Kayonza: Abahawe akazi ko kurinda amaduka y’abacuruzi barinubira gukora badahembwa

Abakora uburinzi bazwi nk’inkeragutabara ku mazu y’ubucuruzi y’ahitwa Video mu murenge wa Gahini mu karere ka Kayonza baratabaza nyuma y’uko abacuruzi bishe amasezerano bagiranye bakaba bamaze igihe batabahemba, ubuyobozi bw’umurenge bukabizeza ko ikibazo cyabo kirimo gukurikiranwa

Abacuruzi bacururiza ahazwi nko kuri Video mu murenge wa Gahini mu karere ka Kayonza bishyize hamwe bashyiraho abazajya babarindira umutekano wabo n’amaduka yabo nijoro maze babemerera umushahara buri kwezi.

Gusa kuri ubu, aba bacuruzi barashinjwa kuba batubahiriza amasezerano bagiranye n’ababacungira umutekano.

Bamwe muri aba bacunga umutekano baganiriye na MAKURUKI, batubwiye ko babangamiwe no kuba bamaze amezi atatu badahembwa kandi bo akazi kabo bagakora neza nkuko amasezerano abibasaba.

Umwe muri bo yagize ati”tumaze amezi 3 tutabona amafaranga yacu twakoreye, kand si icyo kibazo gusa kuko n’ubundi kuva twatangira akazi amafaranga tuyabona bigoranye kuko batinda kuyaduha ntabwo bubahiriza amasezerano twagiranye.”

Aba bose bahuriza ku kuba intandaro yo kuba batabona amafaranga yabo ari bamwe mu bacuruzi badatanga amafaranga bemerenyije kandi bo babakorera ibyo babasabye.

Bakomeza bavuga ko barambiwe kwihangana ndetse bagasaba ubuyobozi kubakurikiranira ikibazo.

Ntivuguruzwa Oswald ushinzwe irangamimerere mu murenge wa Gahini yatangarije MAKURUKI ko icyo kibazo bakizi kandi bakoranye inama n’aba bacuruzi ndetse n’abashinzwe kubarindira ibicuruzwa kandi ko hari n’imyanzuro bafashe dore ko n’urutonde rw’aba bigize intagondwa banze kwishyura aya mafaranga barufite.

Yagize ati”turakizi, twakoranye inama n’impande zombi, hari abantu bamwe batubahiriza amasezerano bagiranye n’aba babacungira umutekano, twafashe umwanzuro ko tugiye gukurikirana byimbitse iki kibazo maze aba bacuruzi bakajya bishyurira ku gihe dore ko n’urutonde rw’aba bacuruzi batishyura turufite.”

Ntivuguruzwa yasabye ko abantu bazajya bubahiriza amasezerano bagiranye bidasabye kujya mu buyobozi dore ko rimwe na rimwe n’ubwo ubyobozi bubafasha buba butazi ibyayo masezerano bagiranye.

Yisangize Inshuti.

Ibitekerezo

Tanga Igitekerezo