Impanuka y’imodoka itwara abanyeshuri ba Kigali Parents isize ingamba zikarishye, umushoferi arafungwa

1

Imodoka yari itwaye abanyeshuri ba KPS yarenze umuhanda ikomeretsa abanyeshuri/Photo: Igihe

Nyuma y’impanuka y’imodoka yabaye kuri uyu wa kabiri tariki 14 Kamena 2016 mu gitondo, aho imodoka itwara abanyeshuri ba Kigali Parents School(KPS) yarengaga umuhanda, Polisi y’u Rwanda irahamagarira ababyeyi n’amashuri ndetse n’amakompanyi atwara abanyeshuri gufatanya ngo basubiremo amasezerano bafitanye kugira ngo banoze iby’umutekano w’abanyeshuri bakoresha izi modoka.

Ahagana mu ma saa moya za mugitondo kuri uyu wa kabiri, imodoka ifite plaque No RAC 845H yari itwawe na Léon Fidele Munyangabe yarenze umuhanda igihe uyu mushoferi yananirwaga gukata ikorosi ry’ahantu hamanuka, maze imodoka ibirinduka munsi y’umuhanda.

Abanyeshuri bari muri iyi modoka bavuyemo ari bazima bose uretse umwe wababaye ajyanwa kwa muganga.

Nyuma y’iyi mpanuka, Umuvugizi mukuru wa Polisi y’u Rwanda, Assistant Commissioner of Police (ACP) Celestin Twahirwa, yavuze ko ibi byatumye hatangira iperereza ku modoka zitwara abanyeshuri.

Ibi kandi, byatumye ku gicamunsi cyo kuri uyu wa Kabiri hafatwa uwari utwaye imwe muri ziriya modoka (zitwara abanyeshuri) witwa Ntakirutimana Michel, wari utwaye abanyeshuri ba Les Hirondelles, ariko igihe yafatwaga Polisi yasanze atashoboraga guhagarara kubera gusinda.

ACP Twahirwa yagize ati:”Ntakirutimana yari atwaye abanyeshuri batashye ariko babonye ko yasinze, ku bw’amahirwe barasakuje kugeza igihe ahagarariye maze barasohoka. Muri icyo gihe, Polisi yahise ihagera isanga abanyeshuri bahagaze ku muhanda, uwari abatwaye yasinziririye mu modoka.”

Yongeyeho ati:”Nyuma y’ibyo byombi, twavuganye n’ababyeyi n’amashuri. Iperereza ryagaragaje ko ababyeyi basinya amasezerano na ba nyiri amamodoka ariko nta ruhare amashuri abigizemo. Kuri ubu, turashaka ko amashuri abigiramo uruhare kandi agira inshingano ahabwa mu masezerano asinywa ku mpande zombi mu nyungu z’umutekano w’abanyeshuri.”

Yakomeje agira ati:”Zimwe muri izi modoka ntizujuje ibisabwa n’Urwego rw’igihugu rushinzwe ubuziranenge(RURA), zishyiramo abana benshi kandi zikarenza umuvuduko, ahenshi ziba zishaka gukora inshuro nyinshi ngo zitware umubare mwinshi w’abanyeshuri, kujya no kuva ku ishuri. Munyangambe yari atwaye abanyeshuri 29 mu modoka ifite ubwishingizi bw’abantu 18, yihutaga cyane ngo ahuze n’igihe cy’ishuri nyuma yo gukora inshuro nyinshi, ananirwa gukata ikorosi kubera kwihuta.”

Ku birebana na Ntakirutimana wasanzwe yasinze, ACP Twahirwa yavuze ko icyuma gipima ikigero umuntu yanyoyemo, cyagaragaje igipimo cyo hejuru cyerekana ko yari yasinze bikabije.

Umuvugizi wa Polisi yagize ati:”Ababyeyi n’amashuri bakwiye kureba ko hari umuntu mukuru uri mu modoka, igihe bajya cyangwa bava ku ishuri; ashobora kuba umwe mu babyeyi cyangwa umwarimu cyangwa undi muntu mukuru w’inyangamugayo wareba umutekano wabo mu modoka. Abana ntibakwiye gutererwa abashoferi bonyine.”

ACP Twahirwa yibukije abatwara abantu muri rusange kubahiriza amabwiriza yashyizweho na RURA, ndetse izi nzego zombi kandi ngo zizakomeza kugenzura ko amategeko y’umuhanda yubahirizwa no kureba ko izi modoka zujuje ibisabwa byose.

Yisangize Inshuti.

Ibitekerezo 1

  1. Andika Igitekerezo Hano

    Ibyo Nugutesha Agaciro Cabana Nibabashakire Umuntu Mukuru uzajya Amenya Uko urugendo rwabo rwagenze Murizo modoka wumva zitagira Nibyangombwa kdi Turashimira Polisi yu Rwanda ubushake Igira Mukazi Kayo Mrakoze

Tanga Igitekerezo