace ka Nyabugogo, gaherereye mu karere ka Nyarugenge mu mujyi wa Kigali, barasaba inzego zishinzwe umutekano ndetse n’ubuyobozi bw’umujyi wa Kigali gushyira imbaraga mu guhashya abitwa abamarine bari muri aka gace, kubera ko ngo nubwo hari ibyakozwe mu kubahashya ubu ngo bakomeje kuyogoza aka gace bahohotera abaturage bakoresheje inzembe n’ibindi bikoresho bikomeretsa.

Ni kenshi iki kibazo cy’izi nsoresore ziyita abamarine cyakunze kuvugwa, ari na ko ingamba zo kuzihashya na zo zagiye zifatwa.

Nyamara nubwo hari imbaraga zashyizwe mu guhashya izi nsoresore, hari abaturage bakomeje kugaragaza ko aba basore biyita abamarine noneho ngo bakajije umurego kurusha mbere kuko ngo barimo kwambura umuhisi n’umugenzi bitwaje ibikoresho bitandukanye byiganjemo ibikomeretsa ndetse n’ibishobora kwica umuntu.

Abakorera mu gace ka Nyabugogo ahanini barashinja abashinzwe umutekano ko iyo bigeze mu masaha ya saa moya z’umugoroba bahita bigendera bityo ngo bigaha icyuho aba bamarine bagakora ibwo bugizi bwa nabi ntacyo bikanga.

Umwe mu baganiriye na MAKURUKI witwa Kamuhangire yagize ati:” Aba bagabo mureba, iyo bigeze saa moya bahita bigendera kuko usanga muri ayo masaha abagenzi baba barimo kurira. Bakoresha imbaraga mu kwiba abagenzi ushatse kurwana na bo bakamukatisha urwembe. Turifuza rwose ko mwadusabira ubuyobozi bukabwira abanyerondo kujya bava mu kazi byibuze abacuruzi bose batashye.”

Aba baturage bakomeza bavuga ko iyo bamaze kwambura abagenzi, ngo bahita birukankira mu gishanga cya Nyabugogo abenshi ntibabashe gufatwa.

Aba baturage kandi bavuga ko batungurwa no kubona hari abatabwa muri yombi bidateye kabiri bakagaruka bakaba ari bo bakomeza guhungabanya umutekano .

Undi muturage utashatse gutangaza amazina ye yagize ati: ” Rwose ikidutangaza ni uburyo hari abafatwa bagafungwa, bidateye kabiri bakaba baragarutse, aba bantu ni gute bananirana mu gihe tuzi neza ko nta muntu numwe uri hejuru y’amategeko? “

Ubuyobozi bw’umurenge wa Muhima aba bamarine babarizwamo, bemera ko iki kibazo giteye inkeke koko ariko John Ruzima uyobora uyu murenge avuga ko ngo bafashe ingamba ziruta izo bari barafashe mbere ku buryo ngo bizeye ko bazabahashya burundu.

Yagize ati: ”Abo bamarine turabazi ubwo buryo badukanye bwo gukoresha bene ibyo byuma bikomeretsa na byo turabizi. Nkuko babizi ikibazo cy’umutekano ni uguhozaho hari n’ikibazo kigaragara ku manywa ubu twashyizeho irondo ryo ku manywa ku buryo tuba dufite abanyerondo 15 ku buryo byatangiye kugabanuka.”

Uyu muyobozi akomeza avuga ko ngo nubwo no mu masaha y’ijoro hari ingamba zafashwe, avuga ko nubwo ngo aba bamarine na bo bafite andi mayeri akomeye, arizeza abaturage ko na byo bazabikemura vuba cyane, kuko ubu ngo bamaze kumenya ko iyo bamaze guhohotera abaturage, bahita birukira mu mazu ari hafi aho atagikorerwamo.

Ubuyobozi bw’umujyi wa Kigali ndetse na polisi y’u Rwanda baherutse gusinyana amasezerano yo guca ibikorwa nk’ibi mu gihe kitarenze amezi atandatu, uhereye muri uku kwezi kwa Kanama , 2016.

Mu masezerano y’ubufatante umujyi wa Kigali uherutse kugirana n’ubuyobozi bwa polisi, biyemeje ko mu gihe cy’amezi atandatu iki kibazo hamwe n’ibindi bisa na cyo bihungabanya umutekano bizaba byakemutse burundu.

Muneza Ferdinand

MAKURUKI.RW

Yisangize Inshuti.

Ibitekerezo 2

  1. nibakoreshe ingufu zihambaye nko kubarasa kugirango bacike burundu mbese kwa kundi baciye ibisambwo ruharwa byumugi abe ari nako baca izo nkuzi zibibi ngo ni abamarine

Tanga Igitekerezo