Hagiye kujyaho itegeko rihana abanyamaguru bagenda uko bishakiye mu muhanda

1

Minisiteri y’ibikorwa remezo (MININFRA) yatangaje ko hari kuvugururwa itegeko rigenga imihanda n’uburyo bwo kuyigendamo ku buryo rizagena n’ibihano ku munyamaguru ufashwe agenda nabi mu muhanda.

Byatangajwe kuri uyu wa Kane na Dr Alexis Nzahabwanimana, Umunyamabanga wa Leta muri Mininfra, ushinzwe gutwara abantu n’ibintu ubwo yitabaga abasenateri ngo asobanure impamvu amategeko n’amabwiriza ajyanye no gutwara abantu n’ibintu atarashyirwaho.

Dr Nzahabwanimana yavuze ko ubusanzwe hari hariho itegeko ryashyizweho mu mwaka wa 1987 ryerekeye imihanda n’uburyo bwo kuyigendamo.Iri tegeko ryatangiye gukurikizwa mu mwaka wa 2003 nyuma yo guhabwa uburenganzira n’Iteka rya Perezida.

Muri 2012 hasohotse itegeko ngenga rishyiraho igitabo cy’amateko ahana no 01/2012/OL ryo kuwa 02 Gicurasi 2012 rigena amakosa n’ibyaha bikorerwa mu muhanda rikanatanga ibihano.Kuva icyo gihe hatangiye gukoreshwa iryo tegeko ngenga ariko naryo ngo riracyafite byinshi riburamo.

Uyu Munyamabanga wa Leta yabwiye abasenateri ko iri tegeko ngenga ryo mu 2012 ritagaragaza ibihano ku banyamaguru n’ibindi , ari yo mpamvu batangiye umushinga w’Itegeko rizahuza ibyari mu Itegeko ryo mu 1987, itegeko ngenga n’ibigezweho ubu.

Yagize ati “ Iyo iri tegeko ngenga turigendeyeho, twasanze ritadufasha gukemura ikibazo cyangwa se ngo rifashe abantu guhinduka.Ryatangiye kuvugururwa ngo ribe itegeko risanzwe, noneho n’ibihano byari mu itegeko rya mbere bizatangire gukoreshwa.”

Nzahabwanimana avuga ko abanyamaguru bajya bakora amakosa ariko hakabura itegeko ribahana.Mu itegeko bashaka gushyiraho umunyamaguru azajya ahanirwa amakosa yakoze mu muhanda.

Ati “Mu muhanda mu bagendamo hari abatwara ibinyabiziga ariko harimo n’abanyamaguru, muri ririya tegeko mu bagomba kubahiriza amategeko yo mu muhanda bose barimo ariko ibihano ntabwo biteganya icyo twakorera umunyamaguru utubahirije amategeko y’umuhanda.Urebye aho abanyamaguru bambukira, hari igihe agera mu muhanda yagera hagati yari ari kuri telefone akibagirwa, cyangwa se abantu babiri bambutse umwe yagera hagati undi agasigara ku ruhande agatambuka, ugasanga nabyo byateje ikibazo mu muhanda ariko iyo urebye mu mategeko yacu ntabwo ubona mu buryo duhana abatubahiriza amategeko y’umuhanda ntabwo ubona uburyo wahana abanyamaguru.”

Ntabwo Nzahabwanimana ayakomoje ku bwoko bw’ibihano abanyamaguru bazajya bahabwa itegeko nirimara kwemezwa.

Kuri itegeko ngenga ryo mu 2012 rigaragaza ko abatwaye ibinyabiziga aribo bahanwa bitewe no kutubahiriza amategeko y’umuhanda, aho ufashwe acibwa amafara nga ari hagati y’ibihumbi 10 n’ibihumbi 150 Frw.

Yisangize Inshuti.

Ibitekerezo 1

  1. ARIKO NKUYU MUNYAMAGURU IBYO BIHUMBI YABIKURAHE ? AHUBWO MUBIRUKANE MUMUGI HASIGAREMO ABANYABIZIGA ! ABO BAJYE MUCYARO MUTUYIRA TWA KINYARWND ?? MANA YIRWANDA !!!!!!!

Tanga Igitekerezo