Gicumbi: Yatawe muri yombi akekwaho kwica uwarokotse Jenoside amukase ijosi

1

Umugabo witwa Nsabimana Jean Damascene utuye mu kagari ka Karenge, mu murenge wa Bukure, mu karere ka Gicumbi, yatawe muri yombi n’inzego z’umutekano muri aka karere zimukurikiranyeho urupfu rwa Mugabo Theoneste wishwe mu ijoro ryo ku wa 16 Kamena 2016 akaswe ijosi.

Mugabo wari wararokotse Jenoside yakorewe abatutsi mu 1994, yasanzwe mu nzu ye yishwe akaswe ijosi mu gitondo cyo kuri uyu wa gatanu tariki 17 Kamena 2016, nyuma y’uko yari yategerejwe na nyirasenge bari basanzwe bakorana muri resitora akamubura.

Nyuma y’iperereza ry’ibanze ryahise rikorwa n’inzego z’umutekano muri aka karere, ku mugoroba wo kuri uyu wa 17 Kamena 2016, hahise hatabwa muri yombi umugabo witwa Nsabimana Jean Damascene bivugwa ko mbere y’urupfu rwa nyakwigendera baba bari kumwe.

Umunyamabanga Nshingwabikorwa w’Umurenge wa Bukure, Rusizana Joseph, aganira na Makuruki.rw yemeje itabwa muri yombi ry’uyu mugabo, avuga ko impamvu bamufashe ari uko ari we wakundaga kugendana na nyakwigendera ndetse kandi ko hari amakuru avuga ko ku munsi wabanjirije ijoro yishwemo bari kumwe.

Rusizana kandi yakomeje avuga ko indi mpamvu uyu mugabo yaketsweho uru rupfu byaba byatewe n’uko ngo uyu Nsabimana haba hari amafaranga yari yahawe na nyakwigendera ngo azamufashe kumwubakira inzu bikekwa ko ngo haba hari mu rwego rwo gushaka kuyamwambura.

Andi makuru atugeraho avuga ko ngo nyakwigendera yaba yari amaze iminsi agurishije umurima we ashaka gusana inzu yabagamo, na byo bikekwa ko yaba ari yo yazize hashakwa uko yayamburwa.

Kugeza ubu Nsabimana afungiye kuri Sitasiyo ya Polisi ya Bukure kugira ngo hakorwe iperereza ryimbitse kugira ngo barebe niba koko yaba ahamwa n’icyaha.

Nsabimana aramutse ahamwe n’icyaha yahanishwa ingingo y’140 y’igitabo cy’amategeko ahana ibyaha mu Rwanda, aho iyi ngingo iteganya igihano cy’igifungo cya burundu ku muntu wishe undi abigambiriye.

Yisangize Inshuti.

Ibitekerezo 1

  1. Andika Igitekerezo Hano nukuri Nina umuntu agikeba undiyitwaje ubwoko muzagure ibitaro gereza nabacunga umutekano benshi

Tanga Igitekerezo