Huye: Agronome ushinjwa ingengabitekerezo ya Jenoside ngo arembeje uwamufungishije

1

Kankindi Chandari umupfakazi wa Jenoside utuye mu Murenge wa Ruhashya mu Karere ka Huye aravuga ko abangamiwe n’umu -Agronome yafungishije kubera ingengabitekerezo ya Jenoside, nyuma yo gufungurwa akaba akomeje kumutoteza.

Agoronome Sindayigaya ukora mu gishanga gihinga umuceri cya Runukangoma ngo yagiye mu kabari ahuriramo n’uyu mukecuru Kankindi.

Agoronome akekwaho kuba amaze guhaga inzoga yabwiye uyu mukecuru w’umupfakazi wa Jenoside ko ngo nta Jenoside yabaye mu Rwanda ahubwo ko ngo Abatutsi bishwe n’inzara ngo yari yateye mu Rwanda.

Uwo mukecuru ngo yagiye kumurega Agoronome baramufunga ariko yongera gufugurwa akajya yitaba ari hanze.

Kankindi aganira na Makuruki.rw yavuze ko atibaza uko uwo muntu yafunguwe kandi nta rubanza rwabaye ati: "Umuntu wavuze amagambo apfobya Jenoside avuga ko nta jenoside yabaye ahubwo ari inzara yabaye yica Abatutsi. Kubyakira byarananiye ndabisakuza mbivuga mu muganda rusange umurenge uramufata uramufunga nyuma y’icyumweru baramufungura. None ko nta rubanza rwabaye, ubwo se nta kosa yakoze?.”

Ngo nyuma yo gufungurwa agoronome yakomeje kumutoteza, ati " Imvugo mbi zo ntabwo zibura aba avuga ngo ese ubundi yakoze iki ko ntashye. Aramukira muri siporo hano hafi y’iwanjye kugirango anyereke ko nakoreye ubusa, ibyo navuze nta gaciro bifite."

Sindayigaya Jean Damascene ushinjwa ibi byaha byombi avuga ko ntabyo yakoze, avugana na Makuruki.rw yavuze ko ayo magambo ntayo yavuze kuko ngo kuva yanafungurwa atarahura n’uyu mukecuru.

Ati:"Oya ibyo bintu ntabwo mbizi, ntabwo nanabikora rwose. Sinanajya n’ahavugirwa bene ibyo bintu. Kuva nafungurwa ntabwo turahura nta n’ubwo turanavugana, Icyakora kubera ko nkunda siporo mperuka guca imbere y’aho acururiza kubera ko hari umuhanda, nari mfite igare ngiye muri siporo nabwo ntitwabonanye kuko ntawe nabonye."

.
Sindayigaya avuga ko amagambo uyu mukecuru avuga ko yavuze apfobya jenoside y’uko ngo "abatutsi bishwe n’inzara yari yarateye nta Jenoside yabaye" ngo yaramubeshyeye.

Ati:"oya ntabwo nabivuze ntabyo navuze cyane ko hari hari n’abantu kandi ndumva n’ibyavugiwe mu iperereza abo bantu barababajije"

Muzuka Eugene umuyobozi w’Akarere ka Huye yavuze ko icyo kibazo kiri gukurikiranwa na Polisi abaturage badakwiye kugira impungege ko bakirengagije.

Ati "Aramutse atotejwe cyaba ari ikibazo ariko polisi iri kubikurikirana ni nayo mpamvu yahamagajwe arafungwa arabazwa bishoboka ko ibimenyetso bitabonetse bihagije ariko Polisi yakurikiranye iyo dosiye kandi n’ubu iracyayikurikirana.”

Avuga ko ibyo gutoteza batari bakizi ariko ko bagiye kubikurikirana. Ati "Ayo ni amakuru yaba ari mashya ntabwo ibyo twari tubizi turaza kubikurikirana, twasanga aribyo nawe akabibazwa”

Umuntu wese uhamwe n’icyaha cy’ingengabitekerezo ya Jenoside ahanishwa ingingo ya 135 y’Itegeko Ngenga rishyiraho Igitabo cy’amategeko ahana. itanga igihano kuva ku myaka 5 kugeza 9 n’ihazabu y’amafaranga y’u Rwanda kuva kuva bihumbi ijana
(100,000 frw) kugeza kuri miriyoni imwe (1,000,000 frw)

Yisangize Inshuti.

Ibitekerezo 1

  1. Ahaaa! ubwo bibaye aribyo ko byaba ari ikibazo!bamwubahiye se ko ari agronome? niba barishwe ninzara se ababishe bo bari bahaze iki?mbega gupfobya! babikurikirane rwose.

Tanga Igitekerezo