Hari kuvugutwa umuti w’ibyaha bishya bikomeje kuvuka

Minisitiri w’umutekano Sheikh Musa Fazil Harerimana

Kuri uyu wa 23 Kamena 2016 hateranye inama yateguwe na polisi y’u Rwanda mu rwego rwo kuganira ku byangiza umutekano bigenda byaduka no gushaka ingamba nyazo zo guhangana na byo.

Iyi nama yitabiriwe n’abayobozi batandukanye mu nzego za Leta bafite ubumenyi ku mahoro, umutekano n’ubutabera aho bahaye ibiganiro bitanduakanye abanyeshuri biga mu ishuri rikuru rya polisi y’u Rwanda baturutse mu bihugu 31 bya Afurika.

Minisitiri w’Umutekano mu gihugu Sheikh Musa Fazil Harerimana yavuze ko iyi nama yitezweho gutanga umusaruro ufatika mu gihe bigaragara ko hagenda haduka ubwoko bw’ibyaha bihungabanya umutekano butari busanzwe.

Yagize ati “Mu bihugu byacu hagaragaramo ibihungabanya umutekano birimo iterabwoba, n’ibindi byaha bigaragara mu gihugu bigira ingaruka ku gihugu ubwacyo. Niyo mpamvu byumvikana ko guhangana n’ibibazo bikomoka ku guhinduka kw’imiterere y’umutekano ni ngombwa ko abapolisi bahabwa ubumenyi buhagije kugira ngo babashe kumva neza uko bita ku mutekano w’igihugu cyabo n’isi muri rusange.”

Umuyobozi w’Ishuri rikuru rya Polisi y’u Rwanda CP Felix Namuhoranye yavuze ko intego y’iyi nama yari uguhuza aba banyeshuri n’abandi bafite ubunararibonye ku mutekano, amahoro, ndetse n’ubutabera.

CP Namuhoranye yangoyeho ko uko ibyaha bigenda bihindura isura, polisi nayo ikwiye kujya ihora iri maso yiga ku buryo yahangana n’abanyabyaha akaba ari yo mpamvu icyerecyezo cy’inama ngarukamwaka kijyanye no guhangana n’ibyaha bishya (confronting emerging Security Challenges: Rethinking Strategies).

Yagize ati “Ibintu bigenda bihinduka cyane cyane mu bijyanye n’umutekano aho wumva hari ibyaha by’iterabwoba, hari ibyaha bigenda bivuka… noneho natwe uko tugomba guhangana n’ibi byaha, uko tugomba kurinda umutekano dufatanyije n’abandi na byo tugakora uko dushoboye kugira ngo tujye imbere y’abanyabyaha, y’abangiza umutekano tubasige.”

Dr Ocheing Kamuhadhayi umwe mu batanze ikiganiro, yavuze ko igituma Afurika ihora mu mvururu bishingiye ku bintu bibiri birimo inyungu za politiki ndetse no gushaka kwikubira umutungo.

Spt Samuel Muthamia ukomoka muri Kenya yavuze ko aya masomo bahabwa ari ingirakamaro cyane kuko azabafasha kumenya uko barinda umutekano cyane cyane mu bihugu bya Afurika byabaye indiri y’amakimbirane.

Yagize ati “Ni byiza cyane by’umwihariko muri Afurika, dufite ikibazo cy’amakimbirane ya buri gihe, nkatwe abashinzwe umutekano ni byiza ko tugomba kumenya uko tubyitwaramo tukabasha kubyiyumvisha guhera mu ntangiriro.”

Aba bapolisi 31 bakomoka mu bihugu 11 bya Afurika bamaze umwaka biga amasomo ya kuyobora mu gipolisi ndetse biga n’icyiciro cya gatatu cya kaminuza mu bijyanye n’amahoro.


CP Felix Namuhoranye avuga ko bari guhangana n’abanyabyaha bagenda bahindura amayeri y’ibyaha


Abari bateraniye mu nama bafashe ifoto y’urwibutso

Yisangize Inshuti.

Ibitekerezo

Tanga Igitekerezo