Itsinda rya 6 ry’abapolisi b’u Rwanda rigiye koherezwa mu butumwa bw’amahoro, ibikoresho byagezeyo


Polisi y’u Rwanda iritegura kohereza itsinda rya gatandatu (FPU) ry’abapolisi mu butumwa bwo kubungabunga amahoro mu gihugu cya Sudani y’Epfo. Iri tsinda ry’abapolisi ni irya kabiri rizaba ryoherejwe muri iki gihugu.

Umuyobozi w’Ishami rishinzwe ibijyanye n’ubutumwa bw’amahoro muri Polisi y’u Rwanda Assistant Commissioner of Police (ACP) William Kayitare, yavuze ko ibikoresho bizakoreshwa n’iri tsinda ry’abapolisi byageze mu Mujyi wa Juba ndetse n’icyiciro cya mbere cy’abapolisi bagomba kugenda mbere biteguye guhaguruka vuba.

Yagize ati:” bazaba bashinzwe kurinda abaturage icyabahungabanya icyo aricyo cyose, guhosha imyigaragambyo, kurinda ibikoresho by’Umuryango w’Abibumbye n’abakozi bawo no gufasha mu bikorwa by’ubutabazi”.
Iri tsinda ry’abapolisi uko ari 140 bazaba bujuje abapolisi b’u Rwanda 1200 bari hirya no hino mu butumwa bw’amahoro ku isi nk’uko ACP Kayitare yakomeje abivuga.

Yavuze kandi ko kuba umubare w’abapolisi b’u Rwanda bajya mu butumwa bw’amahoro ukomeje kwiyongera, biterwa n’icyizere Umuryango w’Abibumbye ufitiye abapolisi b’u Rwanda kubera imikorere myiza y’akazi, imyitwarire myiza, gufasha abaturage bo muri icyo gihugu barimo ndetse n’ubunyamwuga mu kazi.

ACP Kayitare yatanze urugero rwo muri Haiti aho abapolisi b’u Rwanda bariyo mu butumwa bw’amahoro (MINUSTAH), bafashije abaturage bari bahuye n’umwuzure mu kwezi kw’Ugushyingo umwaka ushize.
U Rwanda ruri mu bihugu bitanga abapolisikazi benshi mu butumwa bw’amahoro ndetse no gushyira mu bikorwa umwanzuro wa 1325 w’inama y’umutekano y’umuryango w’Abibumbye.

Umwanzuro usaba ibihugu by’umuryango w’Abibumbye kongera umubare w’abagore mu butumwa bw’amahoro aho bafasha mu gushaka umuti w’ibibazo bitandukanye ndetse bakanagira uruhare runini kurwanya ihohoterwa.

Ubwo yari mu butumwa bw’amahoro mu kwezi k’Ukuboza 2015, Chief Inspector of Police Antoinette Umuraza, yabaye umuyobozi w’ abapolisikazi bose bo mu bihugu bitandukanye mu butumwa bwo kubungabunga amahoro mu gihugu cya Centrafrika (MINUSCA).

Amatsinda abiri y’abapolisi b’u Rwanda ari mu butumwa bw’amahoro i Juba na Malakal mu Ntara ya Upper Nile.
Polisi y’u Rwanda ifite kandi amatsinda atatu y’abapolisi mu butumwa bw’amahoro mu gihugu cya Centrafrika n’itsinda rimwe ry’abapolisi muri Haiti.

Yisangize Inshuti.

Ibitekerezo

Tanga Igitekerezo