Gen Kabarebe yagaragaje uburyo ibihugu by’ibihangange byatangije intambara ya 3 y’Isi

Gen James Kabarebe avuga ko ubu Isi iri mu ntambara ya gatatu/ Photo: Umuseke

Minisitiri w’ingabo Gen James avuga ko ingabo z’Umuryango w’Abibumbye zibungabunga amahoro muri Kongo( MONUSCO) zidateze kuzavayo kuko aho kurandura imitwe iteza umutekano muke mu Karere bayitiza ingufu, ibintu avuga ko byose biri mu mugambi wo gusahura Afurika bihwanye n’intambara ya gatatu y’Isi.

Ibi Minisitiri w’Ingabo Gen. James Kabarebe yabivugiye mu nama yateguwe na polisi y’u Rwanda, yabereye ku cyicaro cya polisi y’igihugu ku Kacyiru kuri uyu wa 23 Kamena 2016, ubwo yatangaga ikiganiro cyavugaga ku kwivanga kw’ibuhugu by’amahanga mu miyoborere y’Afurika.

Gen James Kabarebe yagaragaje ko n’ubwo ubukoloni bwarangiye mu bihugu bya Afurika, ngo muri bimwe mu bihugu bya Afurika kuri ubu ibintu byabaye nabi kuruta uko byari bimeze mu gihe cy’Ubukoloni, nk’aho ngo ibikorwa remezo byasubiye inyuma ku buryo bugaragara, ibi ngo bikaba biterwa n’ukwivanga kw’ibihugu by’ibihangange biba bigamije inyungu zabyo.

Inyungu z’ibihugu by’ibihangange ndetse n’imiryango mpuzamahanga, Gen James Kabarebe yabihuje n’ibirego bishyirwa ku Rwanda hitwajwe Uburenganzira bwa muntu, ubwisanzure bw’itangazamakuru, demokarasi n’ibindi.

Yagize ati “Ingirwabirego by’imiryango mpuzamahanga ku Rwanda ni ugushyira imbere inyungu z’ibihugu byo mu burengerazuba, bivanga bakoresheje amagambo aremereye cyane nka demukarasi, uburenganzira bwa muntu, uburenganzira bwo kuvuga, ubwisanzure bw’itangazamakuru.”

Gen Kabarebe kandi yavuze ko n’ubwo ingabo za MONUSCO zajyanywe muri Kongo kugarura umutekano mu myaka myinshi ishize, ngo ntiziteze no kuzahava kuko aho guca intege imitwe ihungabanya umutekano, ahubwo ngo ziyitera imbaraga ku bw’inyungu bagamije.

Yagize ati “Umuryango w’abibumbye washyize abasirikare muri Kongo, ntaho bigeze bajya ndetse nta n’aho bazajya. Abantu bamwe bajya batekereza ko UN cyangwa MONUSCO mu rwego rwo kurandura imitwe yitwara nabi za ADF, FDLR, na za Mai- Mayi. Ntabwo ari cyo kibazo, mu gihe MONUSCO yari ihari twabonye iyo mitwe yongera imbaraga uko bwije n’uko bukeye, twagiye tubona ADF yongera imbaraga kandi hari ingabo za mbere z’umuryango w’Abibumbye zihabwa amafaranga mu gucunga amahoro ku isi, twabonye FDLR ntaho ijya ndetse tubona Abamayimayi bakomeza kwiyongera.”

Gen James Kabarebe yagaragaje ko n’ubwo Umuryango w’Abibumbye washyizweho mu 1945 mu kurangiza intambara ya kabiri y’Isi ndetse no kurwanya ko habaho indi ntambara, ngo byari mu buryo bwo kugera ku byo intambara ya kabiri y’ isi yagombaga kugeraho ariko biyoberanyije ndetse akaba abyita intambara ya gatatu y’isi.

Yagize ati “ Mu 1945 hari hagamijwe kurangiza intambara y’isi yego! Ariko reka nongereho akandi kantu byari ukurangiza intambara y’isi ariko bakagera ku byo intambara ya kabiri y’isi yagombaga kuba yaragezeho, ariko mu buryo bwiza kandi bwapanzwe ari byo gusahura umutungo na gahunda ya mpatsibihugu kuko nta kindi barwaniraga, rero ntibazongera kurwana indi ntambara y’isi bahagaritse intambara ya 2 y’isi mu 1945 ariko bashaka ubundi buryo bwo kugabana umutungo batagiye mu ntambara[...] iyo bigeze kuri Afurika, Amerika ireba hirya Ubufaransa bugakora icyo bushaka byagera ku bihugu byo mu Burasizuba bwo hagati, Ubufaransa na bwo bukareba ku ruhande iyi ni intambara ya gatatu y’isi turimo.”

Gen James Kabarebe avuze ibi nyuma y’abandi banyafurika benshi bikomye ibihugu by’ibihangange bikomeje kugira Afurika akarima kabyo, aho babishinja guteza umwiryane mu banyagihugu ariko hagamijwe inyungu cyane cyane gusahura imitungo kamere nk’amabuye y’agaciro na peteroli biba biri muri ibyo bihugu.

Yisangize Inshuti.

Ibitekerezo

Tanga Igitekerezo